ប្រាសាទបក្សីចាំក្រុង គឺជាប្រាសាទដែលមានរូបរាងតូចច្រឡឹងមួយ និងមានឃឿន៣ថ្នាក់ សាងឡើងរវាងដើមស.វទី១០ ក្រោយពេលដែលប្រាសាទលើភ្នំបាខែងសាងរួចហើយ
ខេត្តសៀមរាប ៖ ប្រាសាទបក្សីចាំក្រុង គឺជាប្រាសាទដែលមានរូបរាងតូចច្រឡឹងមួយ និងមានឃឿន៣ថ្នាក់ សាងឡើងរវាងដើមស.វទី១០ ក្រោយពេលដែលប្រាសាទលើភ្នំបាខែងសាងរួចហើយ។
បើតាមមន្ត្រីជំនាញនៃអាជ្ញាធរជាតិអប្សរា បានប្រាប់ឱ្យដឹងថា ប្រាសាទបក្សីចាំក្រុង ស្ថិតនៅកណ្តាលព្រៃស្រោងខាងឆេ្វងផ្លូវ និងខាងជើងភ្នំបាខែង ប្រហែល១៥០ម៉ែត្រ មានកាំជណ្តើរស្ថាបនាដោយថ្មបាយក្រៀម និងឥដ្ឋពណ៌ក្រហម។ នៅម្ដុំនោះ ក៏មានប្រាសាទតូចៗមួយចំនួនទៀត សាងអំពីឥដ្ឋ ខ្លះបាំងបាត់ដោយរុក្ខជាតិ ហើយកាលជំនាន់កសាងនោះ ពុំមានសិលាចារិកអ្វីឡើយ។
មន្ត្រីជំនាញនៃអាជ្ញាធរជាតិអប្សរា ប្រាប់ឱ្យដឹងបន្តថា លុះដល់ព្រះបាទរាជេន្ទ្រវរ្ម័ន នាំរាជធានីពីកោះកេរ្តិ៍ មកតាំងនៅអង្គរសារថ្មីវិញ នៅ គ.ស ៩៤៨ ទើបព្រះអង្គឱ្យគេចារិកកាព្យសំស្ក្រឹតនៅលើមេទ្វារ ដូចឃើញសព្វថ្ងៃនេះ។ សេចក្ដីនៃអក្សរថ្មនោះ គួរជាទីចាប់អារម្មណ៍ក្រៃលែង ព្រោះមាននិទានអំពីបុព្វការីជនដំបូងបង្អស់នៃជនជាតិខ្មែរ ក្នុងលំនាំជារឿងព្រេង។
ក្នុងនោះផងដែរ ពលរដ្ឋដែលរស់នៅជិតនោះនិយាយថា ខ្មែរចុះតំណពូជពង្សមកពីឥសីមួយអង្គព្រះនាម «កម្ពុ» ដែលកើតឡើងដោយខ្លួនឯង (ស្វយម្ភ)។ ឥសីនោះ ទៅកប់ប្រសប់នឹងទេពកញ្ញាឈ្មោះ «មេរា» ទើបបង្កើតជាកូនចៅតរៀងមក។ ហើយប្រាសាទបក្សីចាំក្រុង កសាងនៅលើស្ថានីយបុរេប្រវត្តិមួយ នៃយុគសម្រឹត៕
ចែករំលែកព័តមាននេះ