ទីក្រុងញូយ៉ក៖ នៅទីបំផុត សេចក្ដីព្រាងច្បាប់មួយដែលស្នើដោយប្រទេសអាមេរិកដើម្បីដាក់ជូនក្រុមប្រឹក្សាសន្តិសុខអង្គការសហប្រជាជាតិបោះអនុម័តអនុម័តត្រូវប្រទេសចិន និងរុស្ស៊ីបោះឆ្នោតជំទាស់បាត់ទៅហើយ។ សេចក្ដីព្រាងនោះអំពាវនាវឱ្យមានបទឈប់បាញ់ជាអចិន្ត្រៃយ៍នៅតំបន់ហ្កាហ្សា។ ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិថ្លែងថាសេចក្ដីព្រាងនោះមានចរិតនយោបាយច្រើនជាងគិតគូរអំពីសេចក្ដីសុខរបស់ប្រជាជនប៉ាឡេស្ទីន។
រុស្ស៊ីថ្លែងថាមូលហេតុដែលខ្លួនមិនបោះឆ្នោតគាំទ្រព្រោះសេចក្ដីព្រាងនោះបន្តបើកភ្លើងខៀវឱ្យទាហានអ៊ីស្រាអែលវាយប្រហារចូលទីក្រុងរ៉ាហ្វា។ ការដាក់សំណើនេះទៅក្រុមប្រឹក្សាសន្តិសុខស្របពេលដែលអាមេរិកដាក់សម្ពាធអ៊ីស្រាអែលកាន់តែខ្លាំងដើម្បីគិតគូរអំពីស្ថានភាពលំបាកនៅតំបន់ហ្កាហ្សា។ រដ្ឋមន្ត្រីការបរទេសអាមេរិកដែលកំពុងធ្វើនយោបាយការទូតនៅមជ្ឈិមបូព៌ាចង់ផ្ដោតសំខាន់ទៅលើការផ្ដល់ជំនួយមនុស្សធម៌ និងទប់ស្កាត់មិនឱ្យអ៊ីស្រាអែលវាយចូលទីក្រុងរ៉ាហ្វា។
នៅក្នុងសំណើរបស់អាមេរិកនោះ អាមេរិកទាមទារឱ្យមានបទឈប់បាញ់ឱ្យខាងតែបានដើម្បីទី១-ការពារជនស៊ីវិល និងទី២-ពន្លឿន និងបង្កើនការផ្ដល់ជំនួយមនុស្សធម៌សម្រាប់ជនស៊ីវិលប៉ាឡេស្ទីនជាង២លាននាក់ដែលប្រឈមនឹងគ្រោះទុរភិក្ស។ គេកត់សម្គាល់ថាសំណើមុនៗមានភ្ជាប់បទឈប់បាញ់ជាមួយនឹងការដោះលែងចំណាប់ខ្មាំង។ ប៉ុន្តែសំណើនេះមិននិយាយពីការដោះលែងចំណាប់ខ្មាំងដោយផ្ទាល់ទេ។ សំណើនេះគាំទ្រកិច្ចខិតខំប្រឹងប្រែងផ្នែកការទូតដើម្បីឱ្យមានបទឈប់បាញ់។
មុនការបោះឆ្នោតនេះ អាមេរិកថ្លែងថាខ្លួនបានធ្វើការយ៉ាងដុតដៃដុតជើងជាមួយសមាជិកក្រុមប្រឹក្សាសន្តិសុខដើម្បីឱ្យមានបទឈប់បាញ់នៅតំបន់ហ្កាហ្សា និងដើម្បីដោះលែងចំណាប់ខ្មាំង។ អ៊ីស្រាអែលថ្លែងថាសព្វថ្ងៃនេះនៅសល់ចំណាប់ខ្មាំង១៣០នាក់ទៀតនៅក្នុងដៃរបស់ក្រុមហាម៉ាស់។ ចំណាប់ខ្មាំង៣៤នាក់បានស្លាប់ហើយ។ អាមេរិកដាក់ចេញសំណើនេះដើម្បីបញ្ជាក់គោលជំហររបស់ខ្លួនចំពោះអ៊ីស្រាអែល។
