តារាសម្តែងអ្នកនាង ទឹម រដ្ឋា បានបញ្ជាក់ពីចំណុចមួយចំនួន នៃទម្រង់មុខកូនស្រីរបស់ខ្លួន ដែលដូចទៅនឹងម្តាយ ខណៈពេលដែលនាងចាត់ទុកកូនអាចជាម្តាយដែលចាប់កំណើត ដើម្បីបំពេញក្តីប្រាថ្នាដែលនាងចង់បាន
រាជធានីភ្នំពេញ ៖ តារាសម្តែងអ្នកនាង ទឹម រដ្ឋា បានបញ្ជាក់ពីចំណុចមួយចំនួន នៃទម្រង់មុខកូនស្រីរបស់ខ្លួន ដែលដូចទៅនឹងម្តាយ ខណៈពេលដែលនាងចាត់ទុកកូនអាចជាម្តាយដែលចាប់កំណើត ដើម្បីបំពេញក្តីប្រាថ្នាដែលនាងចង់បានអស់ជាច្រើនឆ្នាំមកនេះ។
តារាសម្តែងអ្នកនាង ទឹម រដ្ឋា បានបង្ហោះរូបភាព២សន្លឹកនៅលើបណ្តាញសង្គម ដោយរូបទី១ ជារូបមុខមាត់កូន និងរូបទី២ ជាមុខមាត់ម្តាយរបស់នាង ដែលទទួលមរណភាព ដើម្បីធ្វើការប្រៀបធៀប និងបញ្ជាក់ពីលក្ខណៈដូចគ្នាមួយចំនួន បង្ហាញមហាជនឲ្យបានដឹង។
ជាមួយនឹងរូបភាពទាំង២សន្លឹកនោះ តារាសម្តែងអ្នកនាង ទឹម រដ្ឋា បានភ្ជាប់ជាមួយនឹងសារថា «មើលត្រឹមពាក់កណ្ដាលច្រមុះចុះក្រោម ប្រអប់មាត់ ថ្ពាល់ខួច និងចង្កា ម៉ាក់យាយថាមិនម៉ាក់យាយ អរគុណម៉ាក់ ដែលបានត្រឡប់មកបំពេញបំណងប្រាថ្នា និងសំណូមពរ ហើយបានផ្តល់ឱកាសឲ្យកូនបានមើលថែរ សងគុណម៉ាក់ម្ដងទៀត Pan RaNy ជាតិនេះកូនបានស្ងប់ចិត្តហើយ»។
យ៉ាងណា ក្រោយឃើញតារាសម្តែងអ្នកនាង ទឹម រដ្ឋ បង្ហោះរូបភាព និងបានបញ្ជាក់ពីបញ្ហាខាងលើនេះ គេឃើញមានមហាជន ជាពិសេសបណ្តាមិត្តភក្តិក្នុងសិល្បៈដូចគ្នាមួយចំនួនបាននាំគ្នាចូលទៅធ្វើការខំមិន ដោយម្នាក់ៗយល់ស្របចំពោះការលើកឡើងរបស់នាង និងបានចាត់ទុកកូនស្រីរបស់នាងនាពេលនេះ គឺជាម្តាយមកចាប់ជាតិយ៉ាងពិតប្រាកដ។
ជាការកត់សម្គាល់ ម្តាយបង្កើតរបស់តារាសម្តែង ទឹម រដ្ឋា បានទទួលមរណភាព ដោយសារគាំងបេះដូង កាលពីវេលាម៉ោង១២រំលងអធ្រាត្រ ឈានចូលថ្ងៃទី១ ខែសីហា ឆ្នាំ២០២០។ ក្រោយម្តាយទទួលមរណភាពភ្លាមៗបែបនេះ តារាសម្តែងអ្នកនាង ទឹម រដ្ឋា តែងតែបង្ហាញនូវអារម្មណ៍សោកសៅ និងសម្តែងការនឹករលឹកយ៉ាងខ្លាំងចំពោះម្តាយ ខណៈពេលដែលនាងតែងតែចង់ឲ្យម្តាយរបស់នាងវិលត្រឡប់មកនៅជាមួយនាង និងគ្រួសារវិញផងដែរ។
ជាងនេះទៅទៀត នៅក្នុងថ្ងៃមង្គលការរបស់នាងជាមួយស្វាមី កាលពីថ្ងៃទី២៦ ខែមីនា ឆ្នាំ២០២២ បុរសជនជាតិអាមេរិកកាត់អេស្បាញ គឺលោក Jovany Antonio នាងបានយំហូរទឹកភ្នែកជោកថ្ពាល់តែម្ដង ព្រោះតែស្រណោះនឹកស្ដាយម្ដាយនាងដែលបានទទួលមរណភាព ដោយខកខានមិនបានមើលឃើញថ្ងៃមង្គលរបស់នាងនាពេលនេះ ។
តារាសម្តែងអ្នកនាង ទឹម រដ្ឋា វាចាទាំងលាយឡំទឹកភ្នែកថា «ការរៀបការជាអ្វីដែលនាងប៉ងប្រាថ្នា និងជាក្ដីស្រម៉ៃធំមួយ ហើយពេលនេះនាងបានសម្រេចដូចបំណងហើយ តែម្ដាយនាងមិនបានឃើញថ្ងៃដែលនាងរីករាយបំផុតនេះទេ»។
ក្រោយមង្គលការជាង១ឆ្នាំមកនេះ នាង និងស្វាមីក៏ទទួលបានចំណងដៃកូនស្រីម្នាក់ដែលរហូតមកទល់នាពេលនេះ បានចម្រើនវ័យជិត១ឆ្នាំហើយ ហើយកូនស្រីរបស់នាងក៏មានមុខមាត់ដូចម្តាយរបស់នាងផងដែរ ៕
ចែករំលែកព័តមាននេះ