តារាសម្តែងលោក រតនៈ ពិសិដ្ឋ បានបង្ហាញភាពសប្បាយរីករាយស្ទើរតែចង់ហោះ ក្រោយពេលដែលលោកបានជួបអតីតតារាសម្តែងជើងចាស់កាលពីទសវត្សរ៍ឆ្នាំ៨០ និងឆ្នាំ៩០ គឺអ្នកនាង សុខ ស្រីមុំ ដោយចៃដន្យនៅលើទឹកដី
រាជធានីភ្នំពេញ ៖ តារាសម្តែងលោក រតនៈ ពិសិដ្ឋ បានបង្ហាញភាពសប្បាយរីករាយស្ទើរតែចង់ហោះ ក្រោយពេលដែលលោកបានជួបអតីតតារាសម្តែងជើងចាស់កាលពីទសវត្សរ៍ឆ្នាំ៨០ និងឆ្នាំ៩០ គឺអ្នកនាង សុខ ស្រីមុំ ដោយចៃដន្យនៅលើទឹកដីសហរដ្ឋអាមេរិក ទីដែលលោកកំពុងសម្តែងឲ្យបងប្អូនខ្មែរសប្បាយនៅទីនោះ ។
នៅក្នុងជំនួបនោះ ក្រៅពីការថតរូបជុំគ្នាជាមួយអ្នកនាង សុខ ស្រីមុំ រួចហើយ លោក រតនៈ វិសិដ្ឋ ក៏បានសួរនាំពីសុខទុក្ខ និងការលើកសរសើរអំពីរូបសម្រស់របស់អតីតតារាសម្តែងដ៏ល្បីល្បាញរូបនេះ ជាមួយនឹងភាពសប្បាយរីករាយផងដែរ ។
តាមរយៈវីដេឃ្លីបខ្លីមួយ បង្ហោះនៅលើបណ្ដាញសង្គមនៅក្នុងជំនួបនោះ តារាសម្តែងលោក រតនៈ វិសិដ្ឋ បានលើកឡើងថា «លោកពិតជាសប្បាយរីករាយ និងរំភើបជាខ្លាំង ដោយសារលោកមិននឹកដល់ស្មានថា បានជួបអ្នកនាង សុខ ស្រីមុំ ដោយចៃដន្យនាពេលនេះ»។
លោកបញ្ជាក់ថា «អ្នកនាង សុខ ស្រីមុំ នៅតែស្រស់ស្អាត ហើយអ្នកនាង គឺជានិមិត្តរូប (Idol) របស់លោកតាំងពីលោកនៅក្មេងៗមកម្ល៉េះ។ ហើយរហូតមកទល់នាពេលនេះ រូបលោក និងទស្សនិកជនក្នុងស្រុកខ្មែរ នៅតែចងចាំមុខអ្នកនាងដដែល»។
ដោយឡែក ក្នុងជំនួបនោះដែរ លោក រតនៈ វិសិដ្ឋ ក៏បានសួរនាំទៅកាន់អ្នកនាង សុខ ស្រីមុំ ថា «តើអ្នកនាងមានគម្រោងទៅលេងស្រុកខ្មែរឬអត់?»។ ពេលនោះ អតីតតារាសម្តែងរូបនេះបានបញ្ជាក់ថា «អ្នកនាងគ្រោងទៅលេងស្រុកនាឆ្នាំក្រោយ ខណៈពេលដែលអ្នកស្រី ក៏ធ្លាប់មកស្រុកខ្មែរម្តងកាលពីអំឡុងឆ្នាំ២០០៧ដែរ» ។
ជាការកត់សម្គាល់ អ្នកនាង សុខ ស្រីមុំ គឺជាអតីតតារាភាពយន្តដ៏មានកេរ្តិ៍ឈ្មោះបោះសម្លេងនៅក្នុងប្រទេសកម្ពុជា កាលពីចុងទសវត្សរ៍ទី៨០ និងទសវត្សរ៍ទី៩០ ហើយអ្នកនាងមានទេពកោសល្យសម្ដែងយ៉ាងសាកសមល្អឥតខ្ចោះនៅក្នុងឈុតក្រមិចក្រមើម រឡិករឡក់ ក្និកក្នក់ គួរឱ្យស្ញើចសរសើរ។
