ADផ្ទាំងផ្សព្វផ្សាយពាណិជ្ជកម្ម

Picture

សិល្បៈ​ខ្មែរ​អមតៈ ប្រកាស​រៀបចំ​មហោស្រព «ប្រាំពីរ​ពណ៌​» ដោយ​យុវជន​ស្ម័គ្រចិត្ត​៤​រូប

7 ខែ មុន
  • ភ្នំពេញ

មហោស្រព «​ប្រាំពីរ​ពណ៌​» រចនា​កម្មវិធី​ដោយ​យុវជន​៤​រូប ដែល​មាន​សាវតា​ផ្សេង​ៗ​គ្នា ដើម្បី​តំណាង​សំឡេង​យុវជន នឹង​ត្រូវ​រៀបចំ​ឡើង​ចាប់ពី​ថ្ងៃ​ទី​៨ ដល់​ថ្ងៃ​ទី​១០ ខែធ្នូ ឆ្នាំ​២០២៣​ខាង​មុខ​នេះ ដើម្បី​ផ្សារ​ភ្ជាប់​យុវជន​ទៅ​នឹង​សង្គម តាម​រយៈ​ការ​បង្ហាញ​ស្នាដៃ​សិល្បៈ

រាជធានី​ភ្នំពេញ ៖ មហោស្រព «​ប្រាំពីរ​ពណ៌​» រចនា​កម្មវិធី​ដោយ​យុវជន​៤​រូប ដែល​មាន​សាវតា​ផ្សេង​ៗ​គ្នា ដើម្បី​តំណាង​សំឡេង​យុវជន នឹង​ត្រូវ​រៀបចំ​ឡើង​ចាប់ពី​ថ្ងៃ​ទី​៨ ដល់​ថ្ងៃ​ទី​១០ ខែធ្នូ ឆ្នាំ​២០២៣​ខាង​មុខ​នេះ ដើម្បី​ផ្សារ​ភ្ជាប់​យុវជន​ទៅ​នឹង​សង្គម តាម​រយៈ​ការ​បង្ហាញ​ស្នាដៃ​សិល្បៈ កិច្ច​ពិភាក្សា ការ​ចែករំលែក​ចំណេះដឹង និង​បទ​ពិសោធន៍​ទៅ​កាន់​យុវជន ក្នុង​គោលបំណង​លើកកម្ពស់​ភាព​ចម្រុះ និង​បរិយាកាស​សង្គម​ប្រកបដោយ​ភាព​ច្នៃប្រឌិត​។

នេះ​ជា​លើក​ទី​១​ហើយ ដែល​សិល្បៈ​ខ្មែរ​អមតៈ បើកឱកាស​ឱ្យ​យុវជន​ដែល​ធ្លាប់​ស្ម័គ្រចិត្ត​បម្រើ​ការងារ​សង្គម និង​ពុំ​ធ្លាប់​មានបទពិសោធន៍​ក្នុង​សិល្បៈ អាច​ទទួល​បាន​បទ​ពិសោធន៍​ដោយ​ផ្ទាល់ ដោយ​ប្រើប្រាស់​ភាព​ច្នៃប្រឌិត​របស់​ខ្លួន​ក្នុង​ការ​រចនា​កម្មវិធី​មហោស្រព​សិល្បៈ​មួយ ដែល​រំលេច​ពី​ចំណង់​ចំណូលចិត្ត និង​ចក្ខុវិស័យ​របស់​ពួក​គេ​ចំពោះ​សង្គម​។

