តារាសម្តែងលោក Sool Cool បានទម្លាយអាថ៌កំបាំងពាក់ព័ន្ធនឹងអាជីពសម្តែងរបស់ខ្លួនជិត២០ឆ្នាំមកនេះ ខណៈពេលស្តាប់ហើយស្ទើរតែនឹកស្មានមិនដល់ឡើយ ថ្វីត្បិតតែរូបលោកហាក់មិនទទួលបានផ្លែផ្កាច្រើនពីអាជីពដែលខ្លួនបានធ្វើនេះ និងលះបង់អស់រយៈពេល
រាជធានីភ្នំពេញ ៖ តារាសម្តែងលោក Sool Cool បានទម្លាយអាថ៌កំបាំងពាក់ព័ន្ធនឹងអាជីពសម្តែងរបស់ខ្លួនជិត២០ឆ្នាំមកនេះ ខណៈពេលស្តាប់ហើយស្ទើរតែនឹកស្មានមិនដល់ឡើយ ថ្វីត្បិតតែរូបលោកហាក់មិនទទួលបានផ្លែផ្កាច្រើនពីអាជីពដែលខ្លួនបានធ្វើនេះ និងលះបង់អស់រយៈពេលជាច្រើនឆ្នាំមកហើយ ។
លោក Sool Cool បានបង្ហោះសារនៅលើបណ្តាញសង្គម ដោយរៀបរាប់រឿងរ៉ាវដែលលោកបានជួបប្រទះក្នុងអាជីពសិល្បៈរបស់ខ្លួនថា «ខ្ញុំថតសម្តែងជិត១៧ឆ្នាំហើយ ! ហើយសម្រាប់ការថត គឺតាមផលិតករឲ្យ ! រាល់ពេលថតម្តងៗ ផលិតករមិនថាជាពួកម៉ាក់ ឬក្រុមហ៊ុននោះទេ គឺតែងតែនិយាយថា «យកប៉ុណ្ណឹងទៅប៉ិក ជួយក្រុមហ៊ុនខ្វះខាត ចាំពេលក្រុមហ៊ុនរីកចម្រើន ក្រុមហ៊ុនជួយប៉ិកវិញ» ។
លោកបន្តថា «ពាក្យនេះ គឺខ្ញុំលឺរហូតមក…! រហូតខ្ញុំទប់ចំណាយមិនចង់បាន គឺដកថយសម្តែងដោយខ្លួនឯង…! ដល់ពេលគេរីកចម្រើន យើងក៏បាត់មុខ រួចក៏មើលឃើញអ្នកថ្មី ហើយហ៊ានឲ្យតម្លៃគេខ្ពស់ ចំណែកយើងអ្នកដែលគេសន្យា គឺត្រឹមតែពាក្យនិយាយសន្យាឲ្យតែបានៗ ចប់ !» ។
លោកបញ្ជាក់ថា «ទៅថតម្តងៗ វេចខោអាវខ្លួនឯងសឹងតែគ្រប់មុខ ធ្វើសក់ផាត់មុខខ្លួនឯង ហើយវេចខ្នើយ និងភួយយកទៅថតឲ្យគេ ! ហា៎? ធ្វើតួរល្បីដើម្បីអ្វី? ល្បីធ្វើអ្នកមានមែន? ថតរឿងខ្លះ អ្នកផលិតជំពាក់ដល់ឥឡូវ…! ៦ទៅ៧ឆ្នាំ»។
លោកបន្តថា «ថតរឿងខ្លះ បើកឲ្យម្តងៗតិចៗ ត្រឹម៣០$ ឬ៥០$ ផ្ញើតាម wing ហើយកាត់លុយពីយើងទម្រាំដាច់លុយអស់ !។ ហើយអ្នក account ខ្លះ ឬអ្នកហៅតួរ ក៏សុំ 10$ ឬ20$ ជាថ្លៃទឹកតែពីលើ ពេលខ្លះមិនបានសុំយើង សម្រេចកាត់ក៏មាន!។ ថតខ្លះ សឹងតែយកតួរទៅលក់ឲ្យគេក៏មាន..! ក្រុមការងារខ្លះ និយាយមិនឲ្យតំលៃសិល្បករក៏មាន…!»។
លោក Sool Cool បានលើកឡើងបន្ថែមថា «បទពិសោធន៍រយៈពេល១៦ឆ្នាំ ១៧ឆ្នាំនេះ គឺមិនខ្ចី ហើយក៏មិនចាស់ដែរ សម្រាប់ខ្ញុំ ។ ថតរឿងខ្លះ សឹងមិនជឿថា តម្លៃមិត្តភាព ដែលសាងរាប់ឆ្នាំ បានត្រឹមតែ ៧០$ ឬ៨០$ ។ បើថតស្ពត កាលខ្ញុំចូលថតដំបូង គេឲ្យ៨០០០០រៀល ជា TVC ធំ ហើយ ៨០០០០រៀល គឺជាថ្លៃថតដាក់ banner តាមផ្លូវ! ។ ចឹងបានថា ការយោគយល់ គឺគ្មានតម្លៃសម្រាប់ការងារមួយនេះទេ យើងខ្លាចគេពិបាក តែពួកគេមិនបានទុកពួកយើងជាឆ្នាំងដែរ បានដាំបាយឲ្យគេហូបកន្លងមកទេ ! ហើយពេលនេះ ខ្ញុំក៏មិនសូវមានអារម្មណ៍អីដូចមុនទៀតដែរ ព្រោះនឿយចិត្ត…!»។
យ៉ាងណាម៉ិញ ក្រោយពីឃើញការបង្ហោះរៀបរាប់រឿងរ៉ាវខាងលើពីតារាសម្តែងលោក Sool Cool បានធ្វើឱ្យមហាជនសម្តែងការភ្ញាក់ផ្អើល និងសម្តែងការហួសចិត្តយ៉ាងខ្លាំង ត្បិតគេមិននឹកស្មានដល់ថា តារារូបនេះ ដែលមានឈ្មោះបោះសម្លេងនៅក្នុងវិស័យសិល្បៈម្នាក់ដែរ តែបែរជាជួបរឿងបែបនេះទៅវិញ ។
គួរបញ្ជាក់ផងដែរថា តារាសម្តែងលោក Sool Cool បានកសាងកេរ្តិ៍ឈ្មោះលើវិថីសិល្បៈអស់រយៈពេលជាច្រើនឆ្នាំមកហើយ ដោយលោកបានបង្ហាញវត្តមានសម្តែងជាបន្តបន្ទាប់ ជាពិសេសនោះ ក្រៅពីអាជីពសម្តែង លោកក៏ជាអ្នកច្នៃម៉ូតបែបខ្មែរបុរាណដ៏ប៉ិនប្រសព្វដែរ ហើយក៏ទទួលបានការកោតសសើរពីមហាជនទៀតផង៕
ចែករំលែកព័តមាននេះ