(សេអ៊ូល)៖ តារាចម្រៀង, អ្នកនិពន្ធចម្រៀងដ៏ល្បី នាង Park Bo Ram បានទទួលមរណភាព ក្នុង​វ័យ៣០ឆ្នាំ ហើយមួយខែមុនពេលនាងទទួលមរណភាព តារាស្រីរូបនៅតែអាប់ដេតរូបថតផ្ទាល់ខ្លួនជាច្រើននៅលើបណ្តាញសង្គម។

នៅព្រឹកថ្ងៃទី ១២ ខែមេសា ប្រព័ន្ធផ្សព្វផ្សាយកូរ៉េបានរាយការណ៍ក្នុងពេលដំណាលគ្នាអំពីមរណភាពរបស់តារាចម្រៀងស្រី Park Bo Ram ក្នុងវ័យ ៣០ ឆ្នាំ។ បើយោងតាម ​​Chosun , Xanadu Entertainment ដែលជាក្រុមហ៊ុនគ្រប់គ្រងរបស់តារាស្រីរូបបានប្រកាសថា «ពួកយើងពិតជាសោកសៅ និងខូចចិត្តខ្លាំងណាស់ Park Bo Ram បានចាកចេញពីពួកយើងកាលពីល្ងាចថ្ងៃទី១១ ខែមេសា។ សិល្បករ និងបុគ្គលិកទាំងអស់របស់ក្រុមហ៊ុនសូមចូលរួមរំលែកទុក្ខចំពោះមរណភាព»។

ព័ត៌មាន​នៃ​ការ​ស្លាប់​​របស់តារាចម្រៀង Park Bo Ram កាលពីល្ងាចថ្ងៃទី១១ ខែមេសា បាន​ធ្វើ​ឲ្យ​អ្នក​សិល្បៈ និង​ទស្សនិកជន​កូរ៉េ​ភ្ញាក់ផ្អើល។ មូលហេតុនៃការស្លាប់របស់តារាចម្រៀងស្រីរូបនេះ គឺស្ថិតនៅក្រោមការស៊ើបអង្កេតរបស់ប៉ូលីស។

យោងតាមប្រភពព័ត៌មាន មួយខែមុនពេលតារាស្រីរូបនេះទទួលមរណភាព នាងនៅតែអាប់ដេតរូបថតផ្ទាល់ខ្លួនជាច្រើននៅលើបណ្តាញសង្គម ហើយតារា​ចម្រៀង​ស្រី​រូប​នេះ​ក៏​បាន​ប្រកាស​ថា​នឹង​ចេញ​អាល់​ប៊ុម​ពិសេស​អបអរ​ខួប​១០​ឆ្នាំ​នៃ​អាជីព​សិល្បៈ​ក្នុង​ឆ្នាំ​នេះ។

Park Bo Ram ពុំដែលចែករំលែកព័ត៌មានសុខភាព ឬបញ្ហាផ្ទាល់ខ្លួននៅលើប្រព័ន្ធផ្សព្វផ្សាយណាមួយឡើយ។ ដូច្នេះហើយ​ការ​ស្លាប់ ​របស់​តារា​ចម្រៀង​រូប​នេះ​បាន​ធ្វើ​ឱ្យ​ទស្សនិកជន​មាន​ការ​ភ្ញាក់​ផ្អើល និង​សោក​ស្តាយ​ជា​ខ្លាំង។

Park Bo Ram គឺជាតារាចម្រៀងកូរ៉េម្នាក់ដែលបានផុសចេញពី កម្មវិធីប្រកួតប្រជែងទេពកោសល្យតន្ត្រី Superstar K2 ក្នុងឆ្នាំ២០១០ ហើយនាងបានបញ្ចប់ក្នុងចំណាត់ថ្នាក់កំពូលទាំង០៨ នៃកម្មវិធី៕