តារាកំប្លែងជើងចាស់២ដួង គឺនាយ ក្រឹម និងនាយ ចាបចៀន បានទម្លាយអារម្មណ៍ពិតរបស់ខ្លួនថា អ្នកទាំង២បានស្រឡាញ់រាប់អានគ្នាទៅវិញទៅមកស្មើនឹងជីវិតដូចគ្នា ចាប់តាំងពីអ្នកទាំង២
រាជធានីភ្នំពេញ ៖ តារាកំប្លែងជើងចាស់២ដួង គឺនាយ ក្រឹម និងនាយ ចាបចៀន បានទម្លាយអារម្មណ៍ពិតរបស់ខ្លួនថា អ្នកទាំង២បានស្រឡាញ់រាប់អានគ្នាទៅវិញទៅមកស្មើនឹងជីវិតដូចគ្នា ចាប់តាំងពីអ្នកទាំង២ប្រឡូកក្នុងវិស័យសិល្បៈ រហូតមកទល់នាពេលបច្ចុប្បន្ននេះ ។
តាមរយៈឃ្លីបវីដេអូមួយក្នុងជំនួបរួមគ្នាចូលរួមនៅពិធីមង្គលការមួយកន្លែង ដែលត្រូវបានបង្ហោះតាមបណ្តាញសង្គមពីនាយ ក្រឹម ហើយតារាកំប្លែងទាំង២ដួងនេះ បានលើកឡើងដូចគ្នាថា «អ្នកទាំង២បានស្រឡាញ់រាប់អានគ្នាស្មើជីវិតដូចគ្នា»។ ខណៈពេលដែលនាយ ចាប ចៀន បានបញ្ជាក់ច្បាស់ៗថា «ខ្លួនមានមុខក្នុងសិល្បៈរហូតមកទល់នាពេលនេះ ក៏ដោយសារនាយ ក្រឹម ដែរ» ។
ចំណែកនាយ ក្រឹម វិញ ក៏បានបញ្ជាក់ដែរថា «នៅពេលថតភាពយន្តខ្មែរ ពេលខ្ញុំល្បី អត់ ចាប ចៀន ខ្ញុំអត់ថត បើមាន ចាប ចៀន បានខ្ញុំថត»។ ដោយឡែកនាយ ចាប ចៀន វិញ បានលើកឡើងដែរថា «នាយ ក្រឹម ល្បីមុនគេ ហើយបើ នាយ ក្រឹម និយាយហើយ គឺផលិតកម្មណាក៏តាមដែរ»។
យ៉ាងណា តាមរយៈការទម្លាយអារម្មណ៍ពិតពីតារាកំប្លែងទាំង២ដួងខាងលើនេះ បានធ្វើឲ្យទស្សនិកជន ជាពិសេសបណ្តាអ្នកគាំទ្រតារាទាំង២ បានសម្តែងការភ្ញាក់ផ្អើល និងបង្ហាញក្តីរំភើបជំនួសអ្នកទាំង២ ក្នុងពេលដែលឃើញអ្នកទាំង២ មានការស្រឡាញ់រាប់អានគ្នាយ៉ាងស្និទ្ធស្នាលដូចបងប្អូន ដែលរហូតមកទល់នាពេលនេះ គឺមានរយៈពេលជាច្រើនឆ្នាំមកហើយ។
យ៉ាងណា ក្រៅពីនាយ ចាប ចៀន តារាកំប្លែងនាយ ក្រឹម ក៏មានការស្រឡាញ់រាប់អានគ្នាយ៉ាងស្និទ្ធស្នាលបំផុតផងដែរ ជាមួយតារាកំប្លែងនាយ កុយ ក្នុងពេលដែលអ្នកទាំង២ ត្រូវបានគេចាត់ទុកថា គឺជាដៃគូរសម្តែងយ៉ាងសាកសម មិនថាការសម្តែងភាពយន្ត និងការសម្តែងកំប្លែងនោះឡើយ ។
ជាការកត់សម្គាល់ ទស្សនិកជនដែលធ្លាប់ទស្សនាខ្សែភាពយន្តខ្មែរនាទសវត្សន៍ឆ្នាំ៩០ គឺប្រាកដជាបានដឹងច្បាស់ពីតារាកំប្លែងទាំង២ដួងខាងលើនេះ ដោយសារទាំងនាយ ក្រឹម និងនាយ ចាប ចៀន បានបង្ហាញវត្តមានសម្តែងជាច្រើនរឿង។ ហើយជាទូទៅ ទស្សនិកជនតែងតែបន្ទរពាក្យស្រដៀងគ្នាថា «បើមានរឿងខ្មែរចាក់បញ្ចាំង តើរឿងនោះមាន នាយ ក្រឹម និងនាយ ចាប ចៀន ឬនាយ កុយ សម្តែងដែរទេ? ហើយប្រសិនបើមាន ភាពយន្តនោះប្រាកដជាទាក់ទាញទស្សនិកជន ទស្សនាច្រើនជាមិនខាន»។
គួរបញ្ជាក់ផងដែរថា ការប្រឡូកក្នុងវិស័យសិល្បៈអស់រយៈពេលជាច្រើនឆ្នាំមកនេះ សម្រាប់តារាកំប្លែង នាយ ក្រឹម និងនាយ ចាប ចៀន នៅតែទទួលបានការពេញនិយមពីសំណាក់ទស្សនិកជននាពេលបច្ចុប្បន្ននេះដដែល ដោយអ្នកទាំង២នៅតែមានទីផ្សារការងារសិល្បៈខ្ពស់ ពោលគឺអ្នកទាំង២តែងតែបង្ហាញវត្តមានសម្តែងភាព និងកម្មវិធីកម្សាន្តចាក់ផ្សាយតាមទូរទស្សន៍នានាជាបន្តបន្ទាប់ស្ទើរមិនដាច់សូរនោះឡើយ៕
ចែករំលែកព័តមាននេះ