ទីក្រុងញូយ៉ក៖ តើលោកណឺតាន់យ៉ាហ៊ូហ៊ានវាយចូលទីក្រុងរ៉ាហ្វាទេបើក្រុមប្រឹក្សាសន្តិសុខចេញសេចក្ដីសម្រេចប៉ុណ្ណេះហើយ? នេះជាសំណួរដ៏ធំមួយបន្ទាប់ពីក្រុមប្រឹក្សាសន្តិសុខអង្គការសហប្រជាជាតិបោះឆ្នោតអនុម័តសំណើឱ្យមានបទឈប់បាញ់នៅតំបន់ហ្កាហ្សា។ នេះជាលើកទី១ចាប់តាំងពីសង្គ្រាមអ៊ីស្រាអែលផ្ទុះឡើងកាលពីចុងខែតុលា ឆ្នាំ២០២៣ ដែលក្រុមប្រឹក្សានេះអាចអនុម័តសេចក្ដីសម្រេច។ កាលពីមុននេះ រាល់ការដាក់សំណើអ្វីមួយត្រូវជាប់គាំងកណ្ដាលទីព្រោះសមាជិកអចិន្ត្រៃយ៍នៃក្រុមប្រឹក្សានេះបោះឆ្នោតជំទាស់។ ជួនកាលចិន និងរុស្ស៊ីបោះឆ្នោតជំទាស់។ ជួនកាលអាមេរិកបោះឆ្នោតជំទាស់។
ជារឿងចម្លែកដែលប្រទេសអាមេរិកធ្លាប់ប្រកាសគាំទ្របទឈប់បាញ់នៅតំបន់ហ្កាហ្សា ប៉ុន្តែដល់ពេលបោះឆ្នោត អាមេរិកមិនលើកដៃគាំទ្រ ហើយក៏មិនជំទាស់ដែរ។ អាមេរិកបោះឆ្នោតអនុបវាទ។ គួរកត់សម្គាល់ថាការបោះឆ្នោតលើកនេះធ្វើឡើង២ថ្ងៃបន្ទាប់ពីប្រទេសអាមេរិកបញ្ជូនសំណើរបស់ខ្លួនទៅក្រុមប្រឹក្សាសន្តិសុខ ហើយត្រូវរុស្ស៊ី និងចិនបោះឆ្នោតវេតូជំទាស់។
ដោយឡែក សំណើដែលទើបតែអនុម័តនេះចង់ផ្ដោតសំខាន់ទៅលើបញ្ហាមនុស្សធម៌។ សំណើនេះអំពាវនាវឱ្យអ៊ីស្រាអែលខិតខំឱ្យអស់ពីចិត្តពីថ្លើមដើម្បីជួយសម្រួលការដឹកជញ្ជូនជំនួយទៅចែកជូនជនស៊ីវិលប៉ាឡេស្ទីន ហើយក៏អំពាវនាវឱ្យក្រុមហាម៉ាស់ និងបក្សពួករបស់ហាម៉ាស់ដោះលែងចំណាប់ខ្មាំងទាំងអស់ជាបន្ទាន់ និងដោយឥតលក្ខខណ្ឌ។
មុនការបោះឆ្នោតនេះ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ បានព្រមានថាបើអាមេរិកបោះឆ្នោតគាំទ្រសំណើនេះ លោកមិនបញ្ជូនគណៈប្រតិភូទៅវ៉ាស៊ីនតោនដើម្បីជជែកគ្នាពីគម្រោងវាយប្រហារចូលទីក្រុងរ៉ាហ្វាទេ។ លោកបៃដិនធ្លាប់ព្រមានថាបើអ៊ីស្រាអែលវាយចូលរ៉ាហ្វា ពួកគេនឹងទទួលរងផលវិបាក។ លោកបៃដិនថ្លែងថាយ៉ាងហោចណាស់ត្រូវឆ្លងកាត់ការយល់ព្រមពីលោកសិន។ ហេតុនេះ លោកណឺតាន់យ៉ាហ៊ូក៏យល់ព្រមបញ្ជូនគណៈប្រតិភូទៅវ៉ាស៊ីនតោន។ ឥឡូវនេះ មិនទាន់បានបញ្ជូនទៅផង ក្រុមប្រឹក្សាសន្តិសុខបោះឆ្នោតស្កាត់ទុកមុនបាត់ទៅហើយ។
