បំណុលជាប្រធានបទរសើប ប៉ុន្តែយើងត្រូវតែយល់អោយច្បាស់អំពីបំណុលនេះទាំងនៅក្នុងប្រទេសកម្ពុជាក៏ដូចជាពិភពលោក ។ នៅក្នុងអត្ថបទនេះ យើងនឹងពិនិត្យមើលស្ថានភាពបំណុលពិភពលោក ហើយបន្តមកទៀត គឺស្ថានភាពបំណុលប្រទេសកម្ពុជា ។ តើស្ថានភាពបំណុលពិភពលោក និងកម្ពុជាមានកម្រិតធ្ងន់ធ្ងរកម្រិតណា?
កម្រិតបំណុលសកល នៅក្នុងឆ្នាំ២០២៣ កន្លងទៅបានកើនឡើងដល់កម្រិតខ្ពស់បំផុតដែលមិនធ្លាប់មាន ប៉ុន្តែទោះបីជាយ៉ាងណាក៏ដោយសម្រាប់កម្ពុជាកម្រិតបំណុលនៅតែមានចីរភាព និងហានិភ័យកម្រិតទាប ទោះបីជាកម្ពុជានៅតែបន្តទទួលរងនូវផលប៉ះពាល់ពីកត្តាខាងក្រៅជាបន្តបន្ទាប់ក្តី ។
របាយការណ៍ «ការត្រួតពិនិត្យបំណុលសកល» ដែលចេញផ្សាយដោយវិទ្យាស្ថាន ហិរញ្ញវត្ថុ អន្តរជាតិកាលពីពេលថ្មីៗកន្លងទៅនេះបានឲ្យដឹងថា កាលពីឆ្នាំ២០២៣ កន្លងទៅនេះបំណុលប្រមាណជា១៥ទ្រីលានដុល្លារ ត្រូវបានបញ្ចូលក្នុងបញ្ជីបំណុលសាកលបន្ថែមទៀតដែលនាំអោយពិភពលោកធ្លាក់នៅក្នុងបំណុលដែលមានតម្លៃសរុបដល់ទៅ៣១៣ទ្រីលានដុល្លារ ។
ប្រភពដដែលបានអះអាងថា អនុបាតបំណុលទៅនឹងអត្រាផលិតផលនៅក្នុងស្រុកសរុបនៅក្នុងទីផ្សារដែលកំពុងរីកចម្រើនបានឈានដល់កម្រិតខ្ពស់ថ្មី កាលពីឆ្នាំមុនជាមួយនឹងការកើនឡើងខ្ពស់បំផុតត្រូវបានគេសង្កេតឃើញនៅក្នុងប្រទេសឥណ្ឌា អាហ្សង់ទីន ចិន រុស្ស៊ី ម៉ាឡេស៊ី និងអារ៉ាប៊ីសាអូឌីត ។ កំណើននៃបំណុលទាំងនេះ ត្រូវបានគេដាក់បន្ទុកខ្លាំងទៅលើបញ្ហានៃការព្រួយបារម្ភមួយចំនួន ជាពិសេសគឺ ការធ្វើឱ្យកាន់តែស៊ីជម្រៅនូវការបែងចែកភូមិសាស្ត្រសាកល ជម្លោះភូមិសាស្ត្រ នយោបាយ និងការកើនឡើងនូវលទ្ធិគាំពារនិយមលើវិស័យពាណិជ្ជកម្ម ។
ប្រភពដដែលបានបន្ថែមថា រាល់ការកើនឡើងនូវហានិភ័យទាំងនេះអាចធ្វើអោយភាពងាយរងគ្រោះនៃបំណុលកាន់តែធ្ងន់ធ្ងរឡើង ។
នៅក្នុងស្ថានភាពបច្ចុប្បន្ននេះ វិទ្យាស្ថានហិរញ្ញវត្ថុអន្តរជាតិបាននិយាយថា ឱនភាពថវិការបស់រដ្ឋាភិបាលនានានៅតែដំណើរការបានល្អលើសពីកម្រិតមុន ការរាតត្បាតនៃជំងឺកូវីដ ១៩ តែការបង្កើនល្បឿននៃជម្លោះក្នុងតំបន់អាចបង្កឱ្យមានការកើនឡើងភ្លាមៗនូវការចំណាយលើវិស័យការពារជាតិ ។ សម្រាប់កម្ពុជាព្រឹត្តិប័ត្រស្ថិតិបំណុលសាធារណៈកម្ពុជាបានបង្ហាញថា ត្រឹមដំណាច់ត្រីមាសទី៣នៃឆ្នាំ២០២៣ កម្ពុជាមានសន្និធិបំណុលសាធារណៈសរុបចំនួន១០,៧២ ពាន់លានដុល្លារ នៅក្នុងនោះ ៩៩,៥ភាគរយ ត្រូវជា១០,៦៧ ពាន់លានដុល្លារ ជាបំណុលសាធារណៈក្រៅប្រទេស ។
ប្រភពដដែលបានបន្តថា នៅក្នុងចំណោមបំណុលទាំងនោះ៤៧ភាគរយ ជាដុល្លារអាមេរិក ២០ភាគរយជាអេសដេអ៊ែរ ១១ភាគរយជាយ័នចិន១១ភាគរយជាយេនជប៉ុន ៧ភាគរយជាអឺរ៉ូ និង៥ភាគរយជារូបិយវត្ថុជាតិ និងរូបិយប័ណ្ណផ្សេងៗ ។ ប្រភពដដែលបានបន្តថា ប្រភពនៃបំណុលដែលកម្ពុជាបានជំពាក់គេនៅពេលនេះ គឺនៅក្រោមពិដាននៃច្បាប់អនុញ្ញាតឲ្យខ្ចីនៅឡើយ។
ជុំវិញស្ថានភាពនេះ អ្នកវិភាគមួយចំនួនថា ទោះជានេះជាស្ថិតិនៃបំណុលនេះ គឺកត់ត្រាត្រឹមតែត្រីមាសទី៣ ពិតមែន ប៉ុន្តែវាហាក់ដូចជា សា្ថនភាពនៃបំណុលពេញមួយឆ្នាំទៅហើយ ពីព្រោះថា នៅត្រីមាសទី៤ ពោល គឺចន្លោះពីខែតុលា ដល់ខែធ្នូ ដូចជា មិនមានគម្រោងហិរញ្ញប្បទានណាមួយចុះធំដុំរវាងរដ្ឋាភិបាលនិងរដ្ឋាភិបាលឡើយ ។ នៅក្នុងអំឡុងពេលនេះទំហំនៃបំណុលបន្ថែម បើមានក៏មិនជាធំដុំរហូតដល់លើសពីកម្រិត៤៥ភាគរយនៃកម្រិតពិដានបំណុល ដែលកម្ពុជាអាចខ្ចីគេបានដែរ ៕ ដោយៈ ហេង ចេស្តារ
ចែករំលែកព័តមាននេះ