តារាសម្តែង និងជាប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា បានចេញមុខស្នើសុំទៅកាន់ក្រសួងវប្បធម៌ និងវិចិត្រសិល្បៈ និងក្រសួងធម្មការ និងសាសនា កោះហៅស្ត្រីម្នាក់ដែលតាំងខ្លួនថា
រាជធានីភ្នំពេញ ៖ តារាសម្តែង និងជាប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា បានចេញមុខស្នើសុំទៅកាន់ក្រសួងវប្បធម៌ និងវិចិត្រសិល្បៈ និងក្រសួងធម្មការ និងសាសនា កោះហៅស្ត្រីម្នាក់ដែលតាំងខ្លួនថា «មានបារមីព្រះនាងឥន្ទ្រទេវីចូលសណ្ឋិត» ដែលកំពុងត្រូវបានគេចែកចាយពេញបណ្តាញសង្គម។ ហើយស្ត្រីម្នាក់រូបនោះត្រូវគេស្គាល់ពីមុនថា «គឺជាអ្នកលក់ឱសថបុរាណមួយរូបតាមអនឡាញ» បានបញ្ចេញសកម្មភាពជាបន្តបន្ទាប់ ហើយត្រូវបានផ្សព្វផ្សាយនៅលើបណ្តាញសង្គម ដោយបានតាំងខ្លួន គឺជាព្រះនាងឥន្ទ្រទេវីចូលសណ្ឋិត យាងមកដើម្បីជួយជាតិ ។
យ៉ាងណាម៉ិញ សកម្មភាពទាំងអស់នោះ ត្រូវបានមហាជន ជាពិសេសបណ្តាអ្នកលេងហ្វេសប៊ុកជាច្រើននាក់ហាក់មិនសប្បាយ និងនាំគ្នារិះគន់យ៉ាងព្រោងព្រាតផងដែរ ។ ក្រោយពេលឃើញសកម្មភាពបែបមិនប្រក្រតីខាងលើនេះ ក្នុងនាមជាប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា ក៏បានស្នើសុំទៅកាន់ក្រសួងពាក់ព័ន្ធចំនួន២ខាងលើ អោយជួយអន្តរាគមន៍ចំពោះករណីនេះផងដែរ។
តាមរយៈបណ្តាញសង្គម អ្នកនាង ចន ច័ន្ទលក្ខិណា បានបង្ហោះសារថា «ខ្ញុំសូមស្នើសុំក្រសួងវប្បធម៌ និងវិចិត្រសិល្ប: និងក្រសួងធម្មការ និងសាសនា សូមអញ្ជើញប្អូនស្រីទៅពិគ្រោះយោបល់ផង ព្រោះតាមការឆាតជាមួយខ្ញុំ គាត់កំពុងតែតាំងខ្លួនជាព្រះនាងឥន្ទ្រទេវី យាងមកជួយជាតិ»។
ដោយឡែក ក្នុងពេលដែលអ្នកនាងទើបតែចូលរួមសម្តែងតួអង្គព្រះនាងឥន្ទ្រទេវី នៅកម្មពិធីរាត្រីចងចាំ ក្នុងព្រឹត្តិការណ៍រំលឹកគុណអង្គរកាលពីពេលថ្មីៗនេះ អ្នកនាងបានគូសបញ្ជាក់ថា «ពេលដែលសម្លៀកបំពាក់នេះមកស្ថិតលើខ្លួនខ្ញុំភ្លាម គឺខ្ញុំសែនគោរពប្រតិបត្តិ រៀបឥរិយាបទ រៀបឫក រៀបពាឱ្យនឹងធឹង សមជាម្ចាស់ក្សត្រីប្រចាំព្រះមហានគរ»។
អ្នកនាងបន្តថា «ពេលខ្ញុំសម្តែងជាតួអង្គតំណាងព្រះនាងម្តងៗ ខ្ញុំតែងតែរៀបបាយសីថ្វាយព្រះអង្គ ដើម្បីសុំសេចក្តីសុខ តែខ្ញុំមិនដែលហ៊ានបួងសួងសុំព្រះបារមីព្រះនាងមកសណ្ឋិត ឬឃុំគ្រងនាងខ្ញុំ ដើម្បីសម្តែងឱ្យសាកសមជាព្រះនាងពិតៗនោះទេ។ ព្រោះខ្ញុំគិតថា ខ្លួនខ្ញុំមិនបរិសុទ្ធស្អាតស្អំ១០០% ដែលអាចឱ្យព្រះនាងសណ្ឋិតបានទេ។ ព្រោះខ្ញុំគិតថា ខ្ញុំនៅមានទោសៈ មោហៈ លោភៈ ក្នុងខ្លួន ដូច្នេះត្រឹមតែស្លៀកសម្លៀកបំពាក់ ហើយសម្តែងជាតួអង្គតំណាងព្រះនាង គឺពិតជាអស្ចារ្យលើសលុបពេកហើយសម្រាប់ខ្ញុំ។ ខ្ញុំជឿជាក់ថា ព្រះនាងមិនចូលសណ្ឋិតក្នុងរូបអ្នកស្នងណាម្នាក់ទេ ដូច្នេះសូមកុំតាំងខ្លួនជាព្រះនាងឱ្យសោះ»។
អ្នកនាងបន្តថា «ខ្ញុំឃើញទង្វើ និងសកម្មភាពរបស់អ្នកស្នងខ្លះ គឺមានកាយវិការរាំមិនសមរម្យទាល់ តែសោះ តាមការបង្ហាត់បង្រៀនពីសាស្ត្រាចារ្យនៃក្រសួងវប្បធម៌ និងវិចិត្រសិល្បៈបានប្រាប់ខ្ញុំថា ឥរិយាបទព្រះនាង កុំថាឡើយកាយវិការ សូម្បីតែកែវភ្នែកព្រះនាង មិនងាកមើលឆ្វេងស្តាំទេ។ តែមួយរយៈនេះ ខ្ញុំឃើញអ្នកកំពុងស្នងរូបព្រះនាង ប្រៀបដូចកាយវិការស្រីរបាំបែបទាក់ទាញកាមារម្មណ៍ បែបស្រ៊ើ.បស្រា.ល»។
អ្នកនាងបញ្ជាក់ថា «កុំដើម្បីផលប្រយោជន៍របស់ខ្លួន យកព្រះនាងមកលេងសើច ប្រយ័ត្នបានស្នងក្នុងបន្ទប់រួម»៕
ចែករំលែកព័តមាននេះ