នារីម្នាក់ប្ដឹ.ងគ្រូពេទ្យពីបទសម្រុ.កដ.កធ្មេញ និងប៉ះធ្មេញម្ដងជិត៣០ដើម
រដ្ឋមីនេសូតា សហរដ្ឋអាមេរិក ៖ នារីជនជាតិអាមេរិកម្នាក់រស់នៅរដ្ឋមីនេសូតា សម្រេចចិត្តដាក់
រដ្ឋមីនេសូតា សហរដ្ឋអាមេរិក ៖ នារីជនជាតិអាមេរិកម្នាក់រស់នៅរដ្ឋមីនេសូតា សម្រេចចិត្តដាក់
រដ្ឋមីនេសូតា សហរដ្ឋអាមេរិក ៖ នារីជនជាតិអាមេរិកម្នាក់រស់នៅរដ្ឋមីនេសូតា សម្រេចចិត្តដាក់ពាក្យប្ដឹងលោកគ្រូពេទ្យធ្មេញម្នាក់។ គ្រាន់តែចូលទៅគ្លីនិករបស់គាត់ម្ដង គាត់មិនមែនធ្វើធ្មេញទៅតាមដំណាក់កាលម្ដងបន្តិចៗទេ។ ប៉ុន្តែគាត់លេងសរុបម្ដងទាំងអស់តែម្ដង ដើម្បីកុំឱ្យខាតជើង។ គាត់ដកធ្មេញរបស់នាងអស់៤ដើម, ដាក់ធ្មេញសិប្បនិម្មិតចូល៨ដើម និងប៉ះធ្មេញ២០ដើម។ ក្រោយពេលទៅរកសេវារបស់លោកគ្រូពេទ្យរួច ទម្រង់ធ្មេញ និងថ្គាមរបស់នាងខូចទ្រង់ទ្រាយដើមអស់រលីង។
នាងខាស់ស្លីន វីលសុន (Kathleen Wilson) ដាក់ពាក្យប្ដឹងទៅតុលាការសាលាដំបូងដោយចោទប្រកាន់លោកទន្តបណ្ឌិតខេវីន ម៉ូលដ្រេម (Kevin Molldrem) ពីបទធ្វេសប្រហែសនៅក្នុងវិជ្ជាជីវៈរបស់ខ្លួន។ ហេតុការណ៍នោះបានកន្លងផុតទៅរាងច្រើនឆ្នាំដែរហើយតាំងពីខែកក្កដា ឆ្នាំ២០២០។ ប៉ុន្តែទំនងជាក្រោយការព្យាបាលដំបូងៗប្រហែលជាមិនមានបញ្ហាធ្ងន់ធ្ងរ។ដល់ពេលយូរៗទៅ, នាងរងផលប៉ះពាល់កាន់តែខ្លាំងពីសេវាព្យាបាលរបស់គាត់ ទើបនាងសម្រេចប្ដឹងទៅតុលាការតែម្ដង។
នៅក្នុងពាក្យបណ្ដឹងនោះ នាងបានរៀបរាប់អំពីការព្យាបាលមិនបានល្អ ធ្វើឱ្យនាងរងរបួស។ គាត់ចាក់ថ្នាំស្ពឹកច្រើនពេក និងក្លែងឯកសារពេទ្យដើម្បីបិទបាំងទង្វើព្យាបាលខុសឆ្គងរបស់គាត់។ មេធាវីរបស់នាងវីលសុនបានពឹងទន្តបណ្ឌិតម្នាក់នៅរដ្ឋផ្លរីដា (Florida) ដើម្បីពិនិត្យ និងវាយតម្លៃទៅលើការចេញសំបុត្រពេទ្យពីលោកទន្តបណ្ឌិតជាប់ចោទឈ្មោះខេវីន ម៉ូលដ្រេម (Kevin Molldrem) និងគ្រូពេទ្យដទៃទៀតដែលនាងទៅរកសេវាព្យាបាល។ យោងតាមការវាយតម្លៃនោះ ជនជាប់ចោទបានធ្វើខុសពីវិជ្ជាជីវៈគ្រូពេទ្យពិតមែន ខណៈដែលគាត់បើកសេវាព្យាបាលនេះមិនមែនតិចតួចនោះទេគឺម្ភៃឆ្នាំមកហើយ។