លោក សុង សេង ដែល​ជា​អ្នកសម្របសម្រួល​កម្មវិធី បាន​បញ្ជាក់​ថា «​ខ្ញុំ​កត់សម្គាល់​ឃើញ​ថា អ្នក​រចនា​មហោស្រព​យើង​បាន​រចនា​កម្មវិធី​ដ៏​គួរ​ឱ្យ​ចាប់ចិត្ត ព្រោះ​មានកម្ម​វិធី​សិល្បៈ​ដ៏​សម្បូរ​បែប ដែល​រំលេច​ពី​ស្ថានភាព​យុវជន​បច្ចុប្បន្ន និង​អ្វី​ដែល​យុវជន​សម្លឹង​ចង់​ឃើញ​នា​ពេល​អនាគត​។ ខ្ញុំ​យល់​ថា នេះ​ជា​មូលហេតុ​ដែល​ធ្វើ​ឱ្យ​មហោស្រព​នេះ មាន​លក្ខណៈ​សម​ស្រប​សម្រាប់​យុវជន ក៏​ដូច​ជា​សារ​ធារ​ណ​ជន​មក​ចូលរួម ព្រោះ​ពួក​គេ​នឹង​មិន​ត្រឹមតែ​ទទួល​បានការ​កម្សាន្ត​ប៉ុណ្ណោះ​ទេ ប៉ុន្តែ​ថែម​ទាំង​អាច​ស្វែង​យល់​អំពី​វឌ្ឍនភាព និង​ទំនាក់ទំនង​ដែល​មិន​អាច​ខ្វះ​បាន​រវាង​សិល្បៈ និង​សង្គម​ផង​ដែរ​»​។

លោក សុង សេង រំពឹង​ថា «​នៅ​ពេល​ដែល​មហោស្រព​មួយ​នេះ​បាន​បញ្ចប់​ទៅ យុវជន​ដែល​មក​ចូលរួម​មហោស្រព​អាច​ទទួល​ចំណេះដឹង​បន្ថែម​អំពី​តួនាទី​របស់​ខ្លួន ដើម្បី​ចូលរួម​ជ្រោមជ្រែង​វិស័យ​សិល្បៈ​ទៅ​តាម​សក្តានុពល​របស់​ខ្លួន​»​។

ចំណែក​លោក ឃឿ​ន កំសត់ ជា​យុវជន​ហាត់​ការ​មក​ពី​ខេត្តរតនៈគិរី បាន​លើក​ឡើង​ដែរ​ថា «​ការ​រចនា​កម្មវិធី​មហោស្រព​សិល្បៈ គឺជា​បទ​ពិសោធន៍​លើក​ទី​១ សម្រាប់​លោក ហើយ​បាន​ធ្វើ​ឱ្យ​លោក​មាន​ភាព​ស្និទ្ធស្នាល​ជាមួយ​សិល្បៈ​ជា​ច្រើន​ទម្រង់ ដូច​ជា ៖ បុរាណ សម័យ និង​សហ​សម័យ ដែល​លោក​មិន​ធ្លាប់​ស្គាល់ ឬ​ឃើញ​ពី​មុន​មក​»​។

លោក​បញ្ជាក់​ថា «​ក្រុម​ហាត់​ការ​យើង​បាន​ច្របាច់​គំនិត​ផ្សេង​ៗ​បញ្ចូល​គ្នា ដោយ​ផ្អែក​លើ​ចំណង់​ចំណូលចិត្ត​ផ្ទាល់ខ្លួន​ទាក់ទង​នឹង​បញ្ហា​បរិស្ថាន សិទ្ធិ​មនុស្ស ផ្លូវចិត្ត​យុវជន ជនជាតិ​ដើម​ភាគតិច និង​រឿង​ផ្សេង​ៗ​ទៀត រួច​យើង​ជជែក​រក​ចំណុច​ស្នូល​មួយ ដើម្បី​បង្ហាញ​នូវ​ផ្ទាំងទស្សនីយភាព​សម្រាប់​យុវជន​ផ្សេង​ទៀត ឱ្យ​ងាក​មក​ចាប់អារម្មណ៍​ប្រើប្រាស់​សិល្បៈ ដើម្បី​ភ្ជាប់​ខ្លួន​ទៅ​នឹង​សង្គម​របស់​យើង​។ ដូច្នេះ ខ្ញុំ​គិត​ថា យុវជន​គួរ​ចាប់​យក​ឱកាស​នេះ ដើម្បី​ពិសោធន៍​ខ្លួន​ជាមួយ​សិល្បៈ​ចម្រុះ និង​ក្រេប​យកចំណេះ​ដឹង​ពី​សិក្ខាសាលា ក៏​ដូច​ជា​រីករាយ​នឹង​កម្មវិធី​កម្សាន្ត​ផ្សេង​ៗ​ទៀត​ដែល​មាននៅ​ក្នុង​មហោស្រព​»​។

