រាជធានីភ្នំពេញ ៖ ក្រោយពីក្រសួងវប្បធម៌ និងវិចិត្រសិល្បៈ នៅថ្ងៃទី២៥ ខែមីនា ឆ្នាំ២០២៤នេះ បានប្រតិកម្ម និងស្នើឲ្យអគ្គនាយកទូរទស្សន៍ហង្សមាស ចាត់វិធានការជាបន្ទាន់…
រាជធានីភ្នំពេញ ៖ ក្រោយពីក្រសួងវប្បធម៌ និងវិចិត្រសិល្បៈ នៅថ្ងៃទី២៥ ខែមីនា ឆ្នាំ២០២៤នេះ បានប្រតិកម្ម និងស្នើឲ្យអគ្គនាយកទូរទស្សន៍ហង្សមាស ចាត់វិធានការជាបន្ទាន់ និងលុបព័ត៌មានមិនពិត ទប់ស្កាត់ចែកចាយបន្ត នឹងត្រូវសុំទោសជាសាធារណៈ ឲ្យបានឆាប់រហ័សបំផុត ពាក់ព័ន្ធករណីផ្សព្វផ្សាយព័ត៌មានមិនពិត និងបង្កផលប៉ះពាល់ធ្ងន់ធ្ងរដល់តថភាពពិត និងវប្បធម៌ប្រពៃណីជាតិ ជុំវិញការអត្ថាធិប្បាយរបស់ពិធីករល្បី លោក មាស រិទ្ធី រួមមក នៅថ្ងៃដដែលនេះ លោក មាស រិទ្ធី ចេញលិខិតសុំអភ័យទោសដល់ក្រសួងវប្បធម៌ និងវិចិត្រសិល្បៈ ។
យោងតាមការផ្សាយផ្ទាល់ នៃកម្មវិធីហង្សមាស Express News ផ្សាយផ្ទាល់ព័ត៌មានហង្សមាសពេលព្រឹក វគ្គទី១ ថ្ងៃទី២៥ ខែមីនា ឆ្នាំ២០២៤ លោក មាស រិទ្ធី បានអត្ថាធិប្បាយថា មានមន្ត្រីក្រសួងវប្បធម៌ប្រាប់លោកពីមូលហេតុ ដែលកម្ពុជាមិនបានធ្វើកម្មវិធីអង្គរសង្ក្រាន្តឆ្នាំនេះ និងឆ្នាំក្រោយៗទៀត ដោយសារមកពីប្រទេសថៃ បានដាក់ពីធីសង្ក្រាន្ត ចូលជាបេតិកភ័ណ្ឌពិភពលោក។ ម្យ៉ាងទៀតខ្លាចបាត់បង់មិត្តភាពរវាងកម្ពុជា និងប្រទេសថៃ ។
ក្រសួងវប្បធម៌ និងវិចិត្រសិល្បៈ បានជម្រាបជូនថា សង្ក្រាន្ត ជាពាក្យសំស្ក្រឹត មានប្រភពមកពីឥណ្ឌា និងមានន័យថា រង្វិលជុំ នៃពេលវេលាពេញមួយឆ្នាំ ហើយពាក្យសង្ក្រាន្ត មាននៅសិលាចារឹកនានា តាមប្រាសាទនៅតំបន់អង្គរ។ យ៉ាងណាក្តី ពិធីសង្ក្រាន្តនេះ បានក្លាយជាប្រពៃណីទំនៀមទម្លាប់ ដែលបានប្រារព្ធរៀបចំដោយប្រទេសមួយចំនួន ដូចជា កម្ពុជា ឡាវ ថៃ ភូមា ជាដើម។ ការចុះបញ្ជីជាបេតិកភណ្ឌអរូបី របស់ប្រទេសមួយ នឹងមិនប៉ះពាល់ដល់ការចុះបញ្ជី និងការប្រារព្ធរបស់បណ្ដាប្រទេសផ្សេងទៀត ទៅតាមប្រពៃណីទំនៀមទម្លាប់រៀងៗនោះឡើយ ។