សេចក្ដីព្រាងនោះរៀបចំដោយសមាជិកចំនួនដប់នៃក្រុមប្រឹក្សាសន្តិសុខ និងស្នើឡើងដោយប្រទេសម៉ូហ្សំប៊ីក។ កាលពីមុនពេលអនុម័តនោះ ប្រទេសរុស្ស៊ីចង់កែសម្រួលពាក្យពេចន៍មួយចំនួន។ ជាពិសេសពាក្យ «បទឈប់បាញ់ជាអចិន្ត្រៃយ៍» ដែលត្រូវគេដកចេញពីសំណើនោះរុស្ស៊ីចង់យកពាក្យហ្នឹងដាក់បញ្ចូលនៅក្នុងអត្ថបទវិញ។ ប៉ុន្តែផែនការរបស់រុស្ស៊ីមិនបានសម្រេចទេ។
យោងតាមលទ្ធផលបោះឆ្នោត, រដ្ឋជាសមាជិកក្រុមប្រឹក្សាសន្តិសុខចំនួន១៤បោះឆ្នោតគាំទ្រ ខណៈដែលប្រទេសអាមេរិកបោះឆ្នោតអនុបវាទ។ មានន័យថាប្រឆាំងក៏មិនប្រឆាំង គាំទ្រក៏មិនគាំទ្រ។ ជាគោលការណ៍របស់ក្រុមប្រឹក្សាសន្តិសុខ សំណើមួយអាចចេញរួចលុះត្រាតែគោរពទៅតាមលក្ខខណ្ឌ២។ ទី១-ទទួលបានសំឡេងគាំទ្រយ៉ាងតិច៩សំឡេងឡើងទៅ និងទី២-មិនត្រូវមានសំឡេងជំទាស់ពីរដ្ឋណាមួយដែលជាសមាជិកអចិន្ត្រៃយ៍ទាំង៥ទេគឺអាមេរិក, អង់គ្លេស, បារាំង, រុស្ស៊ី និងចិន។
គេមិនដឹងថាតើអ៊ីស្រាអែលមានអារម្មណ៍បែបណានៅពេលសេចក្ដីព្រាងនេះត្រូវក្រុមប្រឹក្សាសន្តិសុខអនុម័តបែបនេះ? តាមដឹងមកថាលោកណឺតាន់យ៉ាហ៊ូព្រមានថានឹងលុបចោលគម្រោងបញ្ជូនគណៈប្រតិភូទៅវ៉ាស៊ីនតោនបើអាមេរិកមិនបោះឆ្នោតជំទាស់នឹងសំណើនេះទេ។ ឥឡូវនេះ លោកណឺតាន់យ៉ាហ៊ូបញ្ជូន ឬមិនបញ្ជូនមនុស្សទៅវ៉ាស៊ីនតោនមិនសំខាន់ទេ។ បើលោកហ៊ានបញ្ជាទ័ពវាយចូលទីក្រុងរ៉ាហ្វានឹងមានរឿងធំជាមួយគ្នាបន្ទាប់ក្រុមប្រឹក្សាសន្តិសុខចេញសេចក្ដីសម្រេចនេះ៕
ប្រភព៖ BBC, The Guardian និង Reuters
https://www.theguardian.com/world/live/2024/mar/25/israel-gaza-live-unrwa-aid-north-gaza-un-security-council-vote-ceasefire-middle-east-latest
https://www.bbc.co.uk/news/world-middle-east-68658415
https://www.reuters.com/world/middle-east/netanyahu-may-cancel-israeli-delegation-us-over-un-gaza-vote-ynet-reports-2024-03-25/
ចែករំលែកព័តមាននេះ