និន្នាការថ្មី គឺស្ត្រីចូលក្លឹបហាត់ប្រាណច្រើនជាងបុរស ដើម្បីធ្វើយ៉ាងណាឱ្យរាងស្អាត តាមរយៈ វិធីធ្វើលំហាត់ប្រាណនានា ដែលអាចធ្វើចង្កេះតូច ត្រគាកធំ ដើមទ្រូងពើង ដែលជាក្តីប្រាថ្នា សម្រាប់នារីមួយចំនួន ដែលចង់បានរាងកាយស្រលូននោះ។
ស្ត្រីខ្លះក៏មានមោទនភាពបង្ហោះរូបហាត់ប្រាណ និងរាងស្រលូនរបស់ខ្លួនដើម្បីបង្ហាញមិត្តភក្តិ នៅក្នុងបណ្តាញសង្គមផងដែរ។ នារីចួលក្លឹបហាត់ប្រាណច្រើនជាងបុរស មិនមែនមានន័យថា បុរសមិនហាត់ប្រាណនោះឡើយ ។ ត្រឹមថែរក្សាសុខភាពបុរសមានវិធីហាត់ប្រាណជាច្រើនដោយមិន បាច់ចូលក្លឹប ដូចជាជិះកង់ ដើរវាយសី លេងប៉េងប៉ុង ជាដើម ។ ប៉ុន្តែដើម្បីបានរាងស្អាត ដែលជាក្តីប្រាថ្នារបស់នារីមួយចំនួននោះ គេមិនអាចដើរ ឬលេងកីឡាបែបស្រាលៗ ទទួលបានផលបែបនោះឡើយ។
ដើម្បីបានរាងស្អាត គេមានក្បូនខ្នាតហាត់ប្រាណ។ ហាត់ដើម្បីស្រកសាច់កន្លែងនេះ គេត្រូវធ្វើបែបនេះ ហាត់ដើម្បីឡើងសាច់នៅកន្លែងនោះ គឺគេត្រូវបែបនោះជាដើម។ ការចង់បាន រាងស្អាតតម្រូវឱ្យមានការព្យាយាម ហាត់ប្រាណតាមក្បួន មានគ្រូបង្វឹកត្រឹមត្រូវ ហាត់ទៀង ទាត់ រួមទាំងការតមអាហារ ឬមានក្រិតក្រមលើការហូបចុក។
ដើម្បីទទួលបានរាងកាយសមសួនដែលជាទីគយគន់របស់អ្នកផងនោះ គេត្រូវ ចំណាយ ពេលជាច្រើនខែ ជាច្រើនថ្ងៃនៅក្នុងការហាត់ប្រាណ។ ដូច្នេះគេសង្កេតឃើញថា នារីដែល ស្រឡាញ់សុខ ភាពនិងរាងកាយស្អាត ចេញចូលក្លឹបហាត់ប្រាណច្រើនជាងបុរស។ លើកលែងតែអ្នកស្រឡាញ់សាចដុំធំៗ រាងកាយមាំមួននោះទេ ដែលពួកគាត់ក៏ចេញ ចូលក្លឹបហាត់ប្រាណញឹកញាប់ដែរ។
ទាំងបុរសស្រឡាញ់សាច់ដុំ និងនារីស្រឡាញ់រាងស្អាត ពួកគាត់ ត្រូវធ្វើលំហាត់ប្រាណ ធ្ងន់ៗក្នុងមួយថ្ងៃៗ។ ពោលពួកគាត់ចំណាយពេលច្រើនម៉ោងនៅក្នុង ក្លឹបហាត់ប្រាណ ក្នុងមួយថ្ងៃៗ ដើម្បីរាងកាយស្អាត ស្រស់សោភា សុខភាពបរិបូណ៌។
នារីដែលទទួលបានផលពីការហាត់ប្រាណ មិនកំណាញ់នៅក្នុងការចែកចាយរូបភាព រូបរាងដ៏ស្រលួនរបស់ខ្លួននៅលើបណ្តាញសង្គមនោះទេ។ មិនថា នៅលើ Facebook មិនថា TikTok នារី ដែលមានរាងកាយសមសួនជាច្រើន បានចែករំលែក ពី សកម្មភាព ហាត់ប្រាណ ឬការដើរបង្អួតរាងរបស់ខ្លួន ឱ្យអ្នកប្រើប្រាស់បណ្តាញសង្គមបានមើល។
ទូទៅនារីស្អាតៗ នៅលើបណ្តាញមានមិត្តភ័ក្តិច្រើន មានអ្នកចូលចិត្ត អ្នកតាមដានក្នុង បណ្តាញសង្គមច្រើន។ ពេលខ្លះនារីស្រស់សោភាអាចប្រើប្រាស់សម្រស់ដ៏ទាក់ទាញរបស់ខ្លួន ដើម្បីប្រកបអាជីវកម្មជំនួញអនឡាញផងដែរ។ ត្បិតអីការលក់ដូរ ប្រកបអាជីវកម្ម នៅលើ ប្រព័ន្ធអនឡាញ បានផលគឺការទាក់ទាញមានគេចូលចិត្តមើល ចូលចិត្តតាមដាន ខ្លួននេះឯង៕ ដោយ៖ សា រ៉ាន់
ចែករំលែកព័តមាននេះ