ផ្ទុយពីតថភាពពិតដូចបានបញ្ជាក់ជូនជាសង្ខេបខាងលើ នាព្រឹកថ្ងៃទី២៥ ខែមីនា ឆ្នាំ២០២៤ នេះ លោក មាស រិទ្ធី បានធ្វើការអត្ថាធិប្បាយ នូវព័ត៌មានមិនត្រឹមត្រូវ ខ្វះចំណេះដឹងលើវិស័យនេះ និងខ្វះការពិគ្រោះយោបល់ជាមួយស្ថាប័នពាក់ព័ន្ធ ថែមទាំងបានយកឈ្មោះក្រសួងវប្បធម៌ និងវិចិត្រសិល្បៈ មកធ្វើជាអំណះអំណាងបន្ថែមទៀត ហើយដែលការអត្ថាធិប្បាយនេះ បង្កផលប៉ះពាល់ធ្ងន់ធ្ងរដល់តម្លៃពិត នៃវប្បធម៌ និងប្រពៃណីទំនៀមទម្លាប់ដ៏ផូរផង់របស់ជាតិ ជាពិសេសបានបង្កឱ្យមានការយល់ច្រឡំពីសាធារណជនទូទៅ ព្រមទាំងភាពរសើប និងភាពជ្រួលច្របល់ក្នុងសង្គម ។
ក្រសួងវប្បធម៌ និងវិចិត្រសិល្បៈ បានផ្ញើលិខិតទៅស្នើសុំទៅលោកឧកញ៉ា អ៊ឹង ឆៃងួន អគ្គនាយកទូរទស្សន៍ហង្សមាស និងរស្មីហង្សមាស HDTV ចាត់វិធានការបន្ទាន់ លុបព័ត៌មានមិនពិតនេះ ទប់ស្កាត់ចែកចាយបន្ត និងត្រូវសុំទោសជាសាធារណៈ ឱ្យបានឆាប់រហ័សបំផុត ។
ក្រសួងវប្បធម៌ និងវិចិត្រសិល្បៈ សូមបញ្ជាក់ថា ក្រុមអ្នកនាំពាក្យរបស់ក្រសួងវប្បធម៌ និងវិចិត្រសិល្បៈ តែមួយគត់ ដែលអាចជូនជាព័ត៌មានជាផ្លូវការតំណាងឱ្យក្រសួង រីឯការពិគ្រោះយោបល់ ឬសាកសួរព័ត៌មានពីបុគ្គលផ្សេង នឹងមិនតំណាងឱ្យមតិយោបល់របស់ក្រសួងវប្បធម៌ និងវិចិត្រសិល្បៈនោះទេ ។
ក្រោយពីមានប្រតិកម្មពីក្រសួងវប្បធម៌ និងវិចិត្រសិល្បៈ ពិធីករព័ត៌មានប្រចាំស្ថានីយទូរទស្សន៍ហង្សមាសគឺលោក មាស រិទ្ធី នៅថ្ងៃចន្ទនេះ បានចេញលិខិតសុំអភ័យទោសដល់រដ្ឋមន្ត្រីក្រសួងវប្បធម៌ និងវិចិត្រសិល្បៈ ។
លោក មាស រិទ្ធី អ្នកអត្ថាធិប្បាយព័ត៌មានទូរទស្សន៍ ហង្សមាស ក្នុងកម្មវិធី «ហង្សមាស Express News » បានសម្តែងការសោកស្តាយ ចំពោះការអត្ថាធិប្បាយ មិនបានគ្រប់ជ្រុងអំពីសង្ក្រាន្តឆ្នាំថ្មី នៅក្នុងកម្មវិធីផ្សាយផ្ទាល់ព័ត៌មានហង្សមាសពេលព្រឹក វគ្គ១ កាលពីថ្ងៃទី២៥ មីនានេះ។ លោកបាទទទួលកំហុស ចំពោះព័ត៌មានពីមន្ត្រីមិនផ្លូវការ គ្មានមូលដ្ឋាន និងមិនបានគ្រប់ជ្រុងជ្រោយ ដែលលោកបានផ្សព្វផ្សាយ ធ្វើអោយមានការភាន់ច្រឡំ ប៉ះពាល់ដល់តម្លៃពិត នៃវប្បធម៌ និងប្រពៃណីទំនៀមទម្លាប់ដ៏ផូរផង់របស់ជាតិ ជាពិសេសបានបង្កឲ្យមានការយល់ច្រឡំពីសាធារណជនទូទៅ។
លោក មាស រិទ្ធី សុំទោសជាសាធរណៈ ចំពោះក្រសួងវប្បធម៌ និងវិចិត្រសិល្បៈ ព្រមទាំងសុំទោសដល់ប្រជាពលរដ្ឋខ្មែរទូទាំងប្រទេស ចំពោះកំហុសឆ្គងដោយអចេតនានេះ។ លោកសុំទទួលយក នូវការកែតម្រូវរបស់ក្រសួងវប្បធម៌ និងវិចិត្រសិល្បៈ តាមការពន្យល់ ដែលមានឯកសារជាប្រវត្តិសាស្ត្រ ៕
ចែករំលែកព័តមាននេះ