តីតកញ្ញាឯក Miss Grand Cambodia ឆ្នាំ២០១៧ កញ្ញា ខ្លឹម ស្រីគា បានបង្ហាញតម្រុយចង់វិលរកការប្រឡងបវរកញ្ញាជាថ្មីម្តងទៀត បន្ទាប់ពីនាងធ្លាប់ទទួលបានជោគជ័យនៅក្នុងវិស័យមួយនេះម្តងរួចមកហើយ
រាជធានីភ្នំពេញ ៖ អតីតកញ្ញាឯក Miss Grand Cambodia ឆ្នាំ២០១៧ កញ្ញា ខ្លឹម ស្រីគា បានបង្ហាញតម្រុយចង់វិលរកការប្រឡងបវរកញ្ញាជាថ្មីម្តងទៀត បន្ទាប់ពីនាងធ្លាប់ទទួលបានជោគជ័យនៅក្នុងវិស័យមួយនេះម្តងរួចមកហើយ កាលពីពេលកន្លងទៅ។
ស្រីស្អាត ខ្លឹម ស្រីគា មិនបានបង្ហាញឲ្យបានច្បាស់លាស់នោះទេថា តើនាងមានបំណងនឹងចូលរួមប្រឡងនៅក្នុងកម្មវិធីបវរកញ្ញាណាមួយឡើយ? ប៉ុន្តែប្រសិនបើមានការគាំទ្រពីសំណាក់ទស្សនិកជន និងបណ្តាអ្នកគាំទ្ររូបនាងនោះ នាងនឹងវិលរកការប្រកួតប្រជែងជាថ្មីលើវិថីមួយនេះម្តងទៀត។
តាមរយៈសារដែលបានសរសេរបង្ហោះនៅលើបណ្តាញសង្គម ស្រីស្អាត ខ្លឹម ស្រីគា បានបញ្ជាក់ឱ្យដឹងថា «បើសិនថា ខ្ញុំ come back Miss… (វិលត្រឡប់) ណាមួយ។ តើបងប្អូនគាំទ្រទេ?»។
ដោយឡែកសម្រាប់ការវិលត្រឡប់មកចូលរួមប្រកួតបវរកញ្ញាជាថ្មី នាពេលណាមួយនោះ ត្រូវបានតារាស្រីរូបនេះ ដាក់លក្ខខណ្ឌសម្រាប់ខ្លួនឯងថា « នាងអាចចូលរួមប្រកួតជាថ្មី បន្ទាប់ពីនាងទទួលបានរាងដូចកាលពីមុន»។
យ៉ាងណា បន្ទាប់ពីឃើញសារដែលស្រីស្អាត ខ្លឹម ស្រីគា បង្ហោះខាងលើនេះភ្លាម គេឃើញមានទស្សនិកជន ជាពិសេសបណ្តាអ្នកគាំទ្ររូបនាងបានសម្តែងការគាំទ្រ ដោយចង់ឃើញនាងវិលមកការប្រកួតប្រជែងបវរកញ្ញាជាថ្មីម្តងទៀត ដោយសារតែនាងមានបទពិសោធន៍ស្រាប់ សម្រាប់វិស័យមួយនេះ។
ជាការកត់សម្គាល់ កញ្ញា ខ្លឹម ស្រីគា ធ្លាប់តំណាងឲ្យប្រទេសកម្ពុជា ទៅចូលរួមប្រកួតប្រជែងកម្មវិធី «Miss Grand International» ឆ្នាំ២០១៧ ក្នុងវគ្គផ្តាច់ព្រ័ត្រ ដែលបានធ្វើឡើនៅប្រទេសវៀតណាម ។ បើទោះបីជា មិនទទួលបានជោគជ័យគ្រងមកុដនៅក្នុងកម្មវិធីនេះក៏ដោយ ប៉ុន្តែ ខ្លឹម ស្រីគា ក៏ទទួលបានពានរង្វាន់មួយផងដែរ នោះគឺពាន «បវរកញ្ញាប្រជាប្រិយភាព» «Grand Pageant’s Choice Award » ដោយតំណែងនៃពានរង្វាន់នេះ ធ្វើឡើងតាមរយៈការទទួលបានការគាំទ្រច្រើនលើសលុបលើបណ្តាញសង្គមហ្វេសប៊ុក ។ ហើយអំឡុងពេលនៃការប្រកួតនោះ ស្រីស្អាត ខ្លឹម ស្រីគា មិនត្រូវបានជ្រើសរើសសម្រាប់ការបន្តដល់វគ្គចុងក្រោយបង្អស់នោះទេ គឺនាងធ្លាក់ត្រឹមវគ្គជម្រុះជុំ២០នាក់ចុងក្រោយ ។
ក្រោយទទួលបានជោគជ័យក្នុងកម្មវិធីបវរកញ្ញានេះមក ស្រីស្អាត ខ្លឹម ស្រីគា ក៏ទទួលបានការងារសិល្បៈជាបន្តបន្ទាប់ ដោយនាងតែងតែបង្ហាញវត្តមានសម្តែងភាពយន្ត និងស្ពតពាណិជ្ជកម្មជាបន្តបន្ទាប់ ខណៈពេលបច្ចុប្បន្ន នាងបានព្យាយាមសម្រករាងឲ្យមកដូចដើមវិញ ដើម្បីកុំឲ្យប៉ះពាល់ដល់ការងារសិល្បៈរបស់នាង៕
ចែករំលែកព័តមាននេះ