រីឯ​កញ្ញា អ៊ុ​ក លី​គួ​យ​យូ យុវជន​ហាត់​ការ​ម្នាក់​ទៀត ដែល​មានបទពិសោធន៍​តិចតួច​ទៅ​លើ​ការ​រៀបចំ​កម្មវិធី​សិល្បៈ បាន​រំលឹក​ឡើង​ថា «​នាង​មាន​ចំណាប់អារម្មណ៍​ច្រើន​ជាង​មុន​ទៅ​លើ​សិល្បៈ ជា​ពិសេស​ភាពយន្ត​ឯកសារ និង​ទម្រង់​សិល្បៈ​បុរាណ ក៏​ដូច​ជា​ការ​គ្រប់គ្រង​កម្មវិធី ដែល​សុទ្ធតែ​ជា​បទ​ពិសោធន៍​ថ្មី​សន្លាង​សម្រាប់​នាង​»​។

នាង​បន្ថែម​ថា «​នេះ​ជា​ឱកាស​ដ៏​ពិសេស​មួយ​សម្រាប់​យុវជន​ក្នុង​ការ​ទទួល​បាន​បទ​ពិសោធន៍​ថ្មី និង​ជា​ឱកាស ដើម្បី​ស្វែង​យល់​អំពី​ស្នាដៃ​សិល្បៈ​ដ៏​រស់​រវើក​របស់​សិល្បករ​កម្ពុជា តាម​រយៈ​ការ​ទស្សនាការ​សម្តែង​សិល្បៈ​ចម្រុះ ការ​ជួប​ជាមួយ​សិល្បករ និង​តន្ត្រីករ​ដ៏​មាន​ទេព​កោសល្យ​។ តាម​រយៈ​ការ​ចូលរួម​ក្នុង​មហោស្រព​សិល្បៈ ខ្ញុំ​យល់​ថា យុវជន​អាច​ប្រើប្រាស់​សិល្បៈ ដើម្បី​បង្កើត​ការ​ផ្លាស់​ប្តូរ​វិជ្ជមាន​នៅ​ក្នុង​សង្គម និង​សហគមន៍​ដែល​ពួក​គេ​រស់នៅ ក៏​ដូច​ជា​ប្រើប្រាស់​សិល្បៈ​ជា​មធ្យោបាយ​ផ្សះផ្សារ​ផ្លូវចិត្ត​ពួក​គេ​ផង​ដែ​»​។

កញ្ញា គួ​យ​យូ បញ្ជាក់​ទៀត​ថា «​មហោស្រព «​ប្រាំពីរ​ពណ៌​» គឺជា​កន្លែង​ដ៏​ពិសេស​មួយ​សម្រាប់​យុវជន​ចូលរួម​ក្នុង​ការ​ផ្សព្វផ្សាយ និង​លើក​ស្ទួយ​វិស័យ​សិល្បៈ​ខ្លួន ថែម​ទាំង​មានឱកាស​ប្រើ​សិទ្ធិ​សេរីភាព ដើម្បី​បង្ហាញ​អំពី​ខ្លួន​ពួក​គេ​ដោយ​បើកចំហ​»៕

អត្ថបទសរសេរ ដោយ

កែសម្រួលដោយ