បដិមាព្រះហរិហររចនាបថភ្នំដា រចនាទេព២អង្គបញ្ចូលគ្នា
- ភ្នំពេញ
ព្រះហរិហរ ជាទេពព្រហ្មញ្ញសាសនា កើតឡើងពីការបញ្ចូលគ្នារវាងទេព ធំៗចំនួន២អង្គ គឺហរិ (ព្រះនារាយណ៍) និងហរ (ព្រះឥសូរ) ជានិមិត្តរូបក្នុងការបង្រួបបង្រួម
រាជធានីភ្នំពេញ ៖ ព្រះហរិហរ ជាទេពព្រហ្មញ្ញសាសនា កើតឡើងពីការបញ្ចូលគ្នារវាងទេព ធំៗចំនួន២អង្គ គឺហរិ (ព្រះនារាយណ៍) និងហរ (ព្រះឥសូរ) ជានិមិត្តរូបក្នុងការបង្រួបបង្រួមសាវកដែលគោរពបូជាទៅលើអាទិទេព ធំៗទាំងពីរអង្គនេះ ។
បើតាមឯកសារសារមន្ទីរជាតិ នៅក្នុងសិល្បៈខ្មែរ ការបង្ហាញប្រតិមាព្រះហរិហរមានតាំងពីសម័យមុនអង្គរមក ។ ជាក់ស្តែងប្រតិមាហរិហរ ដែលលើកយកមកពណ៌នានេះ គឺជាតឹកតាងមួយបង្ហាញអំពីទម្រង់ព្រះហរិហរនៅក្នុងសិល្បៈខ្មែរ ។ បដិមាអង្គនេះ មានប្រភពមកពីប្រាសាទភ្នំដា ស្រុកអង្គរបុរី ខេត្តតាកែវ ស្ថិតក្នុងរចនាបថភ្នំដា នៅសតវត្សរ៍ទី៦ ។ បច្ចុប្បន្នប្រតិមានេះកំពុងដាក់តាំងបង្ហាញនៅថែវសម័យមុនអង្គរ នៃសារមន្ទីរជាតិកម្ពុជា ។
ព្រះហរិហរ (ក.១៦១៤) បង្ហាញទម្រង់ព្រះហរិ ស្ថិតនៅចំហៀងខាងឆ្វេងគ្រងមកុដរាងបំពង់តាមបែបរចនាបថសម័យមុនអង្គរ ។ រីឯព្រះហរ ស្ថិតនៅចំហៀងខាងស្តាំ លម្អដោយចំណិតព្រះចន្ទ្រនៅលើផ្នួងសក់ ក្រងជារាងគូទខ្យង និងនៅលើថ្ងាសមានព្រះនេត្រទីបី ។
ប្រតិមាអង្គនេះមានព្រះហស្ត៤ ប៉ុន្តែបច្ចុប្បន្ន នៅសល់តែព្រះហស្តពីរផ្នែកខាងក្រោមប៉ុណ្ណោះ ដោយព្រះហស្តឆ្វេងកាន់ដំបង (កេតនភណ្ឌព្រះនារាយណ៍) និងព្រះហស្តស្តាំកាន់ផ្គាំ ឬខ្សែអង្គាំ (កេតនភណ្ឌព្រះឥសូរ) ។
ដោយឡែកព្រះហស្តពីរផ្នែកខាងលើឆ្លាក់ភ្ជាប់ទៅនឹងអ័ក្សរាងក្រចកសេះនោះបានបាក់អស់ហើយ ។ រីឯដងខ្លួនលែងខ្លួនទទេ ស្លៀកសំពត់ចងក្បិនទម្លាក់ជាយខាងមុខរាងកន្ទុយត្រីពីរជាន់ ។
ប្រតិមាហរិហរអង្គនេះទើបតែទទួលបានព្រះសិរត្រឡប់មកពីសារមន្ទីរសិល្បៈអាស៊ីហ្គីមេនៃប្រទេសបារាំង រួចភ្ជាប់គ្នាជាមួយដងខ្លួនវិញកាលពីថ្ងៃទី២១ ខែមករា ឆ្នាំ២០១៦ ៕ ដោយ ៖ ស.ភ.រ
ចែករំលែកព័តមាននេះ