ទីក្រុងឥស្លាមម៉ាបាត៖ មនុស្សយ៉ាងតិច៦នាក់ស្លាប់នៅប្រទេសប៉ាគីស្ថានភាគពាយព្យនៅពេលអ្នកដាក់គ្រាប់បែកអត្តឃាតម្នាក់បើកឡានលឿនស្លេវចូលទៅក្នុងក្បួនរថយន្តដែលដឹកវិស្វករជនជាតិចិនទៅកន្លែងសាងសង់ទំនប់វារីអគ្គិសនី។ គិតទៅត្រឹមតែរយៈពេលមួយសប្ដាហ៍ប៉ុណ្ណោះ ពួកភេរវកម្មវាយប្រហារផលប្រយោជន៍របស់ចិនបីដងគិតទាំងលើកនេះទៀត។
កាលពីលើកមុនៗ ពួកគេវាយប្រហារមូលដ្ឋានទ័ពអាកាស និងកំពង់ផែយុទ្ធសាស្ត្រនៅខេត្តប៉ាឡូជីស្ថាន។ ទីនោះ ប្រទេសចិនវិនិយោគទឹកប្រាក់រាប់ពាន់លានដុល្លារផ្នែកហេដ្ឋារចនាសម្ព័ន្ធ។ ការវាយប្រហារថ្ងៃនេះកើតឡើងនៅពេលវិស្វករចិនជិះឡានទៅកន្លែងសាងសង់ទំនប់ទឹកនៃតំបន់ដាស៊ូ។ នេះបើយោងតាមស្នងការនគរបាលខេត្តប្រាប់អ្នកសារព័ត៌មាន។ គាត់ប្រាប់ថាជនរងគ្រោះស្លាប់៥នាក់ជាជនជាតិចិន និងម្នាក់ទៀតជាជនជាតិប៉ាគីស្ថានក៏បានស្លាប់ដែរ។ គាត់ជាអ្នកបើកឡាន។
សូមជម្រាបថាតំបន់ដាស៊ូដែលកើតមានការផ្ទុះគ្រាប់បែកអត្តឃាតនោះជាទីតាំងសំខាន់នៃការសាងសង់ទំនប់ទឹក ហើយក៏ជាទីតាំងដែលធ្លាប់ទទួលរងការវាយប្រហារផងដែរកាលពីអតីតកាល។ ឆ្នាំ២០២១ មានហេតុការណ៍ផ្ទុះគ្រាប់បែកនៅក្នុងរថយន្តបឺស (bus) បណ្ដាលឱ្យស្លាប់មនុស្សយ៉ាងតិច១៣នាក់។ នៅក្នុងចំណោមនោះក៏មានជនជាតិចិន៩នាក់ផងដែរ។
សព្វថ្ងៃនេះនៅទូទាំងប្រទេសប៉ាគីស្ថាន ក្រុមវិស្វករជនជាតិចិនបាន និងកំពុងធ្វើការនៅក្នុងគម្រោងអភិវឌ្ឍជាច្រើនដែលជាការវិនិយោគរួមគ្នារវាងប្រទេសប៉ាគីស្ថាន និងចិនដោយប្រើប្រាស់ថវិកាជាង៦៥ពាន់លានដុល្លារដើម្បីស្ថាបនាហេដ្ឋារចនាសម្ព័ន្ធ។ នេះជាផ្នែក១នៃការអនុវត្តផែនការខ្សែក្រវាត់សេដ្ឋកិច្ចចិន-ប៉ាគីស្ថាន និងជាផ្នែក១នៃការអភិវឌ្ឍខ្សែក្រវាត់ និងផ្លូវ។
រហូតមកដលពេលនេះមិនទាន់មានក្រុមភេរវកម្មណាមួយប្រកាសថាជាស្នាដៃរបស់ខ្លួននៅឡើយទេ។ សូម្បីតែអំពើភេរវកម្មកាលពីឆ្នាំ២០២១នោះក៏ស្ងាត់ឈឹងដែរ។ ប៉ុន្តែគេដឹងថាទឹកដីប៉ាគីស្ថានជាសម្បុកពួកបះបោរ។ មានទាំងពួកឥស្លាមជ្រុលនិយមខ្លះ និងពួកកងកម្លាំងប្រដាប់អាវុធជនជាតិភាគតិចដែលចង់បំបែកទឹកដី។ ពួកគេបើកប្រតិបត្តិការវាយប្រហារឥតរើសមុខ។ អ្នកណាក៏ពួកគេវាយប្រហារដែរ ឱ្យតែហ៊ានប៉ះពាល់ផលប្រយោជន៍របស់ពួកគេ។ ពួកនេះចង់វ៉ាងទីតែម្នាក់ឯង។
ដូច្នេះ វត្តមានរបស់ចិននៅតំបន់ដែលពួកគេកាន់កាប់ត្រូវពួកគេចាត់ទុកថាជាឆ្អឹងទទឹងក ឬក៏ជាបន្លានៅក្នុងកែវភ្នែករបស់ពួកគេក៏បានដែរ។ មែនទែនទៅជនជាតិចិនទាំងនោះគ្នាគ្រាន់តែជាអ្នកស៊ីឈ្នួលគេដែរហ្នឹង។ គ្នាមានទៅដឹងអីគ្នា។ សោកស្ដាយដែលនៅទីបញ្ចប់ពួកគេក្លាយជាអ្នករងថ្មបាក់។ គោលដៅធំជាងគេគឺជនជាតិចិនព្រោះពួកគេចង់កម្ចាត់ចិនចេញពីខេត្តប៉ាឡូជីស្ថានដែលសម្បូរធនធានរ៉ែដ៏ច្រើនសន្ធឹកសន្ធាប់។ ពួកគេក៏វាយប្រហារនៅភាគខាងត្បូង និងភាគនិរតីផងដែរ។
សមត្ថកិច្ចឱ្យដឹងថាមុនពេលកើតហេតុនោះ រថយន្តបានដឹកបុគ្គលិកសំណង់របស់ក្រុមហ៊ុនចិនដែលធ្វើការនៅទំនប់ទឹកដាស៊ូ។ ក្រុមហ៊ុនដដែលនេះធ្លាប់រងការវាយប្រហារកាលពីឆ្នាំ២០២១។ កាលនោះ ក្រុមហ៊ុមត្រូវផ្អាកសកម្មភាពសាងសង់ជាច្រើនខែ។ អ្នកសារព័ត៌មានព្យាយាមទាក់ទងតាមអ៊ីម៉ែលទៅស្ថានទូតចិននៅប្រទេសប៉ាគីស្ថានដើម្បីសូមការធ្វើអត្ថាធិប្បាយពាក់ព័ន្ធនឹងការវាយប្រហាររបស់ក្រុមភេរវកម្មទៅលើផលប្រយោជន៍របស់ចិននៅថ្ងៃនេះ។ ប៉ុន្តែគ្មានការឆ្លើយតបទេ៕
ប្រភព៖ Reuters
https://www.reuters.com/world/asia-pacific/five-chinese-nationals-killed-suicide-bomb-attack-pakistan-2024-03-26/
ចែករំលែកព័តមាននេះ