អ្នកនាង សុខ ស្រីមុំ គឺជាកូនទី៤ ក្នុងចំណោមបងប្អូនចំនួន៦នាក់ ។ ហើយមុនពេលចាប់អាជីពជាតារាសម្ដែងភាពយន្ត អ្នកនាង សុខ ស្រីមុំ មានអតីតភាពជាអ្នកលក់បារី នៅត្រង់ម្ដុំអតីតរោងកុន «ឋានសួគ៌» (ផ្លូវកម្ពុជាក្រោម) ជិតសាលាបាក់ទូក ។ អ្នកនាង បានចូលប្រឡូកសិល្បៈភាពយន្តនៅឆ្នាំ១៩៨៩ រួមជំនាន់ស្របាលគ្នាជាមួយនឹងអ្នកស្រី អម្ពរទេវី ,អ្នកស្រី ចាន់ តារាទី, អ្នកស្រី អ៊ុំ សុវណ្ណនី, អ្នកស្រី ចាន់ សេរីរ័ត្ន និងអ្នកស្រី ឯក អមរា ជាដើម។
ចំពោះស្នាដៃដំបូងដែលអ្នកនាង សុខ ស្រីមុំ ចាប់ផ្ដើមល្បីឈ្មោះក្នុងពិភពសិល្បៈ និងធ្វើឱ្យទស្សនិកជនស្គាល់ច្បាស់នោះ គឺរឿង «កាត់បេះដូងដើម្បីបង» រួមសម្ដែងជាមួយតួឯកប្រុស គឺលោក សម តារា។ អ្នកនាង ក៏ធ្លាប់រួមសម្ដែងភាពយន្តជាមួយតួប្រុសជាច្រើនកាលពីជំនាន់នោះដែរ ដូចជា ៖ លោកទេព រិន្ទដារ៉ូ, លោក សម តារា, លោក ខៃ ប្រសិទ្ធ, លោក ពេជ្រ ភិរុណ, លោក យស បូវណ្ណៈ និងលោក សុវណ្ណ មុនី ជាដើម។
អ្នកនាង សុខ ស្រីមុំ បានចាកចេញពីមាតុភូមិទៅរស់នៅទឹកដីសហរដ្ឋអាមេរិកកាលពីខែកញ្ញា ឆ្នាំ១៩៩៤ រួមដំណើរជាមួយលោក យស បូវណ្ណៈ និងសិល្បករមួយចំនួនទៀត។ នៅទីនោះ ដំបូងឡើយ អ្នកនាងចេញច្រៀង ក្រោយមកទើបមានគេទាក់ទងឱ្យសម្ដែងជាចម្រៀងកាយវិការតែម្ដង។ ក្រៅពីនេះ អ្នកនាងត្រូវប្រកបមុខរបរផ្សេងទៀតបន្ថែមលើអាជីពសិល្បៈ ដើម្បីរកប្រាក់ចំណូលផ្គត់ផ្គង់ជីវភាព។
ក្រោយមក អ្នកនាង សុខ ស្រីមុំ បានរៀបអាពាហ៍ពិពាហ៍ជាលើកដំបូងជាមួយលោក ខៃ ចាន់តារា ហៅ អ៊ួក នៅឆ្នាំ១៩៩៣ ប៉ុន្ដែពួកគេទាំង២នាក់ក៏បានលែងលះគ្នាវិញ ក្រោយពីទៅរស់នៅសហរដ្ឋអាមេរិកបានប៉ុន្មានឆ្នាំ ដោយបន្សល់ទុកកូនប្រុសម្នាក់ ។ លុះនៅឆ្នាំ២០០០ អ្នកនាង ក៏បានជួបជាមួយស្វាមីក្រោយ ដែលជាជនបរទេស ហើយមានអាជីពជាផលិតករភាពយន្ដនៅសហរដ្ឋអាមេរិកតែម្ដង។ ហើយសព្វថ្ងៃនេះ អ្នកនាង សុខ ស្រមុំ កំពុងតែរស់នៅរដ្ឋកាលីហ្វញ៉ា សហរដ្ឋអាមេរិក ដែលគិតមកដល់ពេលនេះ គឺអ្នកនាងមានវ័យប្រមាណ៥០ឆ្នាំមកហើយ ៕
ចែករំលែកព័តមាននេះ