ដោយសារជំនឿតាំងពីដើមមកទើបប្រជាពលរដ្ឋខ្មែរ ពិសេសអ្នកជាប់សែស្រឡាយចិនមួយចំនួនបាននាំគ្នាទៅវិហារ ឬអ្នកតាចិនធ្វើការសែនកាត់ឆុង ដើម្បីកាត់គ្រោះ ចង្រៃ ទាំងអស់អោយចៀសផុតចេញឆ្ងាយ និងនាំមកវិញនូវលាភសំណាងត្រឡប់មកវិញ ។ ក្នុងនោះ ការចំណាយក្នុងការកាត់ឆុងម្តងប្រជាពលរដ្ឋម្នាក់ៗអាចត្រូវចំណាយយ៉ាងហោច១៥.០០០រៀល…
ដោយសារជំនឿតាំងពីដើមមកទើបប្រជាពលរដ្ឋខ្មែរ ពិសេសអ្នកជាប់សែស្រឡាយចិនមួយចំនួនបាននាំគ្នាទៅវិហារ ឬអ្នកតាចិនធ្វើការសែនកាត់ឆុង ដើម្បីកាត់គ្រោះ ចង្រៃ ទាំងអស់អោយចៀសផុតចេញឆ្ងាយ និងនាំមកវិញនូវលាភសំណាងត្រឡប់មកវិញ ។ ក្នុងនោះ ការចំណាយក្នុងការកាត់ឆុងម្តងប្រជាពលរដ្ឋម្នាក់ៗអាចត្រូវចំណាយយ៉ាងហោច១៥.០០០រៀល ទៅ៣ម៉ឺន ។
ព្រឹទ្ធាចារ្យ អ៊ឹម វួចណឹម អាយុ៧៦ឆ្នាំ បានអោយកម្មវិធីលុយនៃសារព័ត៌មាន កោះសន្តិភាព ដឹងថា ជាទូទៅពិធីកាត់ឆុងនេះត្រូវបានធ្វើឡើងមុនថ្ងៃចូលឆ្នាំចិន ប៉ុន្តែមិនមែនបានន័យថា ក្រោយចូលឆ្នាំចិនហើយមិនអាចធ្វើបាននោះទេ អាស្រ័យទៅលើពេលវេលា របស់បុគ្គលម្នាក់ៗថា ទំនេរពេលណា ឬអ្នកខ្លះបានរើសយកថ្ងៃល្អតាមប្រតិទិន ឬតាមចិនសែប្រាប់ ។ ពួកគាត់មានជំនឿថា បើឆុងហេង គឺមានលាភធំ តែបើឆុងស៊យជួបគ្រោះថ្នាក់ ខាតបង់លុយកាក់ ការងារមិនរលូន និងមានបញ្ហាសុខភាពជាដើម ។
ព្រឹទ្ធាចារ្យ អ៊ឹម វួចណឹម បានបន្តថា «ការសែនកាត់ឆុង ប្រដាប់គេមានតាំងពីរូបមនុស្ស តាំងពីរូបសត្វឡើង ហើយក៏មានរូបលោកតាដែរ ។ យើងទិញរបស់អ៊ីចឹងៗសែន ។ យើងក៏សែនអ្នកតាលុយផ្សេងទៀតដោយប្រើក្រូច១៥ ផ្លែ»។
លោក ពុំ ប៊ុនឆៃ អាយុ២៨ឆ្នាំ ជាអ្នកលក់គ្រឿងសែនព្រេន នៅស្ទឹងតាខ្មៅ ក្រុងតាខ្មៅបានអោយដឹងថា ការសែនព្រេនម្តងៗ ប្រជាពលរដ្ឋខ្មែរស្រឡាយចិន ចំណាយយ៉ាងតិច៣ម៉ឺនរៀល ទៅ៤ម៉ឺនរៀលលើគ្រឿងរណ្តាប់សែនព្រេនម្តងៗ។ លោក ពុំ ប៊ុនឆៃ បន្ថែមថា «វាមានតាមតូចតាមធំ ។ បើគាត់ចង់បាន៣ម៉ឺន រៀលយើងរៀបអោយគាត់៣ម៉ឺនរៀល ។ បើគាត់ចង់បានតិចតួចយើងរៀបអោយគាត់តាមហ្នឹងតាមថវិកា ។ ពេលខ្លះត្រឹម១៥.០០០រៀលក៏អាចទិញបានដែរបង»។
ដោយឡែក អ្នកស្រី យាន ស៊ីណាត អាយុ៣៩ឆ្នាំ ជាអ្នកលក់ក្រដាសយ័ន្ត ធូបទៀន នៅវិហារ អ្នកតាធំក្រុងតាខ្មៅ បានអោយដឹងថា «ក្នុងពេលសែនម្តងៗគេត្រូវចំណាយដូចជា ធូប ទៀន ក្រដាសសែន និងក្រូច ប្រេង និងលុយកាក់ផ្សេងៗតាមភ្ញៀវដែលគាត់ត្រូវការចង់បាន ។ ខ្ញុំអាចលក់ជូនគាត់តាមការចង់បាន »។
សម្រាប់អ្នកនាង ដោត គីមស្រ៊ុន អាយុ៤២ឆ្នាំ ជាអ្នកលក់គ្រឿងសែនព្រេន នៅវិហារអ្នកតាធំ ក្រុងតាខ្មៅ ដែរ ថា«បើថារៀបតែក្រដាស់កាត់ឆុង ២ម៉ឺនរៀលចុះក្រោម អូខេហើយ ។ តែបើថា គាត់ចង់សែនលោកតាទៀត តាមហ្នឹងតទៀតទៅ។ តែបើគាត់ត្រឹមកាត់ឆុងអីទេ២ម៉ឺន រៀលចុះក្រោម » ។
នៅសប្តាហ៍នេះ ពលរដ្ឋខ្មែរចិនមួយចំនួនក្នុងប្រទេសកម្ពុជា បានចាប់ផ្តើមរៀបចំប្រារព្ធពិធីកាត់ឆុងទៅតាមជំនឿរបស់ពួកគេបណ្តើរៗ ដោយមានការរៀបចំតុបតែងផ្ទះ និងការសែន ព្រេនមួយចំនួនផង ។ នៅតាមវិហារអ្នកតាធំៗរបស់ចិន គេសង្កេតឃើញមានការសែនព្រេន ការជួបជុំមនុស្ស និងការដុតក្រដាសផ្សេងៗ ជាយ័ន្តជាដើម បានក្លាយជារឿងធម្មតាក្នុងអំឡុង ពេលរៀបចូលឆ្នាំថ្មីប្រពៃណីចិននេះជាបន្តបន្ទាប់ ៕
ដោយៈ ស នីត
ចែករំលែកព័តមាននេះ