បើទោះបីជាធ្លាប់ចូលរួមប្រកួតកម្មវិធីបវរកញ្ញាធំមួយ និងមិនទទួលជោគជ័យគួរអោយកត់សម្គាល់យ៉ាងណាក៏ដោយ ប៉ុន្តែតារាសម្តែង និងបង្ហាញម៉ូតនាង ម៉ាច ដាវី បានសន្យាថា នាងនឹងវិលមកកាន់ឆាកប្រកួតសម្រស់នេះជាថ្មីម្តងទៀត ដើម្បីឆ្លើយតបទៅកាន់អ្នកគាំទ្របដែលចង់បាន ។…
បើទោះបីជាធ្លាប់ចូលរួមប្រកួតកម្មវិធីបវរកញ្ញាធំមួយ និងមិនទទួលជោគជ័យគួរអោយកត់សម្គាល់យ៉ាងណាក៏ដោយ ប៉ុន្តែតារាសម្តែង និងបង្ហាញម៉ូតនាង ម៉ាច ដាវី បានសន្យាថា នាងនឹងវិលមកកាន់ឆាកប្រកួតសម្រស់នេះជាថ្មីម្តងទៀត ដើម្បីឆ្លើយតបទៅកាន់អ្នកគាំទ្របដែលចង់បាន ។
ជាមួយនឹងការសន្យាវិលមកជាថ្មីនេះដែរ ម៉ាច ដាវី បានគូសបញ្ជាក់ថា នាងនឹងពង្រឹងខ្លួនឯងអោយកាន់តែខ្លាំងជាងមុន ដើម្បីការប្រជែងដណ្តើមម្កុដ ។ តាមរយៈសំណេរបង្ហោះលើបណ្តាញសង្គមតារាសម្តែងនាង ម៉ាច ដាវី បានលើកឡើងថា ខ្ញុំទទួលបានសំនួរជាច្រើនពីសំណាក់អ្នកគាំទ្រខ្ញុំ ក្នុងការវិលត្រឡប់សារជាថ្មីនៃកម្មវិធីប្រកួតសម្រស់ណាមួយម្ដងទៀតក្នុងឆ្នាំនេះ ។
នាងបន្តថា អរគុណខ្លាំងណាស់ សម្រាប់ទឹកចិត្តស្រលាញ់ និងការគាំទ្រចង់ឃើញវត្តមានខ្ញុំម្ដងទៀតលើឆាកប្រកួត អរគុណ និងរំភើបខ្លាំងណាស់ ។ នាងបញ្ជាក់ថា ខ្ញុំអាចនឹងវិលមកវិញនៅពេលដែល Readyជាងនេះ និងនៅពេលដែលមានអ្វីដែលថ្មីប្លែកជូនអ្នកទាំងអស់គ្នា love you all ។
ដោយឡែក ពាក់ព័ន្ធការវិលត្រឡប់មកកាន់ឆាកប្រកួតបវរកញ្ញាជាថ្មីនេះដែរ ម៉ាច ដាវី បានអះអាងប្រាប់អ្នកសារព័ត៌មាន កាលពីពេលថ្មីៗនេះថា សម្រាប់ការវិលមកប្រកួតបវរកញ្ញានេះ នាងចាប់ផ្តើមជាថ្មីម្តងទៀត នៅក្នុងអំឡុងពេលខាងមុខនេះ ។
នាងបញ្ជាក់ថា នាងអាចនឹងដាក់ពាក្យចូលរួមការប្រកួតជាថ្មី នៅអឡុងឆ្នាំ២០២៦ ឬ២០២៧ ខាងមុខ ដោយសារនៅឆ្នាំនេះ នាងចង់ទុកពេលពង្រឹងលើមុខជំនួញរបស់នាងជាមុនសិន ។
ម៉ាច ដាវី បន្តថា សម្រាប់ការជ្រើសរើសកម្មវិធីបវរកញ្ញាណាមួយសម្រាប់ការដាក់ពាក្យប្រកួតនោះ នាងនៅមិនទាន់អាចកំណត់បាននៅឡើយទេ ប៉ុន្តែនាងនឹងជ្រើសរើសយកកម្មវិធីណាដែលសាកសមទៅនឹងសមត្ថភាពរបស់នាង ។
យ៉ាងណា បើតាមនាង ម៉ាច ដាវី អំឡុងពេលនៃការត្រៀមខ្លួនមកឆាកសម្តែងនៃការប្រកួតសម្រស់ជាថ្មីនេះនាងនឹងខិតខំដុះខាត់ និងពង្រឹងខ្លួនឯងអោយខ្លាំងជាងមុន ពោល គឺនឹងមានអ្វីថ្មីៗដោយនាងនឹងមិនធ្វើអោយអ្នកគាំទ្រខកចិត្តចំពោះរូបនាងឡើយ ។
គួរបញ្ជាក់ថា បច្ចុប្បន្ន ក្រៅពីអាជីពសម្តែង និងបង្ហាញម៉ូតនោះម៉ាច ដាវី ក៏កំពុងបើកមុខជំនួញផ្ទាល់ខ្លួនផងដែរ គឺការលក់ផលិតផលគ្រឿងសម្អាងដែលប្រ៊េនខ្លួនឯង ។
នាងបញ្ជាក់ថា ពេលនេះ នាងបានបោះទុកប្រាក់ ដើម្បីបើកអាជីវកម្មផ្ទាល់ខ្លួនមួយទាក់ទងនឹងផលិតផលថែរក្សាសម្រស់ ហើយបើតាមគម្រោងអាជីវកម្មនេះនឹងដំណើរការជាផ្លូវការ នៅបំណាច់ឆ្នាំ២០២៥ ឬដើមឆ្នាំ២០២៦ ដោយសារពេលនេះ ស្ថិតក្នុងដំណាក់កាលរៀបចំ និងសាកល្បងបណ្តើរៗ ។
យ៉ាងណា នាងរំពឹងថា អាជីវកម្មរបស់ខ្លួននឹងទទួលបានជោគជ័យពីព្រោះនាងបានដាក់ចិត្តដាក់កាយខ្លាំងក្នុងការបើករបរមួយទៀត ដោយបានចំណាយថវិការផ្ទាល់ខ្លួនរហូតរាប់ម៉ឺនដុល្លារ ។ ស្របពេល ដែលបោះទុនប្រាក់ទៅលើអាជីវកម្មថ្មីរបស់ខ្លួន ម៉ាច ដាវី ក៏បានកាត់បន្ថយការងារសិល្បៈផងដែរ ៕
ចែករំលែកព័តមាននេះ