ចិនតែងតាំងរដ្ឋមន្ត្រីការពារជាតិថ្មីជំនួសលោកលី សាងហ្វូ
ទីក្រុងប៉េកាំង ៖ ប្រទេសចិនទើបតែតែងតាំងអតីតមេបញ្ជាការកងទ័ពជើងទឹក លោកតុងជុន
ទីក្រុងប៉េកាំង ៖ ប្រទេសចិនទើបតែតែងតាំងអតីតមេបញ្ជាការកងទ័ពជើងទឹក លោកតុងជុន
ទីក្រុងប៉េកាំង ៖ ប្រទេសចិនទើបតែតែងតាំងអតីតមេបញ្ជាការកងទ័ពជើងទឹក លោកតុងជុន (Dong Jun) ឱ្យកាន់តំណែងជារដ្ឋមន្ត្រីការពារជាតិថ្មីជំនួសលោកលីសាងហ្វ៊ូ (Li Shangfu) ដែលត្រូវដកតំណែងកាលពីខែតុលា។ ការតែងតាំងនេះស្របពេលដែលលោកស៊ីជីនពីង ប្រធានាធិបតីចិន អភិវឌ្ឍឈានឡើងនៃវិស័យការពារជាតិថែមមួយកម្រិតទៀត (upgrade) ដើម្បីធ្វើឱ្យប្រទេសចិនទៅជាមហាអំណាចលើសគេនៅលើពិភពលោកនាពេលអនាគត។ នេះជាការកំណត់គោលដៅដែលលោកទើបតែប្រកាសថ្មីៗនេះ ហើយបានធ្វើឱ្យប្រទេសជិតខាងភ្ញាក់ផ្អើលយ៉ាងខ្លាំង។
លោកតុងជុនសព្វថ្ងៃអាយុ៦២ឆ្នាំ លោកត្រូវបានតែងតាំងនៅចំពោះមុខគណៈកម្មការអចិន្ត្រៃយ៍នៃសភាប្រជាជនចិន។ ការងារសំខាន់របស់គាត់គឺត្រូវធ្វើយ៉ាងណាកាត់បន្ថយភាពតានតឹងយោធាចិន-អាមេរិកដើម្បីជៀសវាងជម្លោះប្រដាប់អាវុធដោយសារបញ្ហាតៃវ៉ាន់ និងបញ្ហាសមុទ្ទចិនខាងត្បូង។ ប៉ូលទាំងពីរនេះជាអ្វីដែលលោកតុងជុនធ្លាប់ឆ្លងកាត់ច្រើនមកហើយ។
មុននឹងក្លាយជាមេបញ្ជាការកងទ័ពជើងទឹកចិន លោកតុងជុនធ្លាប់កាន់តំណែងជាមេបញ្ជាការរងកងនាវាចរណ៍សមុទ្ទខាងកើត។ នោះជាកងទ័ពពិសេសនៅតំបន់ប្រតិបត្តិការសឹកខាងកើតសម្រាប់ចេញយុទ្ធនាការយោធាចំពោះកោះតៃវ៉ាន់។ លោកតុងក៏ធ្លាប់ធ្វើជាមេបញ្ជាការរងតំបន់ប្រតិបត្តិការសឹកខាងត្បូងដែលបំពេញបេសកកម្មនៅសមុទ្ទចិនខាងត្បូងផងដែរ។
លោកតុងអាចមានបទពិសោធដោះស្រាយបញ្ហាប្រឈមរវាងទាហានចិន និងអាមេរិក។ នេះជាកត្តាសំខាន់នៅពេលលោកត្រូវដោះស្រាយវិបត្តិរវាងកងទ័ពទាំងសងខាង។ ខាងលើនេះជាការលើកឡើងរបស់អ្នកសិក្សាស្រាវជ្រាវនៅសិង្ហបុរី។ រីឯអ្នកស្រាវជ្រាវម្នាក់ទៀតយល់ថាការជ្រើសរើសលោកតុងជុនជារដ្ឋមន្ត្រីការពារជាតិថ្មីអាចជាសញ្ញាបង្ហាញថាយុទ្ធនាការបោសសម្អាតផ្ទៃក្នុង (purge) នៅតែបន្តកើតមាននៅក្នុងនាយកដ្ឋានស្រាវជ្រាវគ្រាប់រ៉ុកកែត និងអភិវឌ្ឍគ្រឿងបរិក្ខារយោធាចិន។
អតីតរដ្ឋមន្ត្រីការពារជាតិពីររូបដែលធ្លាប់ធ្វើការនៅនាយកដ្ឋាននេះលែងឃើញមុខជាសាធារណៈជារៀងរហូត។ ប្រទេសចិនមិនបានពន្យល់បកស្រាយអំពីការបាត់មុខលោកលីសាងហ្វុងទេ។ ស្រាប់តែនៅខែតុលាឮថាគេដកតំណែងលោកបាត់ទៅហើយ។ មុននឹងឡើងតំណែងជារដ្ឋមន្ត្រីការពារជាតិកាលពីខែមីនា, លោកលីសាងហ្វុងធ្លាប់ធ្វើជាប្រធាននាយកដ្ឋានលទ្ធកម្មសម្ភារៈសឹក និងស្រាវជ្រាវ។ ចាប់ពីថ្ងៃទី២៥ ខែសីហា ឆ្នាំ២០២៣រហូតមក គេលែងឃើញមុខលោកជារៀងរហូត។
ទីភ្នាក់ងារព័ត៌មានរ៉យទ័រ (Reuters) និយាយយោងទៅលើប្រភពផ្ទៃក្នុងចិនដែលបង្ហើបឱ្យដឹងថាលោកលីសាងហ្វុងត្រូវដាក់ឱ្យស្ថិតនៅក្រោមការស៊ើបអង្កេតពាក់ព័ន្ធនឹងអំពើពុករលួយ។ នៅក្នុងឋានៈជារដ្ឋមន្ត្រីការពារជាតិ លោកលីពុំដែលជួបរដ្ឋមន្ត្រីការពារជាតិអាមេរិក ឡយអូស្ទីន (Lloyd Austin) ម្ដងណាទេ។ ក្រសួងការពារជាតិចិនទាមទារឱ្យវ៉ាស៊ីនតោនដកចេញទណ្ឌកម្មដែលដាក់ទៅលើលោកលីតាំងពីឆ្នាំ២០១៨ពីបទទិញយន្តហោះ និងគ្រឿងបរិក្ខារយោធាពីប្រទេសរុស្ស៊ី។
ដោយឡែក រដ្ឋមន្ត្រីការពារជាតិថ្មីរបស់ប្រទេសចិនមិនមានជាប់ជំពាក់នឹងភាពរសេមរសាមនៃការដាក់ទណ្ឌកម្មទេ។ កាលពីពេលជួបគ្នារវាងលោកបៃដឹន និងលោកស៊ីជីនពីងនៅវ៉ាស៊ីនតោនកាលពីខែវិច្ឆិកា ថ្នាក់ដឹកនាំទាំងពីរឯកភាពគ្នាថានឹងបន្តការសន្ទនាគ្នាឡើងវិញផ្នែកយោធា។ ទំនាក់ទំនងយោធាត្រូវព្យួរទុកចាប់តាំងពីអតីតប្រធានរដ្ឋសភាអាមេរិក លោកស្រីណាន់ស៊ី ផេឡូស៊ី (Nancy Pelosi) ទៅកោះតៃវ៉ាន់កាលពីខែសីហា ឆ្នាំ២០២២៕
ចែករំលែកព័តមាននេះ