ខេត្តមណ្ឌលគិរី ៖ នាយឧត្តមសេនីយ៍ សៅ សុខា បានបញ្ជាឲ្យមន្ត្រីជំនាញដែលទទួលបន្ទុកការងារការពារដីព្រៃនៅចំណុចភូមិសាស្ត្រស្រុកពេជ្រាដាប្រើប្រាស់ដ្រូន(យន្តហោះគ្មានមនុស្សបើក)ឃ្លាំមើលនិងកំណត់ទីតាំងដីព្រៃដែលរងការកាប់បំផ្លាញ ដើម្បីអាចទប់ស្កាត់សកម្មភាពកាន់រានពីជនខិលខូច ។ ជាក់ស្តែង នាព្រឹកថ្ងៃទី២៩…
ខេត្តមណ្ឌលគិរី ៖ នាយឧត្តមសេនីយ៍ សៅ សុខា បានបញ្ជាឲ្យមន្ត្រីជំនាញដែលទទួលបន្ទុកការងារការពារដីព្រៃនៅចំណុចភូមិសាស្ត្រស្រុកពេជ្រាដាប្រើប្រាស់ដ្រូន(យន្តហោះគ្មានមនុស្សបើក)ឃ្លាំមើលនិងកំណត់ទីតាំងដីព្រៃដែលរងការកាប់បំផ្លាញ ដើម្បីអាចទប់ស្កាត់សកម្មភាពកាន់រានពីជនខិលខូច ។
ជាក់ស្តែង នាព្រឹកថ្ងៃទី២៩ មីនា ២០២៤ ករណីដីព្រៃត្រូវគេកាប់រុករានក្លាយជាវាលរហោឋាននៅស្រុកពេជ្រាដារាប់ពាន់ហិកតាត្រូវ នាយឧត្តមសេនីយ៍ សៅ សុខា ប្រធានគណៈកម្មការជាតិបង្ក្រាបបទល្មើសធនធានធម្មជាតិបានដឹកនាំមន្ត្រីចម្រុះ រួមមានក្រសួងកសិកម្ម ក្រសួងបរិស្ថាន ក្រសួងដែនដី និងអាជ្ញាធរខេត្តមណ្ឌលគិរី អាជ្ញាធរស្រុកពេជ្រាដា ចុះពិនិត្យនិងចាត់វិធានការទប់ស្កាត់ ដើម្បីរក្សាសម្បត្តិជាតិទុកសម្រាប់កូនចៅជំនាន់ក្រោយ ។
នាយឧត្តមសេនីយ៍ សៅ សុខា មេបញ្ជាការរងកងយុទ្ឋពលខេមរភូមិន្ទ ជាមេបញ្ជាការកងរាជអាវុធ ហត្ថលើផ្ទៃប្រទេស និងជាប្រធានគណៈកម្មការជាតិបង្ក្រាបបទល្មើសធនធានធម្មជាតិមានប្រសាសន៍ថា ករណីនេះកម្លាំងជំនាញនិងអាជ្ញាធរត្រូវចុះស្រង់និន្ន័យដីព្រៃដែលរងការបំផ្លាញឲ្យបានជាក់ស្តែង ដើម្បីងាយស្រួលកំណត់អំពីដីព្រៃដែនដែលត្រូវអភិរក្ស ឬដីព្រៃសហគមន៍ ។
យ៉ាងណាក៏ដោយ ករណីខាងលើនេះ អ្នកយកព័ត៌មានមិនទាន់អាចសុំការបញ្ជាក់ពីគណៈកម្មការជាតិបង្ក្រាបបទល្មើសធនធានធម្មជាតិបានទេ គិតត្រឹមវេលាម៉ោង២រសៀលថ្ងៃទី២៩ ខែមីនា ឆ្នាំ២០២៤។
