តារាសម្តែងវ័យក្មេងនាង ហេង បូនីកា បានរំលឹកគុណទៅកាន់បុគ្គលសំខាន់២រូប ដែលជាអ្នកនាំផ្លូវឱ្យនាងទទួលបានជោគជ័យលើវិថីសិល្បៈ រហូតមកទល់នាពេលបច្ចុប្បន្ននេះ
រាជធានីភ្នំពេញ ៖ តារាសម្តែងវ័យក្មេងនាង ហេង បូនីកា បានរំលឹកគុណទៅកាន់បុគ្គលសំខាន់២រូប ដែលជាអ្នកនាំផ្លូវឱ្យនាងទទួលបានជោគជ័យលើវិថីសិល្បៈ រហូតមកទល់នាពេលបច្ចុប្បន្ននេះ។
នាងបញ្ជាក់ថា បុគ្គលទាំង២រូបនោះ គឺទី១ ជាបងប្រុសបង្កើតរបស់នាង និងទី២ គឺតារាសម្តែងជើងចាស់ អ្នកនាង ផាន់ ផាភួង ដែលអ្នកទាំង២នេះ ត្រូវបាននាងចាត់ទុកថា ជាបុគ្គលសំខាន់ ដែលស្ថិតនៅពីក្រោយរូបនាងឱ្យទទួលបានផ្លែផ្កាលើវិថីសិល្បៈនាពេលបច្ចុប្បន្ននេះ។
បទសម្ភាសន៍ជាមួយស្ថានីយទូរទស្សន៍នៅក្នុងស្រុកមួយស្រីស្អាត ហេង បូនីតា បានលើកឡើងថា «រហូតមកទល់នាពេលនេះ នាងមិនដែលភ្លេចគុណចំពោះបុគ្គលសំខាន់២រូប ដែលជាអ្នកជួយជ្រោមជ្រែងនាងឱ្យទទួលបានជោគជ័យក្នុងអាជីពសិល្បៈនោះឡើយ»។
នាងបញ្ជាក់ថា «បងប្រុសបង្កើតរបស់នាងបានលះបង់ពេលវេលាយ៉ាងច្រើន ដើម្បីបាននៅជួយជ្រោមជ្រែងនាងពីក្រោយឱ្យនាងចូលប្រឡូកក្នុងវិថីសិល្បៈ»។ នាងថា «បងប្រុសនាងបានរៀនចប់ថ្នាក់បរិញ្ញាបត្រ តែគាត់មិនបានរកការងារធ្វើអ្វីឡើយ សុខចិត្តមកបម្រើការងារនៅកន្លែងថត ដោយធ្វើជាអ្នកលើកទឹក និងទិញបាយឱ្យគេ ដើម្បីបានស្គាល់ក្រុមថត និងចង់ឱ្យប្អូនបានចូលរួមថតនឹងគេដែរ»។
នាងបន្តថា «ការថតដំបូង នាងហាក់ទ្រាំមិនបាននូវការស្តីបន្ទោសពីផលិតករ ហើយក៏ធ្លាប់មានបំណងបោះបង់វាចោលផងដែរ។ ប៉ុន្តែបងប្រុសរបស់នាង តែងតែលើកទឹកចិត្ត និងបានប្រៀនប្រដៅនាងឱ្យមានការអត់ធ្មត់ និងតស៊ូនៅក្នុងរឿងនេះ។ ក្រោយមក នាងក៏បានយកពាក្យទាំងអស់នោះមកដេកគិត ហើយក៏យល់ថា ប្រសិនបើនាងមិនអាចទ្រាំរឿងនេះបាន ហើយទៅថ្ងៃក្រោយ តើនាងអាចនឹងធ្វើអ្វីបានទៀត?»។
ស្រីស្អាត ហេង បូនីកា បានបន្ថែមថា «ក្រោយមក នាងបានព្យាយាមដុសខាត់ខ្លួនឯងឱ្យបានខ្លាំងជាងមុន ដោយនៅក្នុងនោះរាល់ការសម្តែងរបស់នាងម្តងៗ គឺនាងតែងតែយកមកមើល ហើយប្រៀបធៀបខ្លួនឯង និងទទួលស្គាល់ខ្លួនឯងពីចំណុចខ្សោយ ដោយយកវាមកកែប្រែ»។ នាងបន្តថា «បន្ទាប់ការដុសខាត់ខ្លួនឯង និងការជួយបង្ហាត់បង្ហាញពីរៀមច្បង ទើបធ្វើឱ្យនាងអាចសម្តែងបានរហូតមកទល់នាពេលនេះ»។
យ៉ាងណា បើតាមស្រិស្អាត ហេង បូនីកា បន្ថែមទៀតថា «ការដែលនាងអាចមានមុខមាត់ក្នុងវិថីសិល្បៈនាពេលនេះ វាក៏ជាចំណែកមួយពីតារាសម្តែងអ្នកនាង ផាន់ ផាភួង ផងដែរ»។ នាងបញ្ជាក់ថា «អ្នកនាង ផាភួង បានណែនាំនាងឱ្យស្គាល់ផលិតកម្មផ្សេង ដែលនោះជាឱកាសសម្រាប់រូបនាងក្នុងការបញ្ចេញមុខមាត់ឱ្យគេឃើញ បន្ទាប់ពីធ្លាប់ពីតារាសម្តែងរាយរង»។
នាងបន្ថែមថា «ក្រោយពីការណែនាំនោះមក នាងក៏ត្រូវបានផលិតករហៅទៅធ្វើការសាកល្បងសម្តែង (Casting) រហូតនាងអាចជាប់ជាតួសម្តែងបែបកាចតែម្តង»។ នាងថា «ចាប់តាំងពីនាងចូលសម្តែងមក គ្រប់រឿងដែលនាងបានថត គឺសុទ្ធតែទទួលការធ្វើតេស្ដជាមុនទាំងអស់ ដោយកម្រមានរឿងណាដែលនាងមិនបានធ្វើតេស្ដជាមុននោះឡើយ»។
គួរបញ្ជាក់ផងