«ជំនាងផ្ទះខ្មែរ» ជាស្នាដៃបង្គុំបែបស្ថាបត្យកម្ម និងរចនាបថដែលបង្ហាញពីជំនឿសាសនា វប្បធម៌ អរិយធម៌ ជាពិសេស គឺអត្តសញ្ញាណ ប៉ុន្តែនៅសម័យបច្ចុប្បន្នពលរដ្ឋខ្មែរមួយចំនួនភ្លេចគិតចំណុចនេះ ហើយយករបៀបបរទេសមកចូលផ្ទះ ។…
«ជំនាងផ្ទះខ្មែរ» ជាស្នាដៃបង្គុំបែបស្ថាបត្យកម្ម និងរចនាបថដែលបង្ហាញពីជំនឿសាសនា វប្បធម៌ អរិយធម៌ ជាពិសេស គឺអត្តសញ្ញាណ ប៉ុន្តែនៅសម័យបច្ចុប្បន្នពលរដ្ឋខ្មែរមួយចំនួនភ្លេចគិតចំណុចនេះ ហើយយករបៀបបរទេសមកចូលផ្ទះ ។
ពាក់ព័ន្ធនឹងបញ្ហានេះ លោក ស៊ឹង គា ម្ចាស់ផ្ទះជ័យភូមិ បានអោយកម្មវិធីលុយនៃសារព័ត៌មានកោះសន្តិភាពថា មកដល់ពេលនេះពលរដ្ឋយើងមួយចំនួនអត់សូវយល់ចំណុចនេះ ហើយពួកគេនាំកំពុងតែនាំគ្នាយករបស់បរទេស ដែលមានតាំងពីអក្សរបរទេស រូបអទិទេព ឬក៏បដិមាបែបបរទេសទាំងអស់ចូលផ្ទះ ។ លោកបានឲ្យដឹងថា «យើងអត់យល់អីសោះ ។ យើងយកតាមបរទេស ទាំងអក្សរបរទេស រូប អាទិទេព ឬក៏បដិមាក បែបបរទេសទាំងអស់ ។ ខ្ញុំគិតថាផ្ទះ គឺជាអត្តសញ្ញាណជាតិ ផ្ទះជាកន្លែងប្រមូលផ្តុំនូវភាពវិជ្ជមានទាំងពួង ជាអត្តសញ្ញាណជាតិខ្មែរយើង ។ ចុះបើគេចូលមកមិនឃើញខ្មែរឃើញបរទេស ។ អ៊ីចឹងតើខ្មែរនៅទីណា?» ។
លោក ស៊ឹង គា បន្តថា ដើម្បីធ្វើអោយផ្ទះសម្បែងដែលយើងរស់នៅក្លាយជាផ្ទះជ័យភូមិ ឬផ្ទះ ដែលមានសិរីសួស្តីសម្រាប់សមាជិកក្នុងគ្រួសារ ម្ចាស់ផ្ទះក៏ដូចជាសមាជិកគ្រួសារ ត្រូវស្ថិតនៅក្នុងក្បួនជ័យភូមិ ត្រូវមើលពាលា ពេលវេលាទិញផ្ទះថ្មី ពេលវេលាចូលរស់នៅក្នុងផ្ទះ ហើយត្រូវមានអសនៈជំនាងផ្ទះទៅតាមលទ្ធភាព និងធនធានផ្ទាល់ខ្លួនជាមួយ និងគ្រឿងប្រដាប់ប្រដាររួមផ្សំផ្សេង ក្រៅពីនេះក៏នៅមានខ្នាតខ្មែរមួយទៀតដែលល្អៗសមជាមួយ និងម្ចាស់ផ្ទះទ្វារបង្អួចគ្រប់គ្រាន់ត្រូវតាមក្បួនខ្នាត ។
លោកបានបន្តថា ជំនាងផ្ទះខ្មែរនេះកើតឡើងតាំងពីមានមនុស្សខ្មែរមក តាំងពីមានសំណង់ខ្មែរ ហើយត្រូវតែចាំថា ជំនាងផ្ទះជាភេទស្រី ហើយមនុស្សខ្មែរ ស្រីជាធំខ្មែរយើងមេជាធំ ។ ដូច្នេះពេលយើងចាប់ផ្តើមធ្វើផ្ទះភ្លាម គឺគេតម្រូវឲ្យម្ចាស់ផ្ទះសម្រិតសម្រាំងរកសរសរកន្លោង គឺសរសរកណ្តាលផ្ទះចំនួន២ ដោយមានស្លៀកសំពត់ដូចជា ហូល ដាក់មាស ដាក់លុយកាក់ ជាដើម ។
លោក ស៊ឹង គា បានសង្កត់ធ្ងន់ថា «ផ្ទះជាភេទស្រី ជាកម្មសិទ្ធរបស់ស្រីតៗតាំងពីមុនមក ។ មនុស្សប្រុសគ្រាន់តែជាមនុស្សកណ្តៀតមកពីចម្ងាយទេ មកដល់ គឺដេកនៅខាងស្តាំដៃមនុស្សស្រី ព្រោះជាអ្នកការពារ ។ ប្តីប្រែមកពីពាក្យស្វាមី ស្វាមីបានន័យថា ជាអ្នកការពារ ឧទាហរណ៍ខ្ញុំមានស្វាមីភ័ក្រចំពោះព្រះអង្គ ជាអ្នកការពារប្រពន្ធ ការពារកូន នៅខាងស្តាំដៃមនុស្សស្រី ដែលមានតួរនាទីជាអ្នកការពារ មិនមែនជាម្ចាស់ទៀត ម្ចាស់ គឺស្រី្ត ។ ផ្ទះជាកម្មសិទ្ធរបស់មនុស្សស្រី អ៊ីចឹងបានជាជំនាងផ្ទះជាភេទស្រី ។ ជីបានន័យថា អ្នកបួស អ្នករៀន អ្នកចេះដឹងធម៌វិន័យ ខ្ពង់ខ្ពស់ស្មើ និងព្រះ» ។
លោក ស៊ឹង គា បានឲ្យដឹងថា គោលគំនិតរបស់លោកសិក្សាអំពីក្បួនជ័យភូមិខ្មែរនេះឡើង ប្រយោជន៍ គឺដើម្បីលើកកម្ពស់វប្បធម៌ខ្មែរ ។ លោក បន្ថែមថា «នេះជាទស្សនមួយ ដើម្បីទប់ឥទ្ធិពលបរទេស ដែលខ្ញុំធ្វើការសិក្សាស្រាវជ្រាវតាំងពីឆ្នាំ២០០៥ និង២០០៦ មក» ។
លោកបានបន្តថា ដើម្បីរក្សាតម្លៃ និងជាអត្តសញ្ញាណរបស់ពលរដ្ឋខ្មែរ ដែលជាម្ចាស់ស្រុក មានវប្បធម៌ មានប្រវត្តិសាស្ត្រ មានភាសា គេហដ្ឋាន ឬលំនៅស្ថានរបស់យើងទាំងអស់គ្នា ក៏គួរតែរៀបចំជារបស់ខ្មែរដែរ ។ លោកបានបន្តទៀតថា មកដល់ពេលនេះជំនាងផ្ទះជាលក្ខណៈខ្មែរ គឺមានច្រើនប្រភេទ ច្រើនតម្លៃ តាមការស្រលាញ់តាមការចង់បាន ប៉ុន្តែសុំជាលក្ខណៈខ្មែរ ដើម្បីរក្សាអត្តសញ្ញាណជាតិជាខ្មែរ ៕ ដោយ ៖ សនិត
ចែករំលែកព័តមាននេះ