ត្រីឆ្លាមខាំត្របា.ក់ក្មេ.ងជំទង់ម្នាក់ ខណៈជិះក្តារបណ្តែតទឹកលេងលើផ្ទៃសមុទ្រ
ទីក្រុងស៊ីដនី៖ ក្មេងជំទង់ជនជាតិអូស្ត្រាលីម្នាក់ស្លា.ប់យ៉ាងអាណោចអាធ័មដោយសារត្រីឆ្លាមខាំ
ទីក្រុងស៊ីដនី៖ ក្មេងជំទង់ជនជាតិអូស្ត្រាលីម្នាក់ស្លា.ប់យ៉ាងអាណោចអាធ័មដោយសារត្រីឆ្លាមខាំត្របាក់នៅពេលគាត់ជិះក្ដារបណ្ដែតទឹកលេងនៅលើផ្ទៃសមុទ្ទអូស្ត្រាលីខាងត្បូង។ នេះបើយោងតាមការបង្ហើបឱ្យដឹងពីសមត្ថកិច្ច។
ក្មេងប្រុសរងគ្រោះឈ្មោះខាយ ខូលី (Khai Cowley) វ័យ១៥ឆ្នាំ ខាំសម្លាប់ដោយត្រីឆ្លាមមាឌធំមួយក្បាលមានសម្បុរសស្គុស។ គេបានស្រង់សាកសពជនរងគ្រោះចេញពីក្នុងទឹកសមុទ្ទមិនយូរប៉ុន្មានក្រោយហេតុការណ៍នោះ។
មុនពេលកើតហេតុនោះ ជនរងគ្រោះមិនបានទៅឆ្ងាយប៉ុន្មានទេ យ៉ាងខ្លាំងត្រឹម៣០ឬ៤០ម៉ែត្រប៉ុណ្ណោះពីមាត់ឆ្នេរ។ នេះបើយោងតាមសាក្សីម្នាក់ដែលរស់នៅម្ដុំនោះ និងជាអ្នកមានបទពិសោធជិះក្ដារលើទឹកសមុទ្ទអស់ជាច្រើនទសវត្សមកហើយ។ គ្រាន់តែទទួលដំណឹងថាមានករណីត្រីឆ្លាមខាំមនុស្ស, ភ្នាក់ងារសង្គ្រោះបន្ទាន់ក៏ប្រញាប់ស្រូតរូតដំណើរចុះទៅកន្លែងកើតភ្លាមៗតែម្ដង។ ប៉ុន្តែគួរឱ្យស្ដាយ ទម្រាំចុះទៅដល់យឺតពេលបន្តិចទៅហើយ។ អ្នកដែលធ្លាប់ស្គាល់ជនរងគ្រោះបានបង្ហាញអារម្មណ៍សោកស្ដាយយ៉ាងខ្លាំងចំពោះហេតុការណ៍ដ៏រន្ធត់នេះ ព្រោះរូបគេជាមនុស្សដែលមានភាពប៉ិនប្រសប់នៅក្នុងការជិះក្ដារលើទឹក និងជាមនុស្សដែលគួរឱ្យចង់រាប់អាន។ ខាយខូលី ជាសមាជិកក្លិបអ្នកជិះក្ដារលើទឹកចាប់តាំងពីឆ្នាំ២០១៦។
អ្នកដែលស្គាល់ឆ្នេរសមុទ្ទនោះច្បាស់យល់ថាចម្លែកមែន នៅសុខៗស្រាប់តែមានត្រីឆ្លាមពណ៌សដ៏ធំមួយក្បាលនៅក្នុងតំបន់នេះ។ តាំងពីណាពីណីមកពុំដែលជួបករណីបែបនេះទេ។ លោកអេនឌ្រូហ្វក់ (Andrew Fox) ជាអ្នកស្រាវជ្រាវម្នាក់ថ្លែងថាត្រីឆ្លាមខ្នាតយក្សសម្បុរសជាប្រភេទសត្វត្រីដែលចូលចិត្តពួនស្ទាក់នៅទីស្ងាត់កំបាំងដើម្បីរង់ចាំឱកាសល្អវាយប្រហារមនុស្ស ឬសត្វដទៃទៀត (ជាពិសេសសត្វ ធ្វើជាចំណីអាហារ)។ នៅថ្ងៃកើតហេតុនោះមានខ្យល់បក់ខ្លាំង និងទឹករលកកញ្ជ្រោកបោកបាចខ្លាំងដែលជាឱកាសល្អសម្រាប់ការជិះក្ដារបណ្ដែតទឹក។ ប៉ុន្តែវាក៏ជាការធ្វើឱ្យត្រីឆ្លាមមិនអាចនៅស្ងៀមបានដែរ។
