រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ផ្ទះឈើប្រក់ស័ង្កសីមួយកន្លែង ខណៈពេលម្ចាស់ផ្ទះរវល់តែលក់ដូររកស៊ី ហើយចាក់សោរចោល ក៏ស្រាប់តែកើតចេញជាអណ្ដាតភ្លើងឆាបឆេះយ៉ាងសន្ធោសន្ធៅ ផ្អើលអស់ប្រជាពលរដ្ឋ និងសមត្ថកិច្ចចេញរថយន្តអន្តរាគមន៍បា.ញ់ទឹកពន្លត់ បង្កឱ្យមានការភ្ញាក់ផ្អើលកាលពីវេលាម៉ោង៦និង៣០នាទីព្រលប់ ថ្ងៃទី៨ ខែមករា ឆ្នាំ២០២៣ នៅចំណុចក្រុម៤ ផ្លូវ៣៥៧ ស្ថិតក្នុងភូមិដើមស្លែង១ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។
សេចក្តីរាយការណ៍បន្តថា ម្ចាស់ផ្ទះខាងលើនេះមានឈ្មោះ ហ៊ុយ ណាវី ភេទប្រុស អាយុ៤៥ឆ្នាំ ជាជនជាតិខ្មែរ មុខរបរអ្នករត់ម៉ូតូកង់បី។ ចំណែកផ្ទះដែលត្រូវភ្លើងឆាបឆេះ គឺជាប្រភេទសំណង់ធ្វើអំពីឈើប្រក់ស័ង្កសី ទំហំ០៤ម៉ែត្រx១០ម៉ែត្រ។
តាមប្រភពព័ត៌មានពីកន្លែងកើតហេតុ បានប្រាប់អោយដឹងថា «មុនពេលកើតហេតុ គឺផ្ទះកើតហេតុខាងលើ ត្រូវបានម្ចាស់ផ្ទះទុកកូនប្រុសម្នាក់អាយុ១២ឆ្នាំទៅ១៣ឆ្នាំឱ្យនៅចាំផ្ទះ ដោយសារពួកគាត់រវល់តែធ្វើការរកស៊ីលក់ដូរដូចសព្វថ្ងៃ»។
ប្រភពដដែលបន្តថា «លុះមកដល់ម៉ោងកើតហេតុ ពួកគាត់ពុំដឹងថា តើមានបញ្ហាអ្វីកើតឡើងនោះទេ0x017d7 ក៏ស្រាប់តែឃើញមានអណ្ដាតភ្លើងឆាបឆេះហុយផ្សែងឡើងខ្មួលខ្មាញ់តែម្ដង ធ្វើអោយភ្ញាក់ផ្អើលដល់ប្រជាពលរដ្ឋរស់នៅក្បែរនោះ នាំគ្នាឆោឡោ និងយកបំពង់ពន្លត់អគ្គិភ័យមកបា.ញ់អស់ជាច្រើនបំពង់ តែមិនអាចទប់ទល់ស្ថានការណ៍បានឡើយ ទើបពួកគាត់រាយការណ៍ជូនកម្លាំងសមត្ថកិច្ច ដើម្បីសុំជំនួយរថយន្ដពន្លត់អគ្គិភ័យ ឱ្យមកជួយអន្តរាគមន៍»។
ប្រភពដដែលបន្តទៀតថា «លុះបន្តិចក្រោយមក ក៏ឃើញមានរថយន្តពន្លត់អគ្គិភ័យចេញអន្តរាគមន៍ជាច្រើនគ្រឿងជាបន្តបន្ទាប់គ្នាទៅដល់កន្លែងកើតហេតុចំនួន៩គ្រឿង បានសហការគ្នាបា.ញ់ទឹកពន្លត់ រហូតដល់ម៉ោង៧យប់ថ្ងៃខែឆ្នាំដដែល ទើបធ្វើឱ្យអណ្ដាតភ្លើងរលត់ទៅវិញជាទាំងស្រុង»។
ពាក់ព័ន្ធក្នុងហេតុការណ៍ខាងលើនេះដែរ សមត្ថកិច្ចបានប្រាប់អោយដឹងថា «ពុំមានការឆេះរាលដាលដល់ផ្ទះសម្បែងរបស់បងប្អូនប្រជាពលរដ្ឋណាផ្សេងទៀតនោះទេ ហើយក៏គ្មានគ្រោះថ្នាក់ជីវិ.តមនុស្សណាម្នាក់នោះដែរ គឺគ្រាន់តែខូចខាតសម្ភារៈ និងឆេះផ្ទះឈើប្រក់ស័ង្កសីទំហំ០៤ម៉ែត្រx១០ម៉ែត្រ ចំនួន១ខ្នងតែប៉ុណ្ណោះ ហើយចំពោះមូលហេតុវិញ គឺបណ្ដាលមកពីឆ្លងចរន្តអគ្គិសនី ទើបបង្កឱ្យមានការឆាបឆេះបែបនេះ»៕
ចែករំលែកព័តមាននេះ