រាជធានីភ្នំពេញ ៖ នៅពេលដែលលឺពាក្យថា ឆ្ងាញ់ៗ ហូរទឹកមាត់៤ទៅ៥ប៉ោតនោះ បងប្អូនមហាជនអាចនឹងស្គាល់ស្រីស្រស់រដឺនស្រអែមរូបស្រស់ ឆម ស្រផាច បានហើយ ដោយកាលពីពេលកន្លងទៅ ស្រីស្រស់រូបនេះបានធ្វើអោយកក្រើកឆាកអកកេះអកកាដង់ផងដែរ តាមរយៈសម្លេងផ្អែមស្រទន់ ដែលជាអំណោយផលពីធម្មជាតិរបស់កញ្ញានោះ។
ជាថ្មីម្តងទៀត ធ្លាប់តែឃើញកញ្ញា ស្រផាច ធ្វើម្ហូបក្បែរផ្ទះ ក្បែរជើងភ្នំ ស្រាប់តែពេលនេះកញ្ញាដាក់បទបែបសេដៗ អមដោយភ្លេងហ្គីតាតិចៗនោះ កំពុងតែឆាបឆក់បេះដូង និងអង្រួនចិត្តប្រិយមិត្តជាថ្មីតាមរយៈបទ «ត្រៀមចិត្តសម្រាប់ឈឺ» ឬ «ឈឺចាប់ប៉ុណ្ណាក៏ទ្រាំ» ដោយម្ចាស់បទ សុវណ្ណ សូនីតា នោះ។
ក្រោយការបកស្រាយនៅចម្រៀងមួយនេះ ធ្វើអោយមហាជនសរសើរពីសម្លេងរបស់កញ្ញាមិនដាច់ពីមាត់ផងដែរ ដោយមហាជនខ្លះបានលើកឡើងថា «ចុម ! ចែចាង៉ាញ់តើ ច្រៀងអេមរបស់គាត់» និងខ្លះទៀតលើកឡើងថា «ពេលច្រៀងមិនរដឺនដូចពេលនិយាយ ហើយពីរោះ»។
តាមរយៈបទចម្រៀងមួយនេះ ធ្វើអោយកញ្ញាស្រីផាច កាន់តែទទួលបាននៅការគាំទ្រខ្លាំងបន្ថែមទៀត ព្រោះកាលពីកន្លងទៅជាច្រើនបទ ដែលកញ្ញាបកស្រាយទៅទទួលបាននៅការចាប់អារម្មណ៍ ដូចជាបទ «សង្សារ ២៥០០» ដែលច្រៀងជាមួយចម្រៀងអកកេះអកកាដង់ ដោយម្ចាស់បទអ្នកនាង ឱក សុគន្ធកញ្ញា និងបទ «ធ្វើម្តេចខ្ញុំមិនស្អាតដូចគេ» ដែលជាបទរបស់អ្នកនាង មាស សុខសោភា ផងដែរនោះ។
តាមរយៈបទសម្ភាសន៍ជាមួយសារព័ត៌មានកោះសន្តិភាព ស្រីស្រស់រដឺនមានស្នេហ៍ កញ្ញា ឆម ស្រីផាច ដែលពូកែធ្វើម្ហូប និងតែងតែនិយាយថាឆ្ងាញ់ៗនោះ បានប្រាប់ឱ្យដឹងថា «កញ្ញាមិនធ្លាប់មានក្តីស្រមៃជាតារាចម្រៀងនោះឡើយ ព្រោះសមត្ថភាពរបស់កញ្ញានៅមានកម្រិតនៅឡើយ ហើយកញ្ញាក៏មានគោលដៅផ្សេងពីនេះ អាចថាជាការធ្វើម្ហូបអោយបងប្អូនបានទស្សនា »។
ហើយចំពោះការបកស្រាយទៅពីរោះ ក៏ដូចជាទទួលបាននូវការគាំទ្រនោះ កញ្ញាប្រាប់ឱ្យដឹងថា «កញ្ញាស្រឡាញ់ចូលចិត្តចម្រៀង ដោយពេលជួបជុំគ្រួសារ បងប្អូន មិត្តភក្តិ ឬមានកម្មវិធីអ្វីផ្សេងៗនោះ កញ្ញាតែងតែច្រៀងលេងកម្សាន្ត ក៏ដូចជាយ៉ាំងបរិយាកាសអោយទទួលបាននៅភាពអ៊ូអរ សប្បាយរីករាយនៅក្នុងកម្មវិធីនោះ»។
កញ្ញា ឆម ស្រី ផាច ដែលមានវ័យ២៥ឆ្នាំ រូបនេះបានប្រាប់បន្តថា «សម្រាប់ការច្រៀង កញ្ញា រៀងយ៉ាក់បន្តិចដែរ តែកញ្ញាចេះតែខំទៅ ហើយកញ្ញាក៏សុំអភ័យទោសម្រាប់កំហុសឆ្គងជាអចេតនាផងដែរ»។
គួររលឹកផងដែរថា ជាក្មេងស្រីធម្មតាម្នាក់ បានវិវឌ្ឍន៍ខ្លួនសឹងតែ៣៦០ដឺក្រេ ត្រឹមតែមួយពេលដ៏ខ្លី ដោយសារមានការគាំទ្រពីមនុស្សរាប់សិបលាននាក់ ដែលគាំទ្រពីការធ្វើម្ហូបរបស់កញ្ញា។
ជាចុងក្រោយ ស្រីស្រស់ ឆម ស្រីផាច ក៏មានសារផ្តាំផ្ញើសម្រាប់មហាជន ដោយកញ្ញាបានលើកទឹកចិត្តដល់មនុស្សជុំវិញខ្លួនថា «ត្រូវព្យាយាមធ្វើដែលខ្លួនស្រឡាញ់ កុំឆាប់បោះបង់នូវអ្វីដែលជាក្តីស្រមៃរបស់ខ្លួនឯង ត្រូវធ្វើអ្វីមួយដែលភាពជឿជាក់ និងទំនុកចិត្ត ទើបទទួលបានភាពជោគជ័យ» លើសពីនេះ ស្រីស្រស់រូបនេះ ក៏អរគុណដល់ហ្វេនៗដែលតែងតែគាំទ្រវីដេអូរបស់កញ្ញាផងដែរ៕ ដោយ ៖ លីហួ គីមឆាយ
ចែករំលែកព័តមាននេះ