ទីនេះមិនមែនទើបតែកើតមានរឿងរ៉ាវត្រីឆ្លាមខាំមនុស្សម្ដងហ្នឹងទេ។ កាលពីពេលកន្លងមកក៏មានករណីត្រីឆ្លាមខាំមនុស្សស្លាប់អស់បីនាក់ និងរបួសពីរនាក់។ កាលពីខែឧសភា ឆ្នាំ២០២៣ គ្រូបង្រៀនម្នាក់វ័យ៤៦ឆ្នាំ កំពុងតែជិះក្ដារលើទឹកសមុទ្ទសុខៗស្រាប់តែមានត្រីឆ្លាមមួយក្បាលមិនដឹងចេញពីមកពីទីណាទេហក់មកខាំត្របាក់ស្រស់ៗតែម្ដង។ ហេតុការណ៍នៅក្នុងគ្រានោះកើតឡើងនៅចម្ងាយ៣៦៥គីឡូម៉ែត្រពីទីក្រុងអាដឺឡេត (Adelaide)។
ក្រោយមកទៀត បុរសវ័យ៥៥ឆ្នាំម្នាក់ក៏ត្រូវត្រីឆ្លាមខាំសម្លាប់ផងដែរនៅពេលគាត់ជិះក្ដារលើទឹកសមុទ្ទកាលពីខែតុលា ឆ្នាំ២០២៣។ គេមិនដឹងថាតើត្រីឆ្លាមខាំត្របាក់ និងស៊ីជាចំណីអាហារអស់ហើយក៏មិនដឹង ព្រោះគេស្វែងរកសាកសពរបស់ពួកគាត់មិនឃើញទាល់តែសោះ។ សាស្ត្រាចារ្យដែលជំនាញខាងត្រីឆ្លាមកត់សម្គាល់ថាករណីត្រីឆ្លាមខាំមនុស្សបានកើនឡើងនៅទូទាំងពិភពលោកនារយៈពេលបួនទសវត្សចុងក្រោយនេះ។ គ្រាន់តែថាករណីនេះមិនសូវកើតឡើងញឹកញាប់ពេកទេ។
អ្នកជំនាញរូបនេះយល់ថាអាចមានវិធីមួយចំនួនជួយកាត់បន្ថយករណីត្រីឆ្លាមខាំមនុស្សស្លាប់ និងរបួស។ ទី១- គេគួរធ្វើម៉េចកុំឱ្យមានឱកាសនៅកៀកគ្នា ឬប្រទាំងប្រទើសគ្នារវាងត្រីឆ្លាម និងមនុស្សដោយរៀបចំសំណាញ់បង្ខាំងតំបន់សមុទ្រដែលមនុស្សអាចចុះលេងបាន, ទី២- ការឃ្លាំមើលពីលើអាកាស, ទី៣- ការប្រើប្រាស់ឧបករណ៍ឆក់សម្រាប់ទប់ទល់។ មើលតែត្រីឆ្លាមសសៀរៗមកកៀករកខាំយើង យើងចុចឧបករណ៍ឆក់ឱ្យវាស្រងល់។ រួចហើយយើងប្រញាប់គេចចេញពីទីនោះ។ ទី៤- ពេលចុះសមុទ្ទម្ដងៗគួរពាក់អាវពោងក្រាស់ៗដែលអាចទប់ទល់នឹងត្រីឆ្លាម។ ដូច្នេះ បើទុកជាវាខាំក៏មិនអាចមុតដល់សាច់របស់ជនរងគ្រោះបានឡើយ៕ (ប្រភព៖ BBC, The Guardian និងប្រភពដទៃទៀត)
ចែករំលែកព័តមាននេះ