លោកទន្តបណ្ឌិតម៉ូលដ្រេមធ្វើត្រូវមួយមួយចំណុចត្រង់ពិនិត្យមើលសុខភាពមាត់ធ្មេញរបស់នាងវីលសុនឃើញថាពិតដូចក្នុងឯកសារធ្វើរោគវិនិច្ឆ័យមែន។ ក៏ប៉ុន្តែនៅពេលព្យាបាលធ្មេញនោះគាត់ខ្វះការយកចិត្តទុកដាក់។ ធ្វើខ្ជីខ្ជាឱ្យតែរួចពីដៃ។ ឯកសារបង្ហាញថានាងវីលសុនពុកធ្មេញសឹងតែទាំងអស់ដែលជាករណីកម្រនឹងកើតមាន។ នេះបើតាមការវាយតម្លៃរបស់ទន្តបណ្ឌិតហ្គោលស្តែន (Goldstein)។ ប៉ុន្តែចំណុចខុសឆ្គងត្រង់ថាលោកទន្តបណ្ឌិតម៉ូលដ្រេមប្រើប្រាស់វិធីព្យាបាលសរុបម្ដងទាំងអស់តែម្ដង។ គាត់មិនខ្វល់អំពីផលវិបាកនៃការដកធ្មេញ ដាក់ធ្មេញ និងប៉ះធ្មេញម្ដងសរុបចូលគ្នាបែបនេះទាល់តែសោះ។ ធ្វើអីចឹង អ្នកជំងឺអាចប្រឈមនឹងការអាប់សែជើងធ្មេញ ឬជំងឺក្លាយ។ ជួនកាលអាចធ្វើឱ្យខូចឫសធ្មេញក៏មាន។
ធ្មេញប្រហោងច្រើនដល់ថ្នាក់ហ្នឹង គាត់បែរជាបិទភ្ជិតស៊ីម៉ង់ក្នុងពេលតែមួយ។ ធ្វើបែបនេះមិនត្រឹមតែខុសវិជ្ជាជីវៈប៉ុណ្ណោះទេ ថែមទាំងគ្មានមនុស្សធម៌នៅក្នុងខ្លួនទាល់តែសោះ។ ទន្តបណ្ឌិតហ្គោលស្តែនយល់វាជារឿងហួសចិត្តដែលគ្រូពេទ្យខេវីន ម៉ូលដ្រេម (Kevin Molldrem) ប្រើពេល៥ម៉ោងកន្លះ សម្រុកដកធ្មេញផង, ដាក់ធ្មេញផង និងប៉ះធ្មេញផងចំនួន២៨ដើម។
ចំណុចខុសឆ្គងមួយទៀតនៅក្នុងវិជ្ជាជីវៈរបស់គាត់គឺលោកគ្រូពេទ្យបានប្រើប្រាស់ថ្នាំស្ពឹកខុសបច្ចេកទេស។ តាមក្បួនពេទ្យគេឱ្យប្រើប្រាស់ថ្នាំស្ពឹកយ៉ាងច្រើនបំផុតត្រឹម៤៩០មិល្លីក្រាម។ ប៉ុន្តែជាក់ស្ដែង លោកគ្រូចាក់ថ្នាំរហូតដល់៩៦០មិល្លីក្រាមឱ្យនាងវីលសុន។ ក្រោយមក នាងទៅគ្លីនិកដទៃទៀតដើម្បីពិនិត្យធ្មេញឡើងវិញ ឃើញថាធ្មេញនៅតែពុកដដែល។ រីឯកន្លែងខូចខាតដទៃទៀតក៏មិនបានជាសះស្បើយទាល់តែសោះ។ កន្លងផុតទៅជាច្រើនខែ នៅឆ្នាំ២០២២ នាងទៅរកសេវាព្យាបាលនៅគ្លីនិកសាកលវិទ្យាល័យមីនេសូតាដើម្បីកែសម្រួលឡើងវិញទៅលើទម្រង់ថ្គាម និងទម្រង់មុខ កុំឱ្យមានបញ្ហាតទៅទៀត។
យោងតាមទន្តបណ្ឌិតហ្គោលស្តែន បើនាងវីលសុនត្រូវដកធ្មេញធម្មជាតិចេញទាំងអស់ ហើយត្រូវដាក់ជំនួសដោយធ្មេញសិប្បនិម្មិតដោយដាំបង្គោលធ្មេញក្នុងឆ្អឹង (implant) មានន័យថារាល់ការចំណាយពេលវេលា និងថវិកាដើម្បីធ្វើធ្មេញនៅគ្លីនិករបស់លោកគ្រូពេទ្យរូបនោះនឹងក្លាយជារឿងអសារឥតការ។ ក្រៅពីចំណាយលុយលើការព្យាបាលធ្មេញ នាងវីលសុនប្រាប់ថានាងត្រូវទ្រាំឈឺចាប់នឹងមុខរបួស, ត្រូវប៉ះពាល់កេរ្តិ៍ឈ្មោះ, ត្រូវខូចទម្រង់ថ្គាម និងមុខអស់រលីង។ ដូច្នេះ នាងសូមប្ដឹងលោកគ្រូពេទ្យខេវីន ម៉ូលដ្រេម (Kevin Molldrem) ដើម្បីទារប្រាក់សំណងឱ្យបានយ៉ាងតិច៥ម៉ឺនដុល្លារទើបនាងសុខចិត្ត៕ (ប្រភព៖ Associated Press, CNN និងប្រភពដទៃទៀត)
ចែករំលែកព័តមាននេះ