សូមបញ្ជាក់ថា កាលពីព្រឹកថ្ងៃទី២០ មីនា ២០២៤ កម្លាំងសមត្ថកិច្ចចម្រុះខេត្តមណ្ឌលគិរី បានចុះប្រតិបត្តិការបង្ក្រាបបទល្មើសរុករានដីព្រៃរដ្ឋ យកជាកម្មសិទ្ឋផ្ទាល់ខ្លួន ដែលដឹកនាំបញ្ជាដោយលោក ស៊ាវ ងី ឈាន់ ព្រះរាជអាជ្ញាររងអយ្យការអមសាលាដំបូងខេត្តមណ្ឌលគិរី ។ សេចក្តីរាយការណ៍បានឲ្យដឹងថា សមត្ថកិច្ចបានរកឃើញទីតាំងដីព្រៃរបស់រដ្ឋរាប់សិបកន្លែងក្នុងទំហំច្រើនពាន់ហិកតាត្រូវគេអារកាប់ផ្តួលព្រៃឈើរដូករណែល រួចដុតឆេះផ្សែងហុយពេញអាកាសគួរឲ្យសង្វេគបំផុត ។
ទីតាំងដែលកម្លាំងប្រតិបត្តិការបង្ក្រាប រកឃើញមានសកម្មភាពកាប់រានដីព្រៃដ៏មហាសាលខាងលើ ដែលអាចហៅបានថា ជាវិនាសសកម្មព្រៃឈើនាដើមឆ្នាំ២០២៤នេះ គឺស្ថិតនៅភូមិសាស្ត្រឃុំប៊ូស្រា ស្រុកពេជ្រាដា ខេត្តមណ្ឌលគិរី ដែលទំនងទទួលបានភ្លើងខៀវពីអាជ្ញាធរមូលដ្ឋាន ដ្បិតទីតាំងកាប់រានដីព្រៃរដ្ឋធ្វើកម្មសិទ្ធិបុគ្គលនេះ ស្ថិតមិនឆ្ងាយពីប្រជុំជនស្រុកពេជ្រាដា ដែលបណ្តុំទៅដោយស្ថាប័នកម្លាំងសមត្ថកិច្ចចម្រុះរបស់គណៈបញ្ជាការឯកភាពស្រុក ប៉ុន្តែសកម្មភាពល្មើសច្បាប់ទាំងនោះ បែរជាគ្មានការបង្ក្រាបឬទប់ស្កាត់ទេនាពេលកន្លងមក ។
លុះត្រាមានព័ត៌មានបែកធ្លាយដល់ថ្នាក់ខេត្ត ទើបមានកម្លាំងសមត្ថកិច្ច ដឹកនាំដោយតំណាងអយ្យការអមសាលាដំបូងចុះបង្ក្រាបស្ទើរមិនទាន់ពេល ព្រោះដីព្រៃមួយភាគធំបានរងការកាប់បំផ្លាញសល់តែផេះរួចទៅហើយ។
ទោះជាយ៉ាងណា គិតត្រឹមថ្ងៃទី២៩ មីនា ២០២៤ នេះ គេនៅមិនទាន់ដឹង អំពីទំហំផ្ទៃដីព្រៃជាក់ស្តែង ដែលកម្លាំងសមត្ថកិច្ចបង្ក្រាបនេះទេ ដោយតាមការបញ្ជាក់ពីអ្នកនាំពាក្យអយ្យការអមសាលាដំបូងខេត្តមណ្ឌលគិរីថា ប្រតិបត្តិការនៅតែបន្តរាល់ថ្ងៃរហូតអាចគ្រប់គ្រងសភាពការបទល្មើសនៅចំណុចទាំងនោះបានទាំងស្រុង និងបូកសរុបរបាយការណ៍ ដើម្បីមានចំណាត់ការតាមផ្លូវច្បាប់ ។
ដោយឡែក អ្នកជាប់ពាក់ព័ន្ធឬអ្នកធ្វើសកម្មភាពផ្ទាល់សមត្ថកិច្ចពិបាកក្នុងការតាមចាប់ខ្លួន ដ្បិតភូមិសាស្ត្រស្មុគស្មាញព្រៃធំ ម្យ៉ាងសកម្មភាពរបស់កម្លាំងទើបចុះដល់ពួកគេរត់គេចខ្លួនបានអស់តែម្តង។
ចែករំលែកព័តមាននេះ