កម្មវិធីប្រកួត «Miss grand international 2023» ដែលធ្វើឡើងនៅក្នុងប្រទេសវៀតណាម បានបិទបញ្ចប់ហើយ កាលពីថ្ងៃទី២៦ ខែតុលា ឆ្នាំ២០២៣ម្សិលម៉ិញនេះ ដោយនៅក្នុងនោះម្ចាស់មកុដបានទៅលើបវរកញ្ញាមកពីប្រទេស Peru ។ ហើយសម្រាប់បវរកញ្ញាកម្ពុជា
រាជធានីភ្នំពេញ ៖ កម្មវិធីប្រកួត «Miss grand international 2023» ដែលធ្វើឡើងនៅក្នុងប្រទេសវៀតណាម បានបិទបញ្ចប់ហើយ កាលពីថ្ងៃទី២៦ ខែតុលា ឆ្នាំ២០២៣ម្សិលម៉ិញនេះ ដោយនៅក្នុងនោះម្ចាស់មកុដបានទៅលើបវរកញ្ញាមកពីប្រទេស Peru ។ ហើយសម្រាប់បវរកញ្ញាកម្ពុជា ភឹម ស្រីនោ វិញ គឺមិនទទួលជោគជ័យទេ ហើយថែមទាំងមិនអាចចូលដល់វគ្គTop ពីកម្មវិធីប្រកួតខាងលើនេះឡើយ។
យ៉ាងណា ក្នុងនាមជារាមច្បង ដែលធ្លាប់ចូលរួមប្រកួតកម្មវិធីនេះដូចគ្នា ស្រីស្អាត ពេជ្រ វត្តីសារ៉ាវឌ្ឍី បានសម្តែងការកោតសរសើរពីការខិតខំប្រឹងប្រែងយ៉ាងអស់ពីសមត្ថភាពរបស់ស្រីស្រស់ ភឹម ស្រីនោ សម្រាប់ការប្រកួតមួយនេះ។ ទោះបីជាមិនទទួលបានជោគជ័យក៏ដោយ ហើយនាងក៏បានលើកទឹកចិត្តឱ្យបវរកញ្ញា ភឹម ស្រីនោ កុំបា.ក់ទឹកចិត្ត ត្រូវតស៊ូបន្តទៀត ក្នុងខណៈពេលដែល ភឹម ស្រីនោ កំពុងតែទទួលរងពីមតិរិះគន់ខ្លះពីមហាជនមួយចំនួននាពេលនេះផងដែរ។
ស្រីស្អាត ពេជ្រ វត្តីសារ៉ាវឌ្ឋី បានបង្ហោះសារនៅលើបណ្តាញសង្គមថា «មនុស្សគ្រប់គ្នាមិនមែនសុទ្ធតែមានក្តីស្រឡាញ់ចំពោះយើងនោះទេ ដូច្នេះហើយ យើងត្រូវតែមានក្តីស្រឡាញ់ចំពោះខ្លួនឯងឱ្យបានច្រើនៗជាទីបំផុត»។
នាងបញ្ជាក់ថា «នៅក្នុងដំណើរនៃការប្រកួត មនុស្សគ្រប់គ្នាតែងតែចង់ឃើញអ្នកស្ថិតក្នុងថប់កំពូលណាមួយ ដោយមិនគិតពីផលលំបាកដែលអ្នកកំពុងតែប្រឈមមុខនោះឡើយ ទទួលស្គាល់ការចូល Top គឺជាក្តីប្រាថ្នារបស់ Queen នឹងអ្នកគាំទ្រគ្រប់រូបពិតមែន ប៉ុន្តែការលើកទង់ជាតិកម្ពុជាលើឆាកអន្តរជាតិ ក៏មិនមែនជារឿងងាយស្រួលផងដែរ»។ នាងបន្តថា «ក្នុងឆ្នាំនេះ យើងពិតជាមោទនភាពចំពោះអ្នកខ្លាំងមែនទែន អ្នកធ្វើបានល្អបំផុតហើយ ឈរលើឆាកអន្តរជាតិស្រែកឈ្មោះ «ប្រទេសកម្ពុជា» យ៉ាងអង់អាចក្លាហាន ព្រមទាំងបញ្ចប់ការប្រកួតដោយសន្តិភាព នឹងទទួលបានសេចក្តីស្រឡាញ់ពីបណ្តាបវរកញ្ញាជុំវិញពិភពលោកជាច្រើន»។
