ADផ្ទាំងផ្សព្វផ្សាយពាណិជ្ជកម្ម

Picture

តារា​សិ.ច​ស៊ី​ម្នាក់​ផ្សព្វផ្សាយ​ការ​យល់​ដឹង​ជំងឺមហារីក តែ​បែរជា​បង្ក​ការ​ខឹ.ងសម្បារ​ទៅ​វិញ

3 អាទិត្យ មុន

ឥណ្ឌា ៖ ការ​បង្ហោះ​តាម​ប្រព័ន្ធ​ផ្សព្វផ្សាយ​សង្គម​ដែល​បាន​អះអាង​ថា តារា​ស្រី​ជនជាតិ​ឥណ្ឌា​ម្នាក់​បាន​

ឥណ្ឌា ៖ ការ​បង្ហោះ​តាម​ប្រព័ន្ធ​ផ្សព្វផ្សាយ​សង្គម​ដែល​បាន​អះអាង​ថា តារា​ស្រី​ជនជាតិ​ឥណ្ឌា​ម្នាក់​បាន​ស្លាប់​បាត់បង់​ជីវិត​ដោយសារ​តែ​ជំងឺមហារីក​មាត់ស្បូន រួម​នឹង​វី​ដេ​អូ​ជា​បន្តបន្ទាប់​ក្រោយមក​ដែល​បាន​ប្រកាស​ថា នាង​នៅ​មានជីវិត​នៅឡើយ​ទេ បាន​បង្ក​ការ​ខឹងសម្បារ និង​ការ​រិះគន់​ពី​មហាជន​យ៉ាង​ក្ដៅ​គគុក ពាក់ព័ន្ធ​នឹង​បញ្ហា​សីលធម៌​ជុំវិញ​យុទ្ធនាការ​ផ្សព្វផ្សាយ​តាម​ប្រព័ន្ធ​អ៊ីនធឺណិត​។

កាលពី​ថ្ងៃ​សុក្រ​ស​ប្តា​ហ៍​មុន គណនី Instagram ផ្លូវការ​របស់​តារា​សម្ដែង និង​ម៉ូ​ដែល​ដ៏​សិច​ស៊ី​របស់​ឥណ្ឌា Poonam Pandey បាន​ចេញ​សេចក្ដីថ្លែងការណ៍​មួយ​ដោយ​អះអាង​ថា តារា​ស្រី​វ័យ​៣២​ឆ្នាំ​រូប​នេះ បាន​តស៊ូ​ប្រយុទ្ធ​ប្រឆាំង​នឹង​ជំងឺ​យ៉ាង​ក្លាហាន ហើយ​នាង​បាន​ស្លាប់​បាត់បង់​ជីវិត​ហើយ​។ មនុស្ស​ជា​ច្រើន​បាន​ជឿ​លើ​ការ​សេចក្ដី​ប្រកាស​នេះ​ទាំងស្រុង ហើយ​សារព័ត៌មាន​នានា​បាន​រាយការណ៍​ព័ត៌មាន​នៃ​ការ​ស្លាប់​របស់​នាង​ក្នុង​រយៈពេល​ប៉ុន្មាន​នាទី​ក្រោយមក ស្រប​ពេល​ប្រព័ន្ធ​ផ្សព្វផ្សាយ​សង្គម​ពោរពេញ​ដោយ​ការ​គោរព និង​ការ​រំលែក​ទុក្ខ​ចំពោះ​តារា​ស្រី​រូប​នេះ​។

យ៉ាងណាមិញ ១​ថ្ងៃ​បន្ទាប់​ពី​ការ​ស្លាប់​របស់​នាង​ត្រូវ​បាន​ប្រកាស ស្រាប់តែ Pandey បាន​បង្ហោះ​វី​ដេ​អូ​មួយ​ដោយ​បញ្ជាក់​ថា នាង​បាន​ក្លែងបន្លំ​ការ​ស្លាប់​របស់​នាង​លើ​គណនី Instagram ដែល​អ្នក​តាមដាន ១.៣​លាន​នាក់ ដោយ​បាន​អះអាង​ថា គឺជា​ផ្នែក​មួយ​នៃ​យុទ្ធនាការ​ប្រព័ន្ធ​ផ្សព្វផ្សាយ​សង្គម ដើម្បី​បង្កើត​ការ​យល់​ដឹង​អំពី​ជំងឺមហារីក​មាត់ស្បូន​តែ​ប៉ុណ្ណោះ​។ នៅ​ក្នុង​វី​ដេ​អូ​នោះ Pandey បាន​និយាយ​ថា ភ្លាម​ៗ​នោះ យើង​ទាំងអស់​គ្នា​កំពុងនិយាយ​អំពី​បញ្ហា​ជំងឺមហារីក​មាត់ស្បូន​មែន​ទេ?ហើយ​នាង​បន្ត​ថា នាង​មាន​មោទនភាព​ណាស់ ចំពោះ​អ្វី​ដែល​ដំណឹង​មរណភាព​នាង​អាច​សម្រេច​បាន​លើពញ្ញាក់អារម្មណ៍ លើ​ការ​យល់​ដឹង​អំពី​ជំងឺ​ដ៏​កាច​សាហាវ​នេះ​។

ការ​បង្ហោះ​ជា​បន្តបន្ទាប់​នៅ​លើ​គណនី Instagram តារា​ស្រី​រូប​នេះ បាន​បង្ក​ជា​ការ​ខឹងសម្បារ​យ៉ាង​ខ្លាំង​ពី​សំណាក់​ប្រជាជន​ឥណ្ឌា ដោយ​នាំ​មក​ជាមួយ​នូវ​ការ​រិះគន់​យ៉ាងច្រើន​ផង​ដែរ​។ អ្នកខ្លះ​ក៏​បាន​រិះគន់​ទៅ​លើ​ប្រព័ន្ធ​ផ្សព្វផ្សាយ​ក្នុងស្រុក ដែល​បាន​រាយការណ៍​ការ​ស្លាប់​របស់​តារា​ស្រី​រូប​នេះ ដោយ​មិន​បាន​ផ្ទៀងផ្ទាត់​ព័ត៌មាន​នោះ ខណៈ​ដែល​អ្នក​សារព័ត៌មាន​មួយ​ចំនួន​បានការ​ពារ​ការ​សម្រេចចិត្ត​របស់​ពួក​គេ ដោយ​បាន​អះអាង​ថា ដំណឹង​នេះ​ត្រូវ​បាន​ចែករំលែក​ដោយ​ផ្អែក​តាម​ការ​បង្ហោះ​របស់​គណនី Instagram ផ្លូវការ​របស់​តារា​ស្រី​រូប​នេះ​។

កាលពី​ថ្ងៃ​សៅរ៍​ស​ប្តា​ហ៍​មុន Schbang ភ្នាក់ងារ​ប្រព័ន្ធ​ផ្សព្វផ្សាយ​សង្គម ដែល​ទទួលខុសត្រូវ​ចំពោះ​ការ​បង្កើត​យុទ្ធនាការ​នេះ បាន​ធ្វើការ​សុំ​ទោស​ដល់​អ្នក​ដែល​ប៉ះពាល់​អារម្មណ៍​ដោយ​យុទ្ធនាការ​នេះ​។ ទីភ្នាក់ងារ​នេះ​បាន​បញ្ជាក់​ក្នុង​សេចក្ដីថ្លែងការណ៍​មួយ​ថា «​សកម្មភាព​យើង​ត្រូវ​បាន​ជំរុញ​ដោយ​បេសកកម្ម​ឯកវចនៈ ដើម្បី​បង្កើន​ការ​យល់​ដឹង​អំពី​ជំងឺមហារីក​មាត់ស្បូន​។ ម្ដាយ​តារា​ស្រី Pandey បាន​ប្រយុទ្ធ​ប្រឆាំង​នឹង​ជំងឺមហារីក ហើយ​នាង​យល់​ពីសារ​សំខាន់​នៃ​ការ​ការពារ ការ​រិះគន់ និង​ការ​យល់​ដឹង ជា​ពិសេស​នៅ​ពេល​ដែល​មាន​វ៉ាក់សាំង​»​។ ប៉ុន្តែ​បើ​ទោះបីជា​មានការ​បកស្រាយ​បែប​នេះ​យ៉ាងណា​ក៏​ដោយ ក៏​ប្រតិកម្ម​ជុំវិញ​យុទ្ធនាការ​នេះ នៅ​តែ​មិន​ទាន់​សាបរលាប​នៅឡើយ​ទេ​។

សូម​ជម្រាប​ថា នៅ​ក្នុង​ប្រទេស​ឥណ្ឌា ជំងឺមហារីក​មាត់ស្បូន ជា​រឿយ​ៗ​ត្រូវ​បាន​ហៅ​ថា «​ឃាតក​ស្ងៀមស្ងាត់​» ព្រោះ​មិន​មាន​រោគ​សញ្ញា​គួរ​ឱ្យ​កត់សម្គាល់​ក្នុង​ដំណាក់កាល​ដំបូង​។ បន្ទាប់​ពី​ជំងឺមហារីក​សុដន់ មហារីក​មាត់ស្បូន​គឺ​កើត​មាន​ញឹកញាប់​បំផុត​ទី​២ ចំពោះ​ស្ត្រី​ឥណ្ឌា ដែល​មាន​ជាង ៧៧,០០០​នាក់ បាន​ស្លាប់​ដោយសារ​ជំងឺ​នេះ​ជា​រៀង​រាល់​ឆ្នាំ​។ ប៉ុន្តែ​វា​ក៏​ជា​មហារីក​មួយ​ក្នុង​ចំណោម​មហារីក​ដែល​អាច​ការពារ​បាន​ផង​ដែរ ព្រោះ​វ៉ាក់សាំង HPV ការពារ​ប្រឆាំង​នឹង​ប្រភេទ​មេរោគ​បង្ក​ជំងឺមហារីក​ដែល​មាន​ហានិភ័យ​ខ្ពស់​។ ប៉ុន្តែ​ស្ត្រី​ត្រូវ​បាន​ណែនាំ​ឱ្យ​បន្ត​ការ​ពិនិត្យ​មហារីក​មាត់ស្បូន​ជា​ប្រចាំ ព្រោះ​វ៉ាក់សាំង​មិន​អាច​ការពារ​ប្រឆាំង​នឹង​មេរោគ HPV ដែល​បង្ក​មហារីក​បាន​ទាំង​អស់នោះ​ទេ​៕ (​ប្រភព ៖ BBC)

អត្ថបទសរសេរ ដោយ

កែសម្រួលដោយ