តារាសម្តែងនាង វល្លិក បានសម្រេចផ្អាកការងារថតភាពយន្តភាគចាក់ផ្សាយតាមទូរទស្សន៍មួយរយៈ ដោយសារតែនាងត្រូវងាកទៅពង្រឹងការងាររកស៊ីផ្ទាល់ខ្លួនរបស់នាង ដែលទើបតែចាប់ផ្តើមដំណើរការ ។ ជំនួញថ្មីមួយនេះ គឺជាហេតុផលធ្វើអោយស្រីស្អាត
រាជធានីភ្នំពេញ ៖ តារាសម្តែងនាង វល្លិក បានសម្រេចផ្អាកការងារថតភាពយន្តភាគចាក់ផ្សាយតាមទូរទស្សន៍មួយរយៈ ដោយសារតែនាងត្រូវងាកទៅពង្រឹងការងាររកស៊ីផ្ទាល់ខ្លួនរបស់នាង ដែលទើបតែចាប់ផ្តើមដំណើរការ ។ ជំនួញថ្មីមួយនេះ គឺជាហេតុផលធ្វើអោយស្រីស្អាត វល្លិក ពិបាកក្នុងការបែងចែកពេលវេលា ខណៈពេលដែលនាងត្រូវចាំបាច់យកពេលវេលាអោយច្រើនទៅលើការពង្រឹងមុខរបរថ្មីរបស់នាង ។
តារាសម្តែងសាច់.សខ្ចី ផាន់ មិនា ហៅ វល្លិក បានអះអាងប្រាប់កោះសន្តិភាពតាមសារអេឡិចត្រូនិចថា «ដោយសារនាងត្រូវទុកពេលវេលាអោយបានច្រើនទៅលើមុខរបររកស៊ីនៅក្រុមហ៊ុនភេសជ្ជៈមួយនោះ នាងក៏សម្រេចចិត្តផ្អាកការសម្តែងរឿងភាគមួយរយៈសិន»។
នាងបញ្ជាក់ថា «សម្រាប់រឿងភាគចុងក្រោយដែលនាងសម្តែងនោះ គ្រោងនឹងចាក់ផ្សាយនៅស្ថានីយទូរទស្សន៍ PNN ឆាប់ៗនេះ មុនពេលដែលនាងត្រូវផ្អាកមួយរយៈទៅលើការងារសម្តែងនេះ»។
នាងបន្តថា «ការងាររកស៊ីថ្មីនេះ នាងពិតជាការមមាញឹកខ្លាំង ហេតុនេះហើយនាងត្រូវបែងចែកពេលវេលា ដោយនាងអាចទៅណាបានគឺទៅនឹង ប៉ុន្តែសម្រាប់ការងារថតរឿងភាគ គឺនាងសម្រេចផ្អាកមួយរយៈសិន»។
ដោយឡែកសម្រាប់ការចូលរួមប្រឡងកម្មវិធី «Miss Grand Cambidia» នាឆ្នាំនេះ តារាស្រីរូបនេះ បានអះអាងប្រាប់ឱ្យដឹងដែរថា «នាងអាចចែកវេលាបាន ព្រោះកម្មវិធីប្រកួតដំបូងក្នុងរាជធានីភ្នំពេញ វាមិនសូវជាមមាញឹកខ្លាំងដែរ ប៉ុន្តែសម្រាប់ការងារថតនោះ គឺត្រូវប្រើពេលវេលាច្រើនជាងនេះ»។
ចំណែកការចូលរួមប្រកួតកម្មវិធីខាងលើ ត្រូវបានតារាស្រីរូបនេះ បញ្ជាក់ឱ្យដឹងថា «នេះជាលើកទី១ហើយ ដែលនាងចូលរួមប្រកួតទៅលើផ្នែកបវរកញ្ញា ក្នុងពេលដែលនាងក៏ចង់សាកសមត្ថភាពលើវិថីមួយនេះដែរ»។
ស្រីស្អាត វល្លិក បញ្ជាក់ទៀតថា «គោលបំណងដែលនាងចូលរួមប្រកួតកម្មវិធីខាងលើនេះ គឺចង់បញ្ចេញសមត្ថភាពខ្លួនដែលមាន ហើយក៏ចង់ចាប់អាជីពមួយនេះបន្ថែមទៀតដែរ ដោយសារកន្លងមក នាងក៏ធ្លាប់រៀនសូត្របញ្ចប់លើផ្នែកដើរម៉ូតនេះដែរ»។
នាងបន្ថែមថា «កន្លងមក នាងក៏មានចិត្តស្រឡាញ់លើអាជីពដើរម៉ូតនេះដែរ ប៉ុន្តែដោយសារនាងត្រូវជាប់ថត ទើបដាច់ពីការងារនេះមួយរយៈ តែពេលនេះនាងសម្រេចផ្អាកការសម្តែងសិន ដោយងាកទៅរកអាជីពដើរម៉ូតវិញ តាមរយៈការដាក់ពាក្យប្រឡងក្នុងកម្មវិធីខាងលើនេះ»។
នាងបញ្ជាក់ថា «សម្រាប់កម្មវិធី Miss Grand នេះ បច្ចុប្បន្ននៅស្រុកខ្មែរយើង គឺមានការផ្ទុះខ្លាំង ហើយបេក្ខនារីដែលជាប់ Top នៅក្នុងកម្មវិធី គឺចេញមកខ្លាំង ហើយនឹងមានការងារច្រើន។ កម្មវិធីនេះទៀតសោត ក៏ឈានដល់ឆាកអន្តរជាតិ ដែលផ្តល់ឱកាសអោយយើងអាចបញ្ចេញនូវសមត្ថភាពដែលមានបង្ហាញបរទេសអោយបានដឹងថា ស្ត្រីកម្ពុជាពិតជាមានសមត្ថភាពអាចធ្វើបាន រួមទាំងមានរូបសម្រស់ស្រស់ស្អាតផងដែរ» ។
បើតាមស្រីស្អាត វល្លិក បន្តថា «សម្រាប់ការចូលរួមប្រកួតកម្មវិធី Miss Grand នាឆ្នាំនេះ គឺនាងបានដាក់ការសង្ឃឹមច្រើនសម្រាប់ភាពជោគជ័យ ព្រោះនាងអាចដឹងពីសមត្ថភាពរបស់នាងផ្ទាល់មុនពេលដាក់ពាក្យប្រឡង ខណៈពេលដែលនាងក៏ទើបតែបញ្ចប់ការសិក្សាថ្នាក់បរិញ្ញាបត្រផងដែរ»។
ស្រីស្អាត វល្លិក បន្តទៀតថា «ទោះបីជាយ៉ាងក៏ដោយ ប្រសិនបើការប្រកួតនេះ នាងមិនទទួលបានជោគជ័យទេនោះ នាងក៏មិនតូចចិត្ត ឬអស់សង្ឃឹមអ្វីឡើយ ព្រោះនេះចាត់ទុកថា ជាលើកដំបូងសម្រាប់នាង ហើយនាងក៏ទទួលបានបទពិសោធន៍ថ្មីលើវិស័យមួយនេះ ខណៈពេលដែលនាងនឹងអាចស្វែងរកឱកាសសម្រាប់ការចូលរួមប្រកួតលើកក្រោយៗទៀតផងដែរ» ៕
ចែករំលែកព័តមាននេះ