នាងបន្តថា «សម្រាប់អារម្មណ៍ខ្ញុំឆ្លងកាត់ការចូលទៅទស្សនាផ្ទាល់ អ្នកដែលគួរតែអបអរផងដែរនោះ គឺបេក្ខនារីដែលមិនចូល Top កំពូលណាមួយ សូមសរសើរពួកគាត់មានទឹកចិត្តល្អណាស់ គឺតែងតែទះដៃ អបអរសាទរមិត្តភក្តិជានិច្ច ពេលដែលមិត្តភក្តិចូលទៅកាន់ Top ណាមួយ»។
នាងបន្តទៀតថា «សង្ឃឹមថា ការវិលត្រឡប់របស់ពួកគាត់មកប្រទេសកំណើតវិញ ពោរពេញដោយការស្វាគមន៍យ៉ាងកក់ក្តៅ តាមរយៈសកម្មភាព និងពាក្យសម្តីល្អៗគួរឱ្យគោរព ក្នុងនាមជារាមច្បងពិតជាមានមោទនភាពណាស់ដែលឃើញសិស្សប្អូនមានការតស៊ូ ខិតខំប្រឹងប្រែង បញ្ចេញអស់ពីសមត្ថភាពក្នុងការតំណាងឲ្យប្រទេសកម្ពុជា។ ដឹងថា បេសកកម្មមួយនេះ វាពិតជាលំបាក ចូលកុំបា.ក់ទឹកចិត្ត ព្រោះតែសម្តីមិនល្អអ្នកដទៃ សូមបន្តដំណើរទៅមុខទៀត សូមចាំថា អ្នកពិតជាសាកសមជា Miss Grand Cambodia 2023 Phoem Sreynor»។
ដោយឡែកសម្រាប់ស្រីស្រស់ ភឹម ស្រីនោ វិញ ក៏បានបញ្ចេញនៅលើបណ្តាញសង្គម ក្រោយបញ្ចប់ការប្រកួតថា «ជាដំបូង នាងខ្ញុំសូមអរគុណ Mommy Sokunthea Im បងស្រី Sara Pich និងក្រុមការងារដែលបានជឿជាក់ និងផ្តល់ឱកាសឲ្យរូបនាងខ្ញុំតំណាងឲ្យប្រទេសកម្ពុជានៅលើឆាកអន្តរជាតិមួយនេះ! អរគុណចំពោះការមើលថែ ការខិតខំប្រឹងប្រែង យកចិត្តទុកដាក់ ព្រួយបារម្ភ និងការលះបង់ជាច្រើនដើម្បីពាក្យថា កម្ពុជា! ។ នាងខ្ញុំសូមផ្ញើការស្រលាញ់ និងការគោរពជូនចំពោះអ្នកទាំងអស់គ្នា!។ នាងខ្ញុំក៏សូមធ្វើការអរគុណទៅដល់បណ្តាអ្នកគាំទ្របវរកញ្ញា (Fan page) ដែលតែងតែបង្ហាញ និងផ្សព្វផ្សាយអំពីរូបនាងខ្ញុំ ក៏ដូចជា បវរកញ្ញាដែលតំណាងឲ្យប្រទេសកម្ពុជា!»។
នាងបញ្ជាក់ថា «ទោះបីជាលទ្ធផលយ៉ាងណា ក៏នាងខ្ញុំដឹងថា នាងខ្ញុំតែងតែមានពុកម៉ែបងប្អូន ប្រជាជនកម្ពុជា និងបណ្តាអ្នកគាំទ្រទាំងអស់នៅពីក្រោយខ្នងរបស់រូបនាងខ្ញុំ! អរគុណចំពោះការរួមដំណើរមួយនេះ តាំងពីដើមរហូតដល់ចប់ នាងខ្ញុំពិតជាមានសំណាងណាស់ដែលបានតំណាងឲ្យប្រទេសកម្ពុជា ប្រទេសជាតិដ៏ផូរផង់មួយនេះ មកកាន់ឆាកអន្តរជាតិ Miss Grand International 2023»៕
ចែករំលែកព័តមាននេះ