រាជធានីភ្នំពេញ ៖ នាយប់ថ្ងៃទី២៥ ខែមីនា ឆ្នាំ២០២៤នេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ…
រាជធានីភ្នំពេញ ៖ នាយប់ថ្ងៃទី២៥ ខែមីនា ឆ្នាំ២០២៤នេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ មានការភ្ញាក់ផ្អើល និងហួសចិត្ត ដែលពិធីករព័ត៌មានប្រចាំស្ថានីយទូរទស្សន៍ហង្សមាស គឺលោក មាស រិទ្ធី បានដកស្រង់សម្ដីរបស់ឯកឧត្ដម យកទៅផ្សាយ ដែលផ្ទុយពីការពិតទាំងស្រុង ជុំវិញការរៀបចំព្រឹត្តិការណ៍អង្គរសង្ក្រាន្តក្នុងឆ្នាំ២០២៤នេះ ។
ឯកឧត្តម ហ៊ុន ម៉ានី បានរៀបរាប់នៅលើបណ្ដាញសង្គមហ្វេសប៊ុកយ៉ាងដូច្នេះថា «ខ្ញុំមានការភ្ញាក់ផ្អើលចំពោះអ្វីដែលបងប្រុស មាស រិទ្ធី បានស្រង់ហើយផ្សព្វផ្សាយថា ខ្ញុំបានប្រើពាក្យថា “ខ្ជិល” ក្នុងការឆ្លើយតបទៅនឹងសំណួរ ដែលសួរមកខ្ញុំថាតើរៀបចំអង្គរសង្ក្រាន្តទេឆ្នាំនេះ។ ខ្ញុំបានស្តាប់កិច្ចសម្ភាសន៍របស់គាត់ និងហួសចិត្តដែរថា តើបង មាស រិទ្ធី មានបំណងយ៉ាងណាសម្រាប់ខ្ញុំ តើគាត់មិនបានឮចម្លើយរបស់ខ្ញុំពេលយប់នោះ ឬចង់មានចេតនាប្រើពាក្យបែបនេះ ក្នុងបំណងទាញចំណាប់អារម្មណ៍ពីមហាជន» ។
តាមសំណេររបស់ឯកឧត្ដម ហ៊ុន ម៉ានី ចង់យកឱកាសនេះបញ្ជាក់ថា លោក មាស រិទ្ធី បានសួរខ្ញុំ មែនថា “រៀបចំអង្គរសង្ក្រាន្តឆ្នាំនេះ” ហើយខ្ញុំក៏បានឆ្លើយតបថា “ទុកឱ្យរាជធានីខេត្តគេរៀបចំឆ្នាំនេះ”។ អ្វីដែលខ្ញុំហួសចិត្តពីករណីនេះ គឺ ៖
ទី១ ខ្ញុំគិតថា ដោយសារការរាប់អានគ្នា គាត់សួរខ្ញុំ ប្រហែលជាការសួរនាំធម្មតាមិនមែនជាកិច្ចសម្ភាសន៍ ដើម្បីយកចម្លើយទៅផ្សព្វផ្សាយជាសាធារណៈនោះទេ អ៊ីចឹងបានខ្ញុំឆ្លើយតបដូច្នេះទៅគាត់ (និយាយលេងក្នុងការរាប់អានគ្នា) នេះក៏ជាមេរៀនសម្រាប់ខ្ញុំ ទៅថ្ងៃក្រោយដែរ មិនគួរដោយសារការរាប់អាន ទៅជាការបង្កើតបញ្ហាមួយដូច្នេះទេ ប្រហែលត្រូវគិតគូរច្បាស់លាស់ជាមុន សម្រាប់មនុស្ស ដែលហៅថា រាប់អានគ្នា ។
ទី២ មិននឹកស្មានថាពាក្យ “ឱ្យរាជធានីខេត្តគេរៀបចំទៅជាពាក្យថា “ខ្ជិលរៀបចំ” វិញនោះទេ ។
ណ្ហើយចុះ ខ្ញុំជាមនុស្សម្នាក់ ក្នុងចំណោមមនុស្សមួយចំនួនតូច ដែលបានដឹកនាំរៀបចំតាំងពីមិនមានការស្គាល់ “អង្គរសង្ក្រាន្ត” មកដល់មានការស្គាល់ អញ្ជឹងប្រហែលពាក្យថា “ខ្ជិល” រៀបចំអង្គរសង្ក្រាន្តមិនត្រូវនោះទេ បើខ្ជិលប្រហែលមិនបានរៀបចំខួប១០ឆ្នាំ នៅអង្គរសង្ក្រាន្តនោះទេ ។
សូមបញ្ចាក់ដែរថា កាលពីព្រឹកថ្ងៃទី២៥ ខែមីនា ពិធីករព័ត៌មានលោក មាស រិទ្ធី បានធ្វើអត្ថាធិប្បាយថា ឆ្នាំថ្មីនេះ កម្ពុជាមិនរៀបចំព្រឹត្តិការណ៍អង្គរសង្ក្រាន្តនោះទេ។ ដោយលោក មាស រិទ្ធី អះអាងថា លោកបានសួរមកកាន់ឯកឧត្ដម ហ៊ុន ម៉ានី ថាហេតុអ្វីមិនធ្វើអង្គរសង្ក្រាន្ត ហើយឯកឧត្ដម ហ៊ុន ម៉ានី ឆ្លើយតបថា មូលហេតុ ដែលកម្ពុជាមិនប្រារព្ធពិធីអង្គរសង្ក្រាន្តព្រោះតែខ្ជិលធ្វើ[…] ៕
ចែករំលែកព័តមាននេះ