ក្នុងពេលដែលពិធីមង្គលការកាន់តែខិតជិតមកដល់នោះ តារាសម្តែងនាង ដួង ម៉ានិច បានចេញមុខលើកសរសើរចំណុចល្អៗពីអនាគតស្វាមីរបស់ខ្លួន ដែលចំណុចទាំងនោះហើយធ្វើឲ្យនាងចាត់ទុកថា
រាជធានីភ្នំពេញ ៖ ក្នុងពេលដែលពិធីមង្គលការកាន់តែខិតជិតមកដល់នោះ តារាសម្តែងនាង ដួង ម៉ានិច បានចេញមុខលើកសរសើរចំណុចល្អៗពីអនាគតស្វាមីរបស់ខ្លួន ដែលចំណុចទាំងនោះហើយធ្វើឲ្យនាងចាត់ទុកថា «នាងបានសម្រេចក្តីស្រមៃ ដែលអាចមានអនាគតស្វាមីដ៏ល្អម្នាក់»។
គិតរហូតមកទល់នាពេលនេះ ស្រីស្អាត ដួង ម៉ានិច និងអនាគតស្វាមីមានឈ្មោះ «Lyderzz» កំពុងតែមមាញឹកខ្លាំងក្នុងការថតរូបភាព Pre wedding សម្រាប់ទុកថ្ងៃដ៏ពិសេសរបស់ពួកគេ ដែលនឹងឈានមកដល់ក្នុងពេលឆាប់ៗខាងនេះ ។
យ៉ាងណាម៉ិញ បើទោះបីជាស្រីស្អាត ដួង ម៉ានិច នៅមិនទាន់បញ្ជាក់ពីពេលវេលាចូលរោងការច្បាស់លាស់ឲ្យមហាជនបានដឹងក៏ដោយ ប៉ុន្តែរូបភាពថត Pre wedding របស់នាង ត្រូវបានគេផ្សព្វផ្សាយពេញបណ្តាញសង្គមហ្វេសប៊ុក ដោយក្នុងនោះក៏មានការជូនពរយ៉ាងច្រើនពីសំណាក់ប្រិយមិត្តគាំទ្រផងដែរ ។
ជាពិសេសជាងនេះទៅទៀត ស្របពេលពិធីមង្គលការកាន់តែជិតមកដល់ស្រីស្អាត ដួង ម៉ានិច ក៏បានបង្ហាញពីចំណុចល្អៗមួយចំនួនរបស់អនាគតស្វាមី ដែលបានលះបង់សម្រាប់រូបនាងចាប់តាំងពីស្គាល់គ្នាអស់ប៉ុន្មានឆ្នាំមកនេះ ។
តាមរយៈបណ្តាញសង្គមតារាសម្តែងនាង ដួង ម៉ានិច បានបង្ហោះសារថា «ក្ដីស្រមៃរបស់ម៉ាក់និច បានក្លាយជាការពិតហើយ បងប្អូន ថ្ងៃនេះម៉ាក់និច សប្បាយចិត្តខ្លាំងណាស់ដែលម៉ាក់និចមានសំណាងបានអនាគតប្ដីជាមនុស្សល្អ Lyderzz ហ៊ាឆាត»។
នាងបញ្ជាក់ថា «គាត់ស្រលាញ់ម៉ាក់និច និងយកចិត្តទុកដាក់ មើលថែម៉ាក់និច ផ្ដល់ភាពកក់ក្ដៅ ជាពិសេសគាត់ហ៊ានលះបង់ពេលវេលាផ្ទាល់ខ្លួន លះបង់ភាពយុវវ័យរបស់ខ្លួនឯង លះបង់គ្រប់យ៉ាងដើម្បីចង់ឃើញស្នាមញញឹមរបស់ម៉ាក់និច នឹងចង់ឃើញម៉ាក់និចបានសម្រេចក្ដីស្រមៃ»។
នាងបន្ថែមថា «តាមពិតក្ដីស្រមៃរបស់ម៉ាក់ អត់មានអ្វីច្រើនទេបងប្អូន ម៉ាក់និចចង់កាន់ដៃគាត់ដល់ចាស់ទៅជាមួយគ្នា នេះជាក្ដីស្រមៃរបស់ម៉ាក់និច»។
ជាការកត់សម្គាល់ រឿងរ៉ាវស្នេហារបស់តារាសម្ដែងស្រីស្អាត ដួង ម៉ានិច ជាមួយកំលោះសង្ហារ YouTuber គឺលោក Lyderzz បានក្លាយជាទីចាប់អារម្មណ៍របស់អ្នកលេងបណ្ដាញសង្គម ក្រោយពីទំនាក់ទំនងរបស់អ្នកទាំងពីរ ត្រូវបានបើកបង្ហាញជាសាធារណៈ។ ហើយជារឿយៗគូរស្នេហ៍មួយគូរនេះ តែងតែបង្ហាញពីសកម្មភាពល្អូកល្អើន ផ្អែមល្ហែមជាមួយគ្នាជាញឹកញាប់ ។ ជាពិសេសកាលពីពេលថ្មីៗកន្លងទៅ នៅក្នុងឱកាសថ្ងៃខួបកំណើតរបស់ស្រីស្អាត ដួង ម៉ានិច្ច ត្រូវបានគូរស្នេហ៍លោក Lyderzz ពញ្ញាក់អារម្មណ៍ជាមួយបាច់ផ្កា ដែលមានស្រោបទៅដោយលុយដុល្លារយ៉ាងច្រើនសន្ធឹកសន្ធាប់ថែមទៀតផង ។
អនាគតស្វាមីរបស់ស្រីស្អាត ដួង ម៉ានិច គឺលោក Lyderzz ធ្លាប់បានលើកឡើថា «លោកសប្បាយចិត្តដែលបានស្គាល់គ្នាជាមួយ ដួង ម៉ានិច និងបានឆ្លងកាត់នូវរឿងរ៉ាវជាច្រើនជាមួយគ្នា ទម្រាំតែអាចកាន់ដៃស្រលាញ់គ្នា ផ្ដល់ភាពកក់ក្ដៅ មើលថែគ្នារហូតមកដល់ពេលនេះ»។
ចាប់តាំងពីបង្កើតទំនាក់ទំនងស្នេហ៍ជាមួយគ្នានោះមក តារាស្រី ដួង ម៉ានិច ហាក់មិនបានអើពើពីអាជីពសិល្បៈច្រើនដូចជាពេលមុននោះឡើយ ដោយនាងបានងាកមកចាប់ដៃជាមួយគូរស្នេហ៍ក្នុងមុខរបររកស៊ីលក់ផលិតផលតាមអនឡាញ៕
ចែករំលែកព័តមាននេះ