កាលពីមុននេះ ប្រទេសដទៃទៀតក៏ធ្លាប់ស្នើសុំឱ្យមានបទឈប់បាញ់ផងដែរ។ ប៉ុន្តែត្រូវអាមេរិកបោះឆ្នោតជំទាស់។ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ ធ្លាប់និយាយជាច្រើនដងហើយថាបទឈប់បាញ់ជាអ្វីដែលក្រុមហាម៉ាសចង់បានបំផុត។ លោកថ្លែងថាបើអ៊ីស្រាអែលឈប់បាញ់មានន័យស្មើនឹងប្រគល់ជ័យជម្នះឱ្យក្រុមហាម៉ាស់។ ឥឡូវនេះ ប្រគល់ជ័យជម្នះទៅឱ្យអ្នកណាមិនសំខាន់ទេ។ បញ្ហាសំខាន់គឺជនស៊ីវិលកំពុងតែអត់អាហារជាបណ្ដើរៗ។ អ៊ីស្រាអែលរងសម្ពាធយ៉ាងខ្លាំង។ សូម្បីតែអាមេរិកដែលជាមិត្តដែកថែបរបស់អ៊ីស្រាអែលក៏បង្ខំឱ្យអ៊ីស្រាអែលបើកច្រកព្រំដែនដើម្បីដឹកជញ្ជូនជំនួយ។
នៅក្នុងការបោះឆ្នោតអនុម័តសំណើនេះ ប្រទេសចំនួន១១បោះឆ្នោតគាំទ្រ ប្រទេសចំនួនបីបោះឆ្នោតជំទាស់ និងប្រទេសចំនួនមួយបោះឆ្នោតអនុបវាទ។ ដូច្នេះ សំណើនេះត្រូវជាប់គាំងត្រឹមហ្នឹងព្រោះចិន និងរុស្ស៊ីដែលជាសមាជិកអចិន្ត្រៃយ៍បោះឆ្នោតជំទាស់។ ជាគោលការណ៍របស់ក្រុមប្រឹក្សាសន្តិសុខ សំណើមួយអាចចេញរួចលុះត្រាតែមាន២លក្ខខណ្ឌ។ ទី១-ទទួលបានសំឡេងគាំទ្រយ៉ាងតិច៩នៅក្នុងចំណោមសមាជិកទាំង១៥ប្រទេស និងទី២-គ្មានសំឡេងជំទាស់ពីសមាជិកអចិន្ត្រៃយ៍។
តាំងពីមុនពេលបោះឆ្នោត, ឯកអគ្គរដ្ឋទូតរុស្ស៊ីបញ្ជាក់ថារដ្ឋាភិបាលរបស់ខ្លួនគាំទ្របទឈប់បាញ់។ ប៉ុន្តែបទឈប់បាញ់តាមបែបអាមេរិកមិនត្រឹមត្រូវទេ។ គាត់យល់ថារដ្ឋមន្ត្រីការបរទេសអាមេរិក និងឯកអគ្គរដ្ឋទូតអាមេរិកប្រចាំអង្គការសហប្រជាជាតិកំពុងធ្វើឱ្យសហគមន៍អន្តរជាតិយល់ច្រឡំដោយសារយុទ្ធសាស្ត្រ «ជន្លឆ្វេង វាយស្ដាំ»។ គាត់ចោទប្រកាន់ថានេះជាការកេងចំណេញនយោបាយច្រើនជាង៕
ប្រភព៖ Associated Press និង NBC news
https://apnews.com/article/united-nations-us-vote-gaza-ceasefire-resolution-f6453803b3eacc9fbaa2ce5a025e2a94
https://www.nbcnews.com/news/world/un-security-council-cease-fire-resolution-us-rcna144556
ចែករំលែកព័តមាននេះ