ចូលឆ្នាំថ្មី ឆ្នាំ២០២៤ ខេត្តរតនគិរីភ្ញៀវទេសចរជាតិមានការថយចុះ២.៧៣% ខណៈភ្ញៀវទេសចរអន្តរជាតិកើនឡើង២.៥១%
- រតនគិរី
ខេត្តរតនគិរី ៖ រយៈពេល៣ថ្ងៃ (២៩-៣១) ខែធ្នូ ឆ្នាំ២០២៣ ក្នុងខេត្តរតនគិរី មានភ្ញៀវទេសចរជាតិចំនួន៨,៣៦៣នាក់ មានការថយចុះ ២.៧៣%…
ខេត្តរតនគិរី ៖ រយៈពេល៣ថ្ងៃ (២៩-៣១) ខែធ្នូ ឆ្នាំ២០២៣ ក្នុងខេត្តរតនគិរី មានភ្ញៀវទេសចរជាតិចំនួន៨,៣៦៣នាក់ មានការថយចុះ ២.៧៣% ភ្ញៀវទេសចរអន្តរជាតិ ចំនួន៥៧នាក់ មានការកើនឡើង ២.៥១% សរុបភ្ញៀវទេសចរជាតិ-អន្តរជាតិមានចំនួន៨,៤២០ នាក់ មានការថយចុះ ២.៥៧% ។ នេះបើយោងតាមរបាយការណ៍របស់មន្ទីរទេសចរណ៍ខេត្តរតនគិរីឱ្យដឹង នៅល្ងាចថ្ងៃទី០១ ខែមករា ឆ្នាំ២០២៤ ។
មូលហេតុចំនួនភ្ញៀវទេសចរមានការធ្លាក់ចុះ គឺដោយកត្តាភ្ញៀវទេសចរមានច្រើនជម្រើសក្នុងការធ្វើដើរលេងកម្សាន្តក្នុងព្រឹត្តិការណ៍ឆ្លងឆ្នាំសកល២០២៤ ។ ចំពោះសេវាកម្មស្នាក់នៅ និងសេវាកម្មម្ហូបអាហារនិងសេវាកម្មដឹកជញ្ជូនភ្ញៀវពុំមានការដំឡើងថ្លៃគួរឱ្យកត់សម្គាល់នោះឡើយ ។ ហើយនៅតាមតំបន់រមណីយដ្ឋានមានការគ្រប់គ្រងបរិស្ថាន សណ្តាប់ធ្នាប់បានល្អប្រសើរ ដោយមានរៀបចំណតរថយន្ត និងម៉ូតូយ៉ាងមានរបៀបរៀបរយ ។
របាយការណ៍ដដែលលើកឡើងថា ពិធីបុណ្យចូលឆ្នាំសកល២០២៤ នេះសោភ័ណភាពទីប្រជុំជន និងទីក្រុង និងអនាម័យតាមតំបន់រមណីយដ្ឋានក្រោមការដឹកនាំរៀបចំដោយឯកឧត្តម ញ៉ែម សំអឿន អភិបាលនៃគណៈខេត្តរតនគីរីបានយកចិត្តទុកដាក់ខ្ពស់ក្នុងការរៀបចំឱ្យមានសោភ័ណភាពទីប្រជុំជន ទីក្រុង និងតាមបណ្ដាក្រុងស្រុកទាំងអស់ក្នុងខេត្តរតនគិរី ដោយមានការរៀបចំភ្លើងបំភ្លឺទីសាធារណៈ តាមបណ្តាអង្គភាពរបស់រដ្ឋ និងវិស័យឯកជន ដើម្បីលើកស្ទួយសោភ័ណភាពទីក្រុងក្នុងការផ្តល់សេវាកម្មជូនប្រជាពលរដ្ឋក្នុងខេត្តក៏ដូចភ្ញៀវទេសចរជាតិ និងអន្តរជាតិ ដែលបានមកទស្សនាខេត្តរតនគិរី ។
របាយការណ៍បានធ្វើសេចក្តីសន្និដ្ឋានថា ប្រជាពលរដ្ឋក្នុងខេត្តរតនគិរី មានភាពសប្បាយរីករាយ និងសារទរចំពោះរដ្ឋបាលខេត្តរតនគិរី ដែលបានរៀបចំព្រឹត្តិការណ៍ឆ្លងឆ្នាំសកល ២០២៤ ។ ហើយប្រជាពលរដ្ឋភាគច្រើនក្នុងខេត្តបានជប់លៀងនៅតាមគេហដ្ឋាន និងជុំវិញមាត់បឹងកន្សែង ដើម្បីអបអរសាទរក្នុងព្រឹត្តិការណ៍ឆ្លងឆ្នាំសកល ២០២៤ ។
ជាពិសេសថ្នាក់ដឹកនាំមន្ត្រីរាជការ ប្រជាពលរដ្ឋ ភ្ញៀវទេសចរជាតិ និងអន្តរជាតិ បានជួបជុំគ្នានៅមាត់បឹងកន្សែង ដើម្បីអបអរសាទររហូតដល់ឆ្លងឆ្នាំសកល ២០២៣ ឆ្លងចូលឆ្នាំ២០២៤ និងនៅរមណីយដ្ឋានបឹង វារីអគ្គិសនីស្រុកអូរជុំភ្ញៀវទេសចរជាតិ និងអន្តរជាតិបានរៀបចំបាញ់កាំជ្រួច លក្ខណៈគ្រួសារ ដើម្បីអបអរសាទរ និងត្រៀមក្នុងកម្មវិធីឆ្លងឆ្នាំសកល២០២៤ផងដែរ ៕
ចែករំលែកព័តមាននេះ