ខេត្តកំពង់ស្ពឺ ៖ ប្តីខឹងប្រពន្ធមិននៅផ្ទះ ក៏បានយកភ្លើងដុតផ្ទះខ្លួនឯងបណ្តាលឱ្យឆេះអស់គ្មានសល់ បើទោះជាមានកិច្ចអន្តរាគមន៍ពីសមត្ថកិច្ចក៏ដោយ ។ ក្រោយកើតហេតុ សមត្ថកិច្ចបានឃាត់ខ្លួនបុរសជាប្តីចិត្តភ្លើងខាងលើ កសាងសំណុំរឿងចាត់ការបន្តតាមច្បាប់ ។ ការឃាត់ខ្លួនបុរសជាប្តី ធ្វើឡើងកាលពីវេលាម៉ោង៨និង១០នាទីព្រឹកថ្ងៃទី០៦ ខែធ្នូ ឆ្នាំ២០២៣ ស្ថិតនៅចំណុចភូមិព្រៃឈើទាល ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ។
មន្ត្រីនគរបាលស្រុកបសេដ្ឋបានឱ្យដឹងថា បុរសជាប្តីចិត្តភ្លើងដែលនគរបាលឃាត់ខ្លួន មានឈ្មោះ ខន មិថុនា អាយុ៣៦ឆ្នាំ រស់នៅភូមិ-ឃុំកើតហេតុខាងលើ បានធ្វើសកម្មភាពដុតផ្លះខ្លួនឯង ដែលមានទំហំ៤ម៉ែត្រគុណនិង៦ម៉ែត្រ ដំបូលប្រក់ស័ង្កសី ជញ្ជាំងបាំងស្លឹកត្នោត បណ្ដាលឲ្យឆេះខូចខាតទាំងស្រុងរួមទាំងសម្ភារនៅក្នុងផ្ទះដូចខាងក្រោម ៖
-គ្រែប្រអប់ចំនួន០១
-ទូរទស្សន៍ចំនួន០២គ្រឿង
-កង្ហាចំនួន០២
-និងសម្ភារៈក្នុងផ្ទះមួយចំនួនទៀត។
មន្ត្រីនគរបាលស្រុកបសេដ្ឋបានបញ្ជាក់បន្ថែមទៀតថា មូលហេតុដែលធ្វើឱ្យបុរសជាប្តីដាច់ចិត្តដុតផ្ទះចោលនោះ គឺដោយសារតែតូចចិត្តនិងខឹងប្រពន្ធខ្លួនឈ្មោះយ៉ាង ធីតា អាយុ៣៣ឆ្នាំ មិននៅផ្ទះ ទើបដុតផ្ទះតែម្តង។
នគរបាលស្រុកដដែលបញ្ជាក់ថា នៅក្នុងហេតុការណ៍ខាងលើ សមត្ថកិច្ចទទួលបានព័ត៌មានរាយការណ៍ ពីប្រជាពលរដ្ឋរស់នៅក្បែរនោះយឺតពេល ទើបបណ្ដាលឲ្យសង្គ្រោះពន្លត់ករណីដុតផ្ទះពុំទាន់។
ចែករំលែកព័តមាននេះ