រាជធានីភ្នំពេញ ៖ រាជរដ្ឋាភិបាលរបស់ប្រទេសចិន សម្រេចផ្ដល់ហិរញ្ញប្បទានឥតសំណង ជូនរាជរដ្ឋាភិបាលកម្ពុជា ដើម្បីគាំទ្រ CMAC ក្នុងការអនុវត្ត “គម្រោងជំនួយចិន លុបបំបាត់គ្រាប់មីន នៅកម្ពុជា” សម្រាប់ឆ្នាំ២០២៤ ។
រដ្ឋាភិបាលសារធារណរដ្ឋប្រជាមានិតចិន បានសម្រេចផ្ដល់ហិរញ្ញប្បទានឥតសំណង ជូនដល់រាជរដ្ឋាភិបាលកម្ពុជា ដើម្បីគាំទ្រដល់អង្គភាព CMAC ក្នុងការអនុវត្ត “គម្រោងជំនួយចិនលុបបំបាត់គ្រាប់មីននៅកម្ពុជា” ដែលមានថវិកាសរុបចំនួន ៤,៤០០,០០០ដុល្លារអាមេរិក សម្រាប់ឆ្នាំ២០២៤ ហើយជំនួយនេះ ត្រូវបានអនុម័តជាផ្លូវការនៅចុងខែមីនានេះ បើតាមការឱ្យដឹងពី លោក ហេង រតនា អគ្គនាយក CMAC នាថ្ងៃទី២៧ ខែមីនា ឆ្នាំ២០២៤ ។
លោក ហេង រតនា បានបញ្ជាក់បន្ថែមថា គម្រោងក្នុងឆ្នាំ២០២៤នេះ មានផែនការបន្តកិច្ចប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាមក្នុងខេត្តចំនួន៣ រួមមាន ៖ ខេត្តកំពង់ធំ ខេត្តសៀមរាប និងខេត្តព្រះវិហារ ដោយផ្ដោតលើសកម្មភាពសំខាន់ៗដូចជា ៖
ទី១.ការបោសសម្អាតផ្ទៃដីមានបញ្ហាគ្រាប់មីន និងសំណល់យុទ្ធភណ្ឌសង្គ្រាមចំនួនជាង ៣,៤០០ហិកតា
ទី២.ការស្រាវជ្រាវ និងប្រមូលព័ត៌មានអំពីសំណល់យុទ្ធភណ្ឌសង្គ្រាម និងគ្រាប់បែកចង្កោមចំនួនប្រមាណ ៩,០០០ពហុកោណ (ទីតាំង) និងទី៣.ការពង្រឹងសមត្ថភាពថ្នាក់ក្រោមជាតិលើការងារអប់រំយល់ដឹងពីគ្រោះថ្នាក់ដោយសារមីន និងសង្គ្រោះជនពិការដោយសារមីនចំនួនជាង ៣០០គោលដៅ។ គម្រោងនេះផ្តល់ផលប្រយោជន៍ដោយផ្ទាល់ និងដោយប្រយោលដល់ប្រជាពលរដ្ឋប្រមាណ ៧០ម៉ឺននាក់ ។
គួរបញ្ជាក់ថា នេះជាគម្រោងជំនួយឆ្នាំទី២ នៃគម្រោងជំនួយរយ:ពេល៣ឆ្នាំ មីនា ២០២៣-កុម្ភៈ ២០២៦ ដែលមានជំនួយហិរញ្ញប្បទានឥតសំណងសរុបចំនួន ១៣,២លានដុល្លារអាមេរិក ។
សូមរម្លឹកផងដែរថា ក្រោមគោលនយោបាយដឹកនាំដ៏ខ្ពង់ខ្ពស់របស់ សម្តេចតេជោ អតីតនាយករដ្ឋមន្ត្រី និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងការអនុវត្តដោយអាជ្ញាធរមីន និង CMAC កម្ពុជារំពឹងថា នឹងសម្រេចគោលដៅរួមមួយ គឺកម្ពុជាមួយគ្មានមីនឆ្នាំ២០២៥ ហើយគោលដៅឆ្នាំ២០២៥ គឺជាគោលដៅដែលមន្ត្រីគ្រប់ជាន់ថ្នាក់មានការប្តេជ្ញាចិត្តខ្ពស់ ៕
ចែករំលែកព័តមាននេះ