នៅកម្ពុជាយើងមានហាងសម្លៀកបំពាក់ច្រើនម៉ូត និងច្រើនយីហោរ ប៉ុន្តែសម្រាប់ហាងដែលមានលក់សម្លៀកបំពាក់លំដាប់អភិជនដែលមានតម្លៃមួយកំប្លេពី២សែនទៅជាង២លានដុល្លារ គឺទំនងជាមិនមាននោះទេ ។ ប៉ុន្តែប្រសិនបើមាន គឺអភិជនខ្លះអាចបញ្ជាទិញពីក្រៅ ឬក៏ទៅទិញផ្ទាល់នៅក្រៅប្រទេស ។ តាមឯកសារយីហោរសម្លៀកបំពាក់ទាំងនោះវាថ្លៃបែបនេះ…
នៅកម្ពុជាយើងមានហាងសម្លៀកបំពាក់ច្រើនម៉ូត និងច្រើនយីហោរ ប៉ុន្តែសម្រាប់ហាងដែលមានលក់សម្លៀកបំពាក់លំដាប់អភិជនដែលមានតម្លៃមួយកំប្លេពី២សែនទៅជាង២លានដុល្លារ គឺទំនងជាមិនមាននោះទេ ។ ប៉ុន្តែប្រសិនបើមាន គឺអភិជនខ្លះអាចបញ្ជាទិញពីក្រៅ ឬក៏ទៅទិញផ្ទាល់នៅក្រៅប្រទេស ។
តាមឯកសារយីហោរសម្លៀកបំពាក់ទាំងនោះវាថ្លៃបែបនេះ គឺដោយសារតែវាទទួលការគាំទ្រពីសំណាក់តារាល្បីៗ ក្រុមគ្រួសាររាជវង្ស និងអស់អ្នកដែលមានស័ក្តិយសធំៗមានលុយ ចាយមិនអស់ ឬក្រុមអស់អ្នកដែលរកលុយដោយងាយស្រួល ។ តើយីហោរសម្លៀកបំពាក់ដែលថ្លៃបំផុត គឺមានយីហោរអ្វីហើយ តើវាមានតម្លៃប៉ុន្មាន? កម្មវិធីលុយនៃសារព័ត៌មានកោះសន្តិភាពសូមចែករំលែកជូនដូចខាងក្រោម ៖
១.Louis Vuitton
Louis Vuitton គឺជាម៉ាកយីហោរសម្លៀកបំពាក់ថ្លៃបំផុតទី១ នៅលើពិភពលោក ហើយវាបានមានឈ្មោះបោះសំឡេង តាំងពីឆ្នាំ១៨៥៤ នៅប្រទេសបារាំង ។ Louis Vuitton ផលិតសម្លៀកបំពាក់ដែលទំនើប និងទាន់សម័យ ហើយវាមានស្លាកសញ្ញាដ៏ល្បីល្បាញដែលមានអក្សរពីរ គឺ LV ។ ក្រុមហ៊ុន Louis Vuitton ក៏ផលិតរបស់ផ្សេងទៀតដូចជា វ៉ាលី កាបូប និងគ្រឿងបន្លាស់ជាដើម ។ Louis Vuitton មានប្រជាប្រិយភាពខ្លាំង ក្នុងចំណោមអ្នកមាន និងល្បីល្បាញ ដូចជា តារាល្បី និងរាជវង្សជាដើម ។ នៅក្នុងពិភពនៃម៉ូដដ៏ប្រណីត Louis Vuitton ត្រូវបានគេស្គាល់ថា ជាម៉ាកដ៏ល្បីល្បាញបំផុតមួយនៅជុំវិញពិភពលោក ។ សម្លៀកបំពាក់ Louis Vuitton ដែលមានតម្លៃ ថ្លៃជាងគេមានតម្លៃរហូតដល់ ២,១ លានដុល្លារ ។
២. Hermès
Hermès គឺជាម៉ាកសម្លៀកបំពាក់ថ្លៃបំផុតទី២ នៅក្នុងពិភពលោក ដោយវាត្រូវបានគេទទួលស្គាល់តាំងពី ឆ្នាំ១៨៣៧ នៅប្រទេសបារាំង ពោល គឺមុនសម្លៀកបំពាក់ Louis Vuitton ទៅទៀត ។ Hermès ផលិតសម្លៀកបំពាក់ដែលមានភាពប្រណីត និងចម្រាញ់ ហើយវាមានសម្ភារៈស្បែក និងសូត្រ ។ សម្លៀកបំពាក់យីហោរនេះ អាចមានតម្លៃរហូតដល់ ជាង ៤៥០.០០០ ដុល្លារ ។
៣. Chanel
Chanel ជាម៉ាកសម្លៀកបំពាក់ថ្លៃបំផុតទី៣ ក្នុងពិភពលោក ហើយវាចាប់ផ្តើមចេញម៉ូត និងលក់នៅលើទីផ្សារនៅឆ្នាំ១៩១០ នៅពេលដែល Gabrielle “Coco” Chanel បានបើកហាងមួករបស់នាង នៅទីក្រុងប៉ារីស ។ សម្លៀកបំពាក់នៅក្រោមម៉ាក Chanel មានភាពល្បីល្បាញដោយសារការច្នៃប្រឌិត មិនចេះចប់មិនចេះហើយ ដូចជា រ៉ូបពណ៌ខ្មៅ កាបូបដៃបែបបុរាណ និងទឹកអប់លេខ៥ ដែលទទួលបានការទទួលស្គាល់ទូទាំងពិភពលោក។ ទំនិញ Chanel ថ្លៃជាងគេមិនធ្លាប់មាន គឺមាន តម្លៃ ២៦១.០០០ ដុល្លារ ។
៤. GUCCI
Gucci គឺជាម៉ាកសម្លៀកបំពាក់ថ្លៃបំផុតនៅលើពិភពលោករបស់អ៊ីតាលី ដែលបានហក់ ចូលទីផ្សារដំបូង តាំងពីឆ្នាំ១៩២១ ។ Gucci ផលិតសម្លៀកបំពាក់ដែលប្រណីត និងឆើតឆាយ ហើយមានព័ត៌មានលម្អិត និងពណ៌ច្រើន ។ Gucci ក៏ផលិតរបស់ផ្សេងទៀត ដូចជាកាបូប ស្បែកជើង គ្រឿងអលង្ការ និងទឹកអប់ ។ Gucci មានប្រជាប្រិយភាពខ្លាំង ក្នុងចំណោមមនុស្សល្បីៗ ដូចជា តារាចម្រៀង តារាសម្តែង និងតារាបង្ហាញម៉ូតជាដើម ។ របស់ដែលថ្លៃបំផុតរបស់ Gucci គឺ មានតម្លៃដល់ទៅ ២៥៦.៩៧០ ដុល្លារ ។
៥. Versace
Versace បានបង្ហាញពីភាពប្រណីតរបស់អ៊ីតាលី ចាប់តាំងពីការចាប់ផ្តើមរបស់ខ្លួនក្នុងឆ្នាំ ១៩៧៨ ។ សម្លៀកបំពាក់យីហោរនេះ បានកើតឡើងក្រោមចក្ខុវិស័យរបស់លោក Gianni Versace ។ Versace ក៏ផលិតរបស់ផ្សេងទៀតដូចជា គ្រឿងអលង្ការ វ៉ែនតា និងទឹកអប់។ អស់ជាច្រើនទស្សវត្សមកហើយ ម៉ូដសម្លៀកបំពាក់ដែលមិនអាចប្រៀបផ្ទឹមបានរបស់ Versace គឺជាជម្រើសនៃរូបតំណាង សកលលោកជាច្រើន រួមមានដូចជា Madonna, Princess Diana, Michael Jackson និង Elton John ។ សម្លៀកបំពាក់ដ៏ល្អបំផុត ត្រូវបានគេដឹងថា មានតម្លៃប្រមាណជាជាង២ សែនដុល្លារ ៕ ដោយៈ ស ផាត់
ចែករំលែកព័តមាននេះ