ក្រុមហ៊ុនរថយន្តអគ្គិសនីវៀតណាម បង្ហាញមហិច្ឆតាពង្រីកដល់៥០ទីផ្សារទូទាំងពិភពលោក នៅចុងឆ្នាំក្រោយ
វៀតណាម ៖ ក្រុមហ៊ុន VinFast ដែលជាក្រុមហ៊ុនផលិតរថយន្តអគ្គិសនី ដែលជ្រកក្រោមក្រុមហ៊ុន
វៀតណាម ៖ ក្រុមហ៊ុន VinFast ដែលជាក្រុមហ៊ុនផលិតរថយន្តអគ្គិសនី ដែលជ្រកក្រោមក្រុមហ៊ុន Vingroup របស់ប្រទេសវៀតណាម កាលពីថ្ងៃទី៥ ខែតុលា កន្លងទៅ បានប្រកាសថា ខ្លួននឹងពង្រីករហូតដល់៥០ទីផ្សារទូទាំងពិភពលោក នៅចុងឆ្នាំ ២០២៤។
ជាមួយគ្នានោះ ក្រុមហ៊ុនក៏បង្ហាញពីផែនការបង្កើតរោងចក្រដំឡើងនៅប្រទេសឥណ្ឌា ដែលជាទីផ្សាររថយន្តធំជាងគេលំដាប់ទី៣លើពិភពលោក ដោយប្រហែល ១៥០ ទៅ ២០០លានដុល្លារអាមេរិក នឹងត្រូវចំណាយលើរោងចក្រនៅឥណ្ឌា ដែលត្រូវបានរចនាឡើងជាមួយសមត្ថភាពនៃការដំឡើងរថយន្ត ៥ម៉ឺនគ្រឿងក្នុង១ឆ្នាំ សម្រាប់ដំណាក់កាលដំបូង។ ការសាងសង់រោងចក្រនៅក្នុងទីផ្សារថ្មី អនុញ្ញាតឱ្យក្រុមហ៊ុនទទួលបានទុនលើការលើកទឹកចិត្តរបស់រដ្ឋាភិបាលម្ចាស់ផ្ទះ ក៏ដូចជាទទួលបានវត្ថុធាតុដើមជាមួយនឹងតម្លៃដ៏គួរឱ្យទាក់ទាញ។
VinFast បានលក់ចេញរថយន្តអគ្គិសនីចំនួន ១០,០២៧គ្រឿងក្នុងត្រីមាសទី៣ នៃឆ្នាំនេះ ពោគឺកើនឡើង ៥% បើធៀបនឹងត្រីមាសមុន។ ការលក់ដ៏រឹងមាំ ត្រូវបានកត់ត្រានៅក្នុងទីផ្សារអាមេរិកខាងជើង ជាពិសេសប្រទេសកាណាដា។
អំឡុងខែមករា ដល់ខែកញ្ញា ឆ្នាំនេះ រថយន្តរបស់ VinFast ចំនួន ២១,៣៤២គ្រឿង ត្រូវបានចែកចាយដល់អតិថិជនរបស់ខ្លួន។ ក្រៅពីនេះ ក្រុមហ៊ុនបានឃើញការលក់ដ៏គួរឱ្យចាប់អារម្មណ៍នៃម៉ូតូអគ្គិសនី ដោយចំនួន ២៨,២២០គ្រឿង ត្រូវបានលក់ក្នុងត្រីមាសទី៣ ពោលគឺកើនឡើង ១៧៧% ពីត្រីមាសទី២ និង១១៣% បើធៀបនឹងរយៈពេលដូចគ្នា កាលពីឆ្នាំមុន។ ប្រាក់ចំណូលរបស់ក្រុមហ៊ុនបានកើនឡើង១៥៩% ជាមួយនឹងទឹកប្រាក់ចំនួន ៨.២ទ្រីលានដុង ដែលស្មើនឹងប្រមាណ ៣៤២លានដុល្លារអាមេរិក ខណៈដែលជិត ៣១៦លានដុល្លារបានមកពីការលក់រថយន្តអគ្គិសនី។
យោងតាមលោកស្រី Le Thi Thu Thuy អគ្គនាយក VinFast Global បានថ្លែងថា VinFast មានផែនការប្រកបដោយមហិច្ឆតា នៅក្នុងការកសាងអនាគតបៃតង ហើយផែនការដែលអាចធ្វើទៅបានត្រូវបានគូសបញ្ជាក់ ដើម្បីធានាថា VinFast អាចបោះជំហានយ៉ាងក្លាហាន ដើម្បីក្លាយជាក្រុមហ៊ុនសកល៕ (ប្រភពពី VnExpress)
ចែករំលែកព័តមាននេះ