រដ្ឋមន្ត្រីក្រសួងការងារ នឹងជំរុញឱ្យរោងចក្រ សហគ្រាស ទទួលយកជនមានពិការភាពធ្វើការឱ្យបាន ៣%
- ភ្នំពេញ
រាជធានីភ្នំពេញ ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី ១១ ខែធ្នូ…
រាជធានីភ្នំពេញ ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី ១១ ខែធ្នូ ឆ្នាំ ២០២៣ នេះ បានលើកឡើង ថាក្រសួងនឹងធ្វើការជាមួយដៃគូពាក់ព័ន្ធដើម្បីជំរុញឱ្យរោងចក្រសហគ្រាសទទួលយកជនមានពិការភាពឱ្យបាន ៣% ចូលក្នុងប្រតិបត្តិការ ។ ការថ្លែងយ៉ាងដូចនេះរបស់ឯកឧត្តមរដ្ឋមន្ត្រីក្នុងពេលដែលលោកអញ្ជើញចូលរួមជាអធិបតីក្នុងពិធីបិទបញ្ចប់គម្រោងស្តីពីទីផ្សាការងារប្រកបដោយបរិយាបន្នគាំទ្រដល់អ្នកស្វែងរកការងារធ្វើដែលមានពិការភាពដែលធ្វើឡើងនៅសណ្ឋាគារហៃយ៉ាត់ រីជិនស៊ី ភ្នំពេញ ។
ឯកឧត្តមរដ្ឋមន្ត្រី ៖ នៅពេលដែលយើងរៀបចំប្រណាំងប្រជែងសហគ្រាសមួយជាសហគមន៍សុខសាន្តមួយនេះ យើងនឹងដាក់បញ្ចូលលក្ខខ័ណ្ឌថា សហគ្រាស ឬរោងចក្រណាដែលមានប្រើជនមានពិការភាពលើសពី៣%យើងចាត់ទុកថាជាសហគ្រាសមួយល្អ ។ តាមរយៈយន្តការនេះយើងរំពឹងថា បងប្អូនដែលមានពិការភាពនឹងត្រូវបានវិស័យឯកជនពិចារណា ។ យើងត្រូវធ្វើឱ្យចំវិស័យដែលនាំចេញ ។
ការជំរុញរបស់ឯកឧត្តមរដ្ឋមន្ត្រីនេះ គឺស្របពេលដែលចំនួនចូលធ្វើការរបស់ជនមានពិការភាពទាំងអស់នៅទូទាំងប្រទេសនៅមានកម្រិតនៅឡើយ ។ សម្រាប់ឯកឧត្តមរដ្ឋមន្ត្រី ក្រសួងការងារ និងបណ្តុះបណ្តាលវិជ្ជាជីវៈ និងបន្តធ្វើការជាមួយរោងចក្រសហគ្រាសបន្តទៀត ដើម្បីបង្ករលក្ខណៈបត់បែនសម្រាប់ជនមានពិការភាពអាចចូលធ្វើការបន្ថែមទៀតទៅតាមជំនាញផ្សេងទៀតដូចជាអ្នកទទួលនិងលើកទូរស័ព្ទ និងកិច្ចការងារមិនប្រើប្រាស់កម្លាំងផ្សេងៗទៀតដើម្បីអាចឱ្យបងប្អូនជនជនពិការទាំងអស់អាចទទួលបានការងារសមរម្យ និងមានជីវភាពកាន់តែប្រសើរ ។
បន្ថែមពីនេះ ឯកឧត្តមរដ្ឋមន្ត្រី ក៏បានជំរុញឱ្យបងប្អូនមានពិការភាពអាចសំឡឹងមើលជំនាញវិជ្ជាជីវៈដែលរាជរដ្ឋាភិបាលបានប្រកាសផ្តល់ជូនបងប្អូនមកពីគ្រួសារក្រីក្រ និងងាយរងហានិភ័យដែលស្របតាមលទ្ធភាពក្នុងការពង្រឹងសមត្ថភាពចំណេះជំនាញរបស់ខ្លួន ។
ទោះបីជាបែបណាក៏ដោយ ឯកឧត្តមរដ្ឋមន្ត្រី បានលើកទឹកចិត្តដល់ជនមានពិការភាពទាំងអស់ មិនត្រូវអស់សង្ឃឹម ហើយត្រូវតស៊ូជំនះរាល់ការលំបាកនានាដើម្បីចូលរួមជាមួយរាជរដ្ឋាភិបាលក្នុងការកសាងសង្គមជាតិដែលមិនមែនជាបន្ទុកសង្គមនោះឡើយ ៕ អត្ថបទសហការ
ចែករំលែកព័តមាននេះ