ស្រីស្អាត ហេង គីមស៊័រ ឬ ជីហ្ស័ង គឺជាតារាថ្មីដែលកំពុងរះនៅលើអាជីពសម្តែង ខណៈពេលតារារូបនេះទើបតែចូលប្រឡូកក្នុងវិថីសិល្បៈបានប្រមាណជាង១ឆ្នាំចុងក្រោយនេះតែប៉ុណ្ណោះ ក្នុងនោះផងដែរ នាងក៏សម្តែងបាន
រាជធានីភ្នំពេញ ៖ ស្រីស្អាត ហេង គីមស៊័រ ឬ ជីហ្ស័ង គឺជាតារាថ្មីដែលកំពុងរះនៅលើអាជីពសម្តែង ខណៈពេលតារារូបនេះទើបតែចូលប្រឡូកក្នុងវិថីសិល្បៈបានប្រមាណជាង១ឆ្នាំចុងក្រោយនេះតែប៉ុណ្ណោះ ក្នុងនោះផងដែរ នាងក៏សម្តែងបានចំនួនជិត២០រឿងទៅហើយ ។
អ្នកនិយមតាមដានភាពយន្តខ្មែរ ជាពិសេសភាពយន្តភាគ ប្រាកដជាបានស្គាល់ច្បាស់ពីកញ្ញា ហេង គីមស៊័រ ដែលជាតារាវ័យក្មេងរូបស្រស់រូបនេះ គឺជាតួឯកស្រីនៅក្នុងរឿង «ពូក្មេងជាទីស្រឡាញ់» ហើយកំពុងតែចាក់ផ្សាយនៅលើកញ្ចក់ទូរទស្សន៍បាយ័ន ។
ថ្លែងប្រាប់កោះសន្តិភាពតាមសារអេឡិចត្រូនិច តារាសម្តែងវ័យ២១ឆ្នាំ គឺកញ្ញា ហេង គីមស៊័រ បានលើកឡើងថា «នាងបានចូលប្រឡូកសិល្បៈតាំងពីអំឡុងឆ្នាំ២០២២ តាមរយៈ agency មួយ តែនាងសុំមិនបញ្ចេញឈ្មោះ ដោយសារពេលនេះ នាងបានបញ្ចប់កុងត្រាពីទីនោះហើយ» ។
នាងបញ្ជាក់ថា «រយៈពេលដែលនាងបានប្រឡូកក្នុងសិល្បៈនេះ គឺនាងបានចូលរួមសម្តែងបានប្រមាណជិត២០រឿងហើយ ដោយនៅក្នុងនោះមានទាំងរឿងខ្នាតធំចាក់ផ្សាយតាមរោងភាពយន្ត និងរឿងភាគចាក់ផ្សាយតាមទូរទស្សន៍»។
នាងបន្តថា «សម្រាប់រឿងដែលធ្លាប់សម្តែង និងទទួលការគាំទ្រនោះ មានដូចជា ៖ រឿង «ពពក រស់ដើម្បីអ្វីពួក» «យើងជាគូ ហាមបិទភ្នែក» និងរឿង «Mr. Take care» ។ល។ ចំណែករឿងភាគដែលកំពុងចាក់ផ្សាយតាមទូរទស្សន៍នោះ មានរឿង «ពូក្មេងជាទីស្រឡាញ់» និងរឿង «សុបិន្តស្នេហ៍ឆ្លងឋាន»។ ហើយបច្ចុប្បន្ននាងកំពុងជាប់កុងត្រាថតរឿងថ្មីឲ្យស្ថានីយទូរទស្សន៍ PNN ផងដែរ» ។
តារាសម្តែងដែលមានដើមកំណើតក្នុងស្រុកស្អាង ខេត្តកណ្តាល ស្រីស្អាតនាង ហេង គីមស៊័រ បានលើកឡើងបន្ថែមថា «ការចាប់អាជីពសម្តែងរបស់នាងនាពេលនេះ គឺជាការស្រឡាញ់ចូលចិត្តរបស់នាងតាំងពីតូច ហើយដោយសារការមានដុងខ្លះ និងការជួយបង្ហាត់បង្ហាញពី agency ផងនោះ ធ្វើឲ្យរូបនាងមានឱកាសសម្តែងបានរហូតមកដល់នាពេលនេះ» ។
យ៉ាងណាម៉ិញ បើតាមស្រីស្អាត ហេង គីមស៊័រ បញ្ជាក់ថា «ការចាប់អាជីពជាតារាសម្តែងនាពេលនេះ នាងហាក់មិនសូវជួបឧបសគ្គច្រើនឡើយ ក្រៅតែពីការចំណាយពេលថតរហូតដាច់យប់ ប៉ុន្តែទាំងនេះ មិនមែនជាបញ្ហាសម្រាប់រូបនាងឡើយ» ។
ទោះបីជាយ៉ាង បើទោះបីជាកំពុងមានទីផ្សារច្រើនទៅលើការសម្តែងនាពេលនេះក៏ដោយ ប៉ុន្តែសម្រាប់ស្រីស្អាត ហេង គីមស៊័រ បានដាក់គោលដៅនាពេលអនាគតផ្សេងវិញថា នាងចង់ក្លាយជាអ្នកនិពន្ធ និងអ្នកដឹកនាំរឿង ព្រោះនាងក៏មានចិត្តស្រឡាញ់ទៅលើផ្នែកនេះផងដែរ ។
តារារូបនេះបញ្ជាក់ថា «ដោយសារមានចិត្តស្រឡាញ់នូវការនិពន្ធ និងដឹកនាំរឿងនេះ បច្ចុប្បន្ននាងកំពុងតែសិក្សា និងដុះខាត់ខ្លួនឯងទៅលើជំនាញនេះ ហើយនាងក៏ចង់ដឹងពីសមត្ថភាពខ្លួនឯងថា ធ្វើអីបានខ្លះ »។
តារារូបនេះបញ្ជាក់ទៀតថា «យ៉ាងណា សម្រាប់គោលដៅខាងលើនេះ នាងនៅមិនទាន់អាចថានឹងសម្រេច និងចាប់ផ្តើមនៅក្នុងអំឡុងពេលណាមួយឡើយ ដោយសារតែនាងនៅក្មេងខ្ចី ហើយណាមួយនាងត្រូវរង់ចាំការសម្តែងរបស់នាងឲ្យបានឆ្អិនជាងនេះជាមុនសិន»។
ដោយឡែកពាក់ព័ន្ធទៅនឹងបញ្ហាស្នេហាវិញ តារាសម្តែងជាកូនទោលក្នុងគ្រួសារនាង ហេង គីមស៊័រ បានអះអាងថា «បច្ចុប្បន្ន នាងមិនទាន់មានបុរសណាម្នាក់ក្នុងចិត្តនៅឡើយទេ ហើយក៏មិនមានបុរសណាមកសុំស្នេហ៍រញ៉េរញ៉ៃដែរ បើទោះបីជាពេលនេះ នាងមានឈ្មោះជាតារាម្នាក់ក៏ដោយ។ ទោះជាយ៉ាងណា បញ្ហាស្នេហ៍នេះ នាងនៅមិនទាន់គិតនៅឡើយទេ នៅក្នុងអំឡុងពេលដែលនាងមិនទាន់អាចសម្រេចក្តីស្រមៃលើវិថីសិល្បៈនៅឡើយ ប៉ុន្តែនាងក៏មិនអាចកំណត់ច្បាស់ពីបញ្ហាគូរអនាគតនេះដែរ» ៕
ចែករំលែកព័តមាននេះ