(អាមេរិក)៖ Lisa សមាជិកក្រុមចម្រៀងកូរ៉េ BLACKPINK ទើបតែទិញវីឡាប្រណិតថ្មីនៅ Beverly Hills រដ្ឋ California សហរដ្ឋអាមេរិក។

កាលពីថ្ងៃទី១៧ ខែមេសា កាសែត Newsen បានរាយការណ៍ថា Lisa ទិញអចលនទ្រព្យនៅ Beverly Hills រដ្ឋ California សហរដ្ឋអាមេរិកក្នុងតម្លៃប្រហែល ៣.៩៥ លានដុល្លារ ។ វីឡាបែបបុរាណនេះត្រូវបានសាងសង់ក្នុងឆ្នាំ១៩២៤ ប៉ុន្តែថ្មីៗនេះត្រូវបានជួសជុលឡើងវិញ ស្ថិតទីតាំងនៅលើផ្ទៃដីប្រហែល ៥,២៦០m2 មានទេសភាពស្រស់ស្អាត ធានាបាននូវភាពឯកជនជាមួយនឹងភ្នំ ព្រៃឈើព័ទ្ធជុំវិញ។

ពីមុន Lisa បានទិញផ្ទះគ្រួសារមួយនៅតំបន់អ្នកមានមួយក្នុងទីក្រុង Seoul ក្នុងតម្លៃ៧.៥ ពាន់លានវ៉ុន (៥.៥លានដុល្លារ)។ ថ្មីៗនេះ Lisa បានបន្តកុងត្រាជាមួយ YG Entertainment សម្រាប់សកម្មភាពរួមគ្នារបស់ក្រុម BlackPink ។

ជាមួយនឹងអាជីពផ្ទាល់ខ្លួន តារាចម្រៀងស្រីកើតនៅឆ្នាំ១៩៩៧ បានបង្កើតក្រុមហ៊ុនគ្រប់គ្រងផ្ទាល់ខ្លួនរបស់នាងដែលមានឈ្មោះថា LLOUD ។ នាងក៏បានចុះកិច្ចសន្យាជាមួយ RCA Records ដែលជាសាខារបស់ក្រុមហ៊ុន Sony Music នៅសហរដ្ឋអាមេរិក ដើម្បីអភិវឌ្ឍអាជីពរបស់នាងជាសកល៕ ប្រភព៖ vnexpress