ទីក្រុងប៊ែឡាំង៖ ក្រុមប្រទេសគាំទ្រអ៊ុយក្រែននឹងប្រើប្រាស់ទ្រព្យសម្បត្តិរឹបអូសបានពីរុស្ស៊ីដើម្បីទិញអាវុធឱ្យអ៊ុយក្រែន។ នេះជាប្រសាសន៍អធិការបតីអាល្លឺម៉ង់ លោអូឡាហ្វ សូល ក្រោយកិច្ចជំនួបពិសេសជាមួយលោកម៉ាក្រុងដើម្បីបង្ហាញការរួមកម្លាំងគ្នាឡើងវិញ។ លោកទាំងពីរធ្លាប់មានគោលជំហរមិនស្របគ្នាបន្ទាប់ពីលោកម៉ាក្រុងនិយាយអំពីផែនការបញ្ជូនទ័ពទៅអ៊ុយក្រែន ហើយត្រូវលោកសូលប្រកាសបដិសេធ។
លោកសូល, លោកម៉ាក្រុង និងលោកដូណាល់ ថាស់ (Donal Tusk)នាយករដ្ឋមន្ត្រីប៉ូឡូញបញ្ជាក់ឡើងវិញថាខ្លួននៅតែជួយអ៊ុយក្រែន, ខណៈដែលអ៊ុយក្រែនប្រើប្រាស់គ្រាប់រំសេវយ៉ាងសន្សំសំចៃ។ ចំណែករុស្ស៊ីដឹងចំណុចខ្សោយនេះវាយប្រហារឥតបន្ធូរដៃ។ សំណើរបស់លោកបៃដឹនដើម្បីជួយអ៊ុយក្រែនត្រូវនៅទើរត្រឹមសភា។ រីឯលោកបៃដឹនក៏ខ្វាយខ្វល់ខ្លាំងចំពោះបញ្ហាអ៊ីស្រាអែលជាងបញ្ហាអ៊ុយក្រែនទៅទៀត។ ម៉្លោះហើយ មានតែសហភាពអឺរ៉ុបនេះហើយជាអ្នកជំហរជួយអ៊ុយក្រែន។
លោកសូលថ្លែងថាថ្នាក់ដឹកនាំដែលប្រជុំគ្នានៅប៊ែឡាំងឯកភាពគ្នាថាត្រូវតែទិញអាវុធឱ្យអ៊ុយក្រែនថែមទៀត និងពន្លឿនការផលិតគ្រឿងបរិក្ខារយោធា។ ពេលខ្លះអាចដំឡើងរោងចក្រនៅអ៊ុយក្រែនតែម្ដង។ លោកថាយើងនឹងប្រើប្រាស់ទ្រព្យសម្បត្តិរុស្ស៊ីដែលផ្អឹបទុកដើម្បីទិញអាវុធ។ ចំណាត់ការនេះធ្វើឡើងបន្ទាប់ពីគណៈកម្មការអឺរ៉ុបស្នើឱ្យអឺរ៉ុបពិចារណាប្រើប្រាស់ទ្រព្យសម្បត្តិទាំងនោះ។ ប៉ុន្មានថ្ងៃខាងមុខនេះ គេរំពឹងថាគណៈកម្មការអឺរ៉ុបនឹងរៀបចំសំណើជាលាយលក្ខណ៍អក្សរតែម្ដង។
ប្រទេសសមាជិកអឺរ៉ុបខ្លះដូចជាហុងគ្រីហាក់ដូចជាមិនទាន់ឯកភាពនឹងគំនិតនេះនៅឡើយទេ។ នេះបើយោងតាមក្រុមអ្នកការទូតនៅទីក្រុងប្រ៊ុចសែល។ ប៉ុន្តែលោកសូលមានទំនុកចិត្តថាសមាជិកសហភាពអឺរ៉ុបនឹងបោះឆ្នោតគាំទ្រសំណើនេះ។
ការខ្វែងទស្សនៈរវាងលោកសូល និងលោកម៉ាក្រុង
កិច្ចជំនួបត្រីភាគីរវាងថ្នាក់ដឹកនាំអាល្លឺម៉ង បារាំង និងប៉ូឡូញនៅទីក្រុងប៊ែឡាំងធ្វើឡើងបន្ទាប់ពីមានការខ្វែងទស្សនៈគ្នាអស់ជាច្រើនសប្ដាហ៍។ ជាពិសេស ខ្វែងគ្នារវាងលោកម៉ាក្រុង និងលោកសូលក្នុងនាមជាមេដឹកនាំប្រទេសជំហរធំជាងគេរបស់សហភាពអឺរ៉ុប។ បញ្ហានេះមិនសាមញ្ញពេកទេមែនទែនទៅ ព្រោះធ្វើឱ្យកក្រើករដ្ឋាភិបាលទីក្រុងកៀវ និងទ្វីបអឺរ៉ុបទាំងមូល។
កិច្ចប្រជុំកំពូលនៅទីក្រុងប៉ារីសកាលពីខែកុម្ភៈមានគោលដៅពន្លឿនការផ្ដល់ជំនួយសម្រាប់អ៊ុយក្រែនដើម្បីតស៊ូនៅក្នុងសង្គ្រាម។ កាលនោះ លោកម៉ាក្រុងបានដាក់ចេញគ្រប់លទ្ធភាពដែលមាននៅក្នុងដៃដើម្បីកុំឱ្យរុស្ស៊ីមានជោគជ័យនៅក្នុងសង្គ្រាម។ លោកថែមទាំងមានគម្រោងបញ្ជូនកងទ័ពជើងគោកទៅអ៊ុយក្រែនថែមទៀតនាពេលអនាគត។ ចំណុចនេះហើយដែលធ្វើឱ្យលោកសូលចេញមកបដិសេធ។ លោកថាតាំងពីដំបូងដៃ ក្រុមសម្ព័ន្ធមិត្តបានឯកភាពគ្នាថាមិនធ្វើបែបនេះទេ។
ទីប្រឹក្សាលោកហ្សេឡិនស្គីថ្លែងថាការដែលអឺរ៉ុបនៅរសេមរសាម និងមិនសូវសហការគ្នាបានល្អនេះជាផលវិបាកដ៏ធ្ងន់ធ្ងរ (សម្រាប់អ៊ុយក្រែន)។ ទីប្រឹក្សារូបនេះថ្លែងថារុស្ស៊ីកំពុងបានដៃ និងមានជំនឿថាខ្លួនអាចនឹងចាត់ការអ៊ុយក្រែនបានកាន់តែងាយស្រួល។ រីឯអ៊ុយក្រែនសព្វថ្ងៃនេះខ្វះខាតសព្វគ្រប់។ ជាពិសេសគ្រាប់រំសេវ។ ទឹកដីមួយចំនួនដែលអ៊ុយក្រែនខំវាយដណ្ដើមពីរុស្ស៊ីឥឡូវនេះរបូតពីដៃអ៊ុយក្រែនវិញជាបណ្ដើរៗ។ ទោះជាយ៉ាងណាក្ដី នាយករដ្ឋមន្ត្រីប៉ូឡូញយល់ថាកិច្ចជំនួបលើកនេះអាចលុបបំបាត់រាល់ពាក្យចចាមអារ៉ាមដែលមានចេតនាទុច្ចរិតនិយាយបំផ្លើស (exaggerate)ថាអឺរ៉ុបបែកបាក់គ្នា៕
ប្រភព៖ Reuters
https://www.reuters.com/world/europe/scholz-macron-tusk-seek-bridge-european-divisions-ukraine-2024-03-15/
ចែករំលែកព័តមាននេះ