នៅកម្ពុជា តម្លៃបន្ទប់ស្នាក់នៅតាមសណ្ឋាគារដែលថ្លៃ ហើយប្រណីតបំផុត គឺមានត្រឹមខ្ទង់ម៉ឺនដុល្លារប៉ុណ្ណោះនៅក្នុងមួយយប់ ប៉ុន្តែនៅលើពិភពលោកវិញ តម្លៃស្នាក់នៅសណ្ឋាគារប្រណីតបំផុតមួយយប់ថ្លៃដល់ទៅខ្ទង់សែនដុល្លារឯណោះ
នៅកម្ពុជា តម្លៃបន្ទប់ស្នាក់នៅតាមសណ្ឋាគារដែលថ្លៃ ហើយប្រណីតបំផុត គឺមានត្រឹមខ្ទង់ម៉ឺនដុល្លារប៉ុណ្ណោះនៅក្នុងមួយយប់ ប៉ុន្តែនៅលើពិភពលោកវិញ តម្លៃស្នាក់នៅសណ្ឋាគារប្រណីតបំផុតមួយយប់ថ្លៃដល់ទៅខ្ទង់សែនដុល្លារឯណោះ។
សណ្ឋាគារទាំងអស់នោះ កម្មវិធីលុយសូមបង្ហាញដូចខាងក្រោម ដើម្បីជាចំណេះដឹងទូទៅ ប៉ុន្តែកុំប្រាថ្នាអី ពីព្រោះវាថ្លៃខ្លាំងពេកហើយ។
១- សណ្ឋាគារ Lover’s Deep Luxury Submarine ៖
ជាសណ្ឋាគារជាប់លំដាប់ថ្នាក់លេខ១ ដែលថ្លៃបំផុតនៅលើពិភពលោក មានទីតាំងស្ថិតនៅកោះ សាំង លូសៀ (St Lucia) កណ្តាលសមុទ្រការ៉ាប៊ីន ។ តម្លៃបន្ទប់ស្នាក់នៅសណ្ឋាគារនេះ គឺក្នុងមួយយប់ មានតម្លៃដល់ទៅ២៣៣.៨០០ដុល្លារ ដោយសារតែវា គឺជាសណ្ឋាគារផ្តល់ការស្នាក់នៅដល់ភ្ញៀវនៅបាតសមុទ្រ ដែលមានផ្ទាំងទស្សនីយភាពនានា ហើយក៏មានផ្តល់ជូនមីនីបា និងចុងភៅផ្ទាល់ខ្លួនផងដែរ។
២- សណ្ឋាគារ Palms Casino Resort Empathy Suite ៖
ជាសណ្ឋាគារប្រណីតបំផុតមួយ ដែលមានទីតាំងនៅទីក្រុងឡាសវេហ្គា (Las Vegas) សហរដ្ឋអាមេរិក ។ សម្រាប់តម្លៃស្នាក់នៅសណ្ឋាគារនេះ គឺនៅក្នុងមួយយប់ មានតម្លៃរហូតដល់ទៅ ១៥៥.៩០០ដុល្លារ ។ បន្ទប់សណ្ឋាគារនេះ មិនមានអ្វីប្លែកណាស់ណាទេ ប៉ុន្តែជាទូទៅ គេដឹងថា ជាកន្លែងបន្ទប់ឯកជនរបស់ក្រុមអ្នកមានលុយ និងតារាល្បីៗ រីឯសម្ភារៈដែលប្រើប្រាស់វិញ គឺសុទ្ធតែរបស់ប្រណីត ។
៣- សណ្ឋាគារ Wilson Royal Penthouse Suite ៖
ជាសណ្ឋាគារដែលមានទីតាំងនៅទីក្រុងហ្សឺណែវ ប្រទេសស្វីស ។ តម្លៃស្នាក់នៅសណ្ឋាគារនេះ គឺមានតម្លៃប្រមាណជា ១២៥.៧០០ដុល្លារ ក្នុងមួយយប់។ មូលហេតុដែលវាថ្លៃ គឺដោយសារតែសណ្ឋាគារនេះ ត្រូវបានកសាងឡើងតាមទិដ្ឋភាពបែប Panoramic ហើយមានទីតាំងអាចមើលឃើញទិដ្ឋភាពដ៏អស្ចារ្យនៃបឹងហ្សឺណែវ និងភ្នំទឹកកក Mont Blanc ជាពិសេសគឺវាមានជណ្តើរយន្តឯកជន និងផ្តល់ជូនចុងភៅឯកជន២៤ម៉ោង ។
៤- សណ្ឋាគារ the Mark Penthouse, the Mark Hotel ៖
ជាសណ្ឋាគារមានទីតាំងនៅទីក្រុងញូវយ៉ក សហរដ្ឋអាមេរិក ។ តម្លៃនៃការស្នាក់នៅសណ្ឋាគារនេះ គឺមួយយប់ មានតម្លៃប្រមាណជា ១១៧.៨០០ដុល្លារ។ តម្លៃនេះ បូកបញ្ចូលកន្លែងប្រជុំធំមួយ បន្ទប់គេងឯកជន៥ បន្ទប់ទឹក៦ ផ្ទះបាយចំនួន៤ កន្លែងស្ទីមចំនួន២ និងបន្ទប់តុបតែងខ្លួនចំនួន២ ។
៥- សណ្ឋាគារ Ty Warner Penthouse ៖
ជាសណ្ឋាគារប្រណីតលំដាប់កំពូលទី៥ ដោយនៅក្នុងមួយយប់ មានតម្លៃ ៩១.៣០០ដុល្លារ។ ទីតាំងសណ្ឋាគារនេះ ក៏ស្ថិតនៅក្នុងទីក្រុងញ៉ូវយក សហរដ្ឋអាមេរិកផងដែរ ។
បន្ទប់នេះពិសេស និងមានតម្លៃថ្លៃ ដោយសារតែវាមានលក្ខណៈពិសេស ដែលមានទេសភាពសិប្បនិម្មិតជាទឹកជ្រោះធ្លាក់ហូរតាមជញ្ជាំងអត់ដាច់ និងមានកន្លែងឈរមើលទេសភាពដ៏ស្រស់ត្រកាល ដែលសមស្របសម្រាប់ជីវិ.តជាលក្ខណៈឯកជនរបស់អភិជន ឬក៏លំដាប់សេដ្ឋី ។
អត្ថបទដោយ ៖ ស ផាត់
ចែករំលែកព័តមាននេះ