លោកម៉ាក្រុងពន្លះពួកបស្ចិមប្រទេសឡើងបោរមុខដោយសារពួកគេខ្លាចរុស្ស៊ីជ្រុលពេក។ គ្រាន់តែវិមានក្រឹមឡាំងស្រែកកម្លាៗមួយម៉ាត់ពីរម៉ាត់ ឯងរត់បាតជើងសព្រាត។ កាលពីខែកុម្ភៈ ម៉ូស្គូព្រមានផ្ទុះសង្គ្រាមជាមួយណាតូបើហ៊ានបញ្ជូនទ័ពទៅអ៊ុយក្រែន។ ស្រាប់តែអាមេរិក និងប្រទេសអឺរ៉ុបខ្លះចេញមកប្រកែកឡើងញ័រមាត់ថាខ្លួនគ្មានគម្រោងធ្វើបែបនេះទេ។
ទីក្រុងប៉ារីស៖ ប្រធានាធិបតីបារាំង លោកម៉ាក្រុង ព្រមានក្រុមលោកខាងលិចថាបើពួកគេនៅតែបង្ហាញភាពកម្សោយរបស់ខ្លួនឱ្យរដ្ឋាភិបាលទីក្រុងម៉ូស្គូបានឃើញគឺចប់ហើយ។ ជោគវាសនាអនាគតរបស់អ៊ុយក្រែន និងលោកខាងលិចមិនដឹងទៅជាយ៉ាងណាទេ។ គ្រាន់តែលោកនិយាយថាអាចនឹងបញ្ជូនទ័ពទៅអ៊ុយក្រែន ហើយក្រោយមក ម៉ូស្គូព្រមានផ្ទុះសង្គ្រាមជាមួយណាតូ ស្រាប់តែបស្ចិមប្រទេសនាំគ្នាក្រាបអស់រលីង។ ទាំងអាមេរិក, អាល្លឺម៉ង់ និងប្រទេសដទៃទៀតចេញមកបញ្ជាក់ថាខ្លួនគ្មានគម្រោងបញ្ជូនទ័ពទៅអ៊ុយក្រែនទេ។
លោកម៉ាក្រុងបង្ហាញចរិតមិនចាញ់ច្រាបរុស្ស៊ីទេ។ លោកប្រើសម្ដីធ្ងន់នៅថ្ងៃនេះថារឿងបញ្ជូនទ័ពទៅអ៊ុយក្រែនលោកមិនដកថយជាដាច់ខាត ទោះបីអស់ប៉ុន្មានក៏អស់ទៅ។ គ្រាន់តែថាសម្រាប់ពេលនេះ លោកគ្មានការចាំបាច់ដែលត្រូវបញ្ជូនទ័ពទៅទេ។ នៅក្នុងបទសម្ភាសជាមួយទូរទស្សន៍បារាំង លោកម៉ាក្រុងត្រូវគេសួរថាតើលោកមានគម្រោងបញ្ជូនទ័ពទៅអ៊ុយក្រែនទេ? លោកម៉ាក្រុងឆ្លើយថាសម្រាប់ពេលនេះយើងមិនទាន់ឈានដល់ថ្នាក់ហ្នឹងទេ។ ប៉ុន្តែទៅថ្ងៃមុខអាច។
លោកម៉ាក្រុងក្រៅជាប្រធានាធិបតីបារាំង លោកក៏ជាអគ្គបញ្ជាការកងទ័ពផងដែរ។ លោកមិនបានបញ្ជាក់ថាពេលណាទើបរដ្ឋាភិបាលបារាំងបញ្ជូនទ័ពទៅអ៊ុយក្រែនទេ។ លោកថារឿងបញ្ជូនទ័ព ឬមិនបញ្ជូនចាំមើលជំហររបស់ទីក្រុងម៉ូស្គូសិន។ ប្រទេសបារាំងនឹងមិនបើកការវាយប្រហារចេញពីទឹកដីអ៊ុយក្រែនចូលទឹកដីរុស្ស៊ីទេ។ ប៉ុន្តែលោកបញ្ជាក់ថាយើងមិនត្រូវបង្ហាញភាពកម្សោយ ឬកំសាកញីរបស់យើងទាល់តែសោះ បើយើងពិតជាចង់ឃើញប្រទេសអ៊ុយក្រែនមានសន្តិភាព។
លោកម៉ាក្រុងចាត់ទុកសង្គ្រាមរវាងរុស្ស៊ី និងអ៊ុយក្រែនជាសង្គ្រាមកំណត់ជោគវាសនាអនាគតនៃភាពរស់រានមានជីវិតរបស់ប្រទេសបារាំង និងទ្វីបអឺរ៉ុប។ លោកចង់មានន័យថាសង្គ្រាមនេះមិនអាចលេងសើច និងមើលស្រាលបានទេ។ ស្រួលមិនស្រួល ទ្វីបអឺរ៉ុបអាចនឹងរលាយបាត់រូបពីលើផែនទីពិភពលោក (Russia-Ukraine war as “existential” to France and Europe)។
ឧបមាថាទៅថ្ងៃមុខ សង្គ្រាមនេះរីករាលដាលទៅទ្វីបអឺរ៉ុប លោកម៉ាក្រុងយល់ថារុស្ស៊ីជាអ្នកជ្រើសរើសផ្លូវនេះ ហើយរុស្ស៊ីត្រូវតែទទួលខុសត្រូវទាំងស្រុង។ ប៉ុន្តែនៅពេលសង្គ្រាមមិនទាន់ផ្ទុះឡើងផង យើងបង្ហាញចរិតកំសាកញីបាត់ទៅហើយ។ លោកយល់ថាធ្វើបែបនេះមានន័យស្មើនឹងចុះចាញ់មុនពេលប្រយុទ្ធ។ លោកនឹងមិនដើរតាមសេណារីយោនេះជាដាច់ខាត។
សូមរំលឹកថាកាលពីខែកុម្ភៈ លោកម៉ាក្រុងហាក់ដូចជានៅតែម្នាក់ឯងនៅពេលអាមេរិក និងពួកអឺរ៉ុបចេញមកប្រកែកព្រមៗគ្នាថាខ្លួនគ្មានគម្រោងបញ្ជូនទ័ពទៅអ៊ុយក្រែន។ កាលនោះ រុស្ស៊ីប្រើពាក្យសម្ដីផ្លែផ្កា និងលែបខាយថាកុំបញ្ជូនទ័ពទៅអ៊ុយក្រែនប្រយ័ត្នមានជោគវាសនាដូចអធិរាជណាប៉ូឡេអុងកាលពីឆ្នាំ១៨០០ប្លាយ។ គាត់នាំទ័ពជាងកន្លះលាននាក់ទៅស្លាប់គរជើងគ្នានៅលើទឹកដីរុស្ស៊ី រកតែសពទាហានយកមកធ្វើបុណ្យឱ្យបានត្រឹមត្រូវមិនបានផង។
កាលនោះ អធិការបតីអាល្លឺម៉ង់ លោកអូឡាហ្វ សូល ហាក់ដូចជាមានគោលជំហរផ្ទុយពីលោកម៉ាក្រុង។ លោកសូលថាពួកសម្ព័ន្ធមិត្តបានឯកភាពតាំងពីដំបូងដៃថាមិនបញ្ជូនទ័ពជើងគោកទៅអ៊ុយក្រែន។ កាលពីថ្ងៃពុធសប្ដាហ៍នេះ លោកសូលបញ្ជាក់ថាគ្មានការប្រេះឆាគ្នារវាងបារាំង និងអាល្លឺម៉ង់ទេ។ បារាំង និងអាល្លឺម៉ង់ជាសសរស្ដម្ភធំជាងគេ និងជាអ្នកជំហរធំជាងគេនៅសហភាពអឺរ៉ុប។ លោកម៉ាក្រុងចង់ធ្វើយ៉ាងណាធានាថារុស្ស៊ីមិនអាចមានជ័យជម្នះជាដាច់ខាតនៅក្នុងសង្គ្រាមអ៊ុយក្រែន៕ ប្រភព៖ Associated Presshttps://apnews.com/article/france-macron-ukraine-troops-caa788d2455dafb06dd87f79c4afe06f
ចែករំលែកព័តមាននេះ