ស្របពេលដែលការចុះបញ្ជីអាជីវកម្មត្រូវបានស្ថាប័នពាក់ព័ន្ធកំពុងតែជំរុញ និងលើកទឹកចិត្តពលរដ្ឋដែលមានមុខរបរក្រៅប្រព័ន្ធឲ្យចុះបញ្ជីឲ្យត្រឹមត្រូវ ដើម្បីពួកគេអាចទទួលបានការគាំពារខាងផ្លូវច្បាប់នោះ ពលរដ្ឋដែលកំពុងតែប្រកបរបរក្រៅប្រព័ន្ធទាំងនេះ គឺហាក់ដូចជា ចាប់អារម្មណ៍ផង និងព្រួយបារម្ភផង។
ពាក់ព័ន្ធនឹងបញ្ហានេះ អ្នកនាង នឿន ធារ៉ា ជាអ្នកអ៊ុតសក់ក្នុងផ្សារកណ្តាល រាជធានីភ្នំពេញ ដែលមានអាយុ២៨ឆ្នាំ បានអោយដឹងថា «យើងបដិសេធមិនបានទេ បើសិនជាគេ (រដ្ឋាភិបាល) អោយយើងចុះយើងមិនដឹងយ៉ាងម៉េចដែរ» ។
ដោយឡែក លោក អ៊ូ តុង អាយុ៣៧ឆ្នាំ ជាអ្នករត់កង់បី បានចែករំលែកខ្លះៗថា អ្នកប្រកបអាជីវកម្មសេដ្ឋកិច្ចក្រៅប្រព័ន្ធ សព្វថ្ងៃនេះប្រឈមបញ្ហាច្រើន ដូចជាបំណុលធនាគារ ចំណូលធ្លាក់ចុះ ទំនិញហូបចុកនៅលើទីផ្សារឡើងថ្លៃ និងអ្នកខ្លះទៀតបានបង្ខំចិត្តប្តូរមុខរបរ ។ ប៉ុន្តែរឿងចុះបញ្ជីលោករាងស្ទាក់ស្ទើរបន្តិច ទន្ទឹមនឹងលោកស្វាគមន៍ ។
លោក អ៊ូ តុង បានបន្ថែមថា «មានអីគាំទ្រគាត់ សប្បាយចិត្តដែលគាត់ (រដ្ឋាភិបាល) ចុះបញ្ជីកង់បីអ៊ីចឹង ។ អត់អីទេ អាចចុះបាន» ។
ដោយឡែក ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វ៉ន ពៅ បានយល់ឃើញថា ការចុះបញ្ជីចំពោះអ្នកប្រកបរបរខ្នាតតូច និងសេដ្ឋកិច្ចក្រៅប្រព័ន្ធជាបរិបទថ្មីនៃរដ្ឋាភិបាលនីតិកាលទី៧ ។ លោកបានបញ្ជាក់ថា នេះជារឿងមួយល្អ ប្រសិនបើមានការចុះបញ្ជីដល់អ្នកសេដ្ឋកិច្ច ក្រៅប្រព័ន្ធ ដែលរដ្ឋទទួលស្គាល់ពួកគាត់ជាអ្នកប្រកបរបស្របច្បាប់មួយ ។
លោក វ៉ន ពៅ បានអោយកម្មវិធីលុយនៃសារព័ត៌មានកោះសន្តិភាពដឹងថា « កាលណាចុះបញ្ជី រដ្ឋត្រូវតែទទួលខុសត្រូវកិច្ចការកិច្ចគាំពារជាច្រើនដល់ពួកគាត់អាហ្នឹងវាជារឿងប្រសើរ ។ ហើយប្រសិនបើជាការចុះបញ្ជីមិនមានការបង់ពន្ធ បង់ taxបង់អីទៀតវារឹតតែប្រសើរទៀត ។ តែប្រសិនបើចុះបញ្ជីហើយយកពន្ធពីគាត់វាជារឿងមួយដែលពិបាកបន្តិចហើយ ។ យើងមើលឃើញអ៊ីចឹង ព្រោះប្រជាពលរដ្ឋខ្មែរយើងអោយតែលឺតែចុះបញ្ជី គឺដឹងតែបង់ពន្ធ អ៊ីចឹងពេលខ្លះគាត់ព្រួយបារម្ភពីចំណុចហ្នឹង»។
លោក វ៉ន ពៅ បានបន្ថែមថា ប្រសិនបើដំណើរការនៃការចុះបញ្ជីអាជីវកម្ម មានភាពស្មុគស្មាញវានឹងធ្វើអោយប្រជាពលរដ្ឋពិបាកក្នុងការចុះបញ្ជីនូវអាជីវកម្មរបស់ខ្លួន ។ ប៉ុន្តែប្រសិនបើរដ្ឋាភិបាលរៀបចំដំណើរការនៃការចុះបញ្ជីអោយងាយស្រួល និងមិនមានភាពស្មុគស្មាញច្រើនជារឿងល្អដែរ ។ មកដល់ពេលនេះ គោលការណ៍នៃការរៀបចំចុះបញ្ជីអ្នកប្រកបការងារ និងមុខរបរផ្នែកសេដ្ឋកិច្ចក្រៅប្រព័ន្ធ និងបុគ្គលស្វ័យនិយោជន៍នេះ គឺធ្វើឡើងតាមគោលការណ៍ស្ម័គ្រចិត្ត និងគ្មានការបង្ខិតបង្ខំឡើយ ។
អ្វីៗដែលស្ថាប័នពាក់ព័ន្ធកំពុងតែខិតខំរៀបចំ គឺដើម្បីលើកកម្ពស់ការគាំពារសង្គម ការផ្ដល់អត្ថប្រយោជន៍នានា និងការអនុគ្រោះមួយចំនួន ខណៈដែលអ្នកដែលគេចាត់ទុកថា ជាអ្នកប្រកបរបរក្រៅប្រព័ន្ធ គឺមានតាំងពីជាងគំនូរ ជាងកាត់សក់ ជាងអ៊ុតសក់ លម្អក្រចក អាជីវកម្មលក់សម្ភារកីឡា ភោជនីយដ្ឋាន និងអាហារដ្ឋានក្នុងស្រុក តូបលក់អាហារ ហាងលក់គុយទាវ កាហ្វេ ម៉ូតូឌុបទេសចរណ៍ ម៉ូតូជួលទេសចរណ៍ លាងរថយន្ត និងម៉ូតូជាដើម។ល ៕ ដោយ ៖ ស និត
ចែករំលែកព័តមាននេះ