រាជធានីភ្នំពេញ ៖ បុរសម្នាក់ បានបើករថយន្តមួយគ្រឿង មកដកប្រាក់នៅទូម៉ាស៊ីនអេធីអឹម (ATM) មួយកន្លែង ដោយចុះពីលើរថយន្ត ចូលទៅបើកប្រាក់ ហើយមិនបានពន្លត់ម៉ាស៊ីនរថយន្ត…
រាជធានីភ្នំពេញ ៖ បុរសម្នាក់ បានបើករថយន្តមួយគ្រឿង មកដកប្រាក់នៅទូម៉ាស៊ីនអេធីអឹម (ATM) មួយកន្លែង ដោយចុះពីលើរថយន្ត ចូលទៅបើកប្រាក់ ហើយមិនបានពន្លត់ម៉ាស៊ីនរថយន្ត ភ្លេចខ្លួនមួយភ្លែត ក៏ត្រូវជនសង្ស័យម្នាក់ បានឡើងរថយន្តនោះ បើកយកចេញទៅភ្លាមៗបាត់ស្រមោលតែម្តង ទើបបង្កការភ្ញាក់ផ្អើលកាលពីវេលាម៉ោង០៧និង១៥នាទីយប់ថ្ងៃទី១៤ ខែមីនា ឆ្នាំ២០២៤ នៅចំណុចភូមិ០១ សង្កាត់វត្តភ្នំ ខណ្ឌដូនពេញ ។
ក្រោយកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលវត្តភ្នំ ដើម្បីឱ្យសមត្ថកិច្ចជួយអន្តរាគមន៍ ស្វែងរករថយន្តគាត់ត្រឡប់មកវិញ។ រថយន្តម៉ាក់ Mazda CX3 ពណ៌ស ពាក់ស្លាកលេខ ភ្នំពេញ 2BU-1606 ស៊េរីឆ្នាំ២០២៤ ។
ដោយអនុវត្តតាមបញ្ជារបស់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី១៥ ខែមីនា ឆ្នាំ២០២៤ កម្លាំងជំនាញ នៃអធិការដ្ឋាននគរបាលខណ្ឌដូនពេញ ដឹកនាំដោយលោកវរសេនីយ៍ត្រី ម៉ៅ ចាន់ថុន អធិការរងទទួលការងារនគរបាលយុត្តិធម៌ សហការជាមួយកម្លាំងអធិការដ្ឋាននគរបាលស្រុកភ្នំស្រួច ខេត្តកំពង់ស្ពឺ បានធ្វើការស្រាវជ្រាវ ឈានដល់ឃាត់ខ្លួនជនសង្ស័យម្នាក់ ពាក់ព័ន្ធនឹងករណីលួចយករថយន្តម៉ាក់ Mazda CX3 ១គ្រឿងដូចខាងលើ ។
ជនសង្ស័យដែលត្រូវឃាត់ខ្លួនមានឈ្មោះ ផល ណាន ភេទប្រុស ទីលំនៅបច្ចុប្បន្ននៅភូមិព្រះខែ ឃុំដំបូករូង ស្រុកភ្នំស្រួច ខេត្តកំពង់ស្ពឺ ។
ចំណែកឯ រថយន្តត្រូវបានសមត្ថកិច្ចប្រគល់ជូនម្ចាស់រថយន្តវិញ តាមការស្នើសុំ ។ បច្ចុប្បន្នជនសង្ស័យ កំពុងឃាត់ខ្លួនជាបណ្តោះអាសន្ន ដើម្បីចាត់ការតាមនីតិវិធី ៕
ចែករំលែកព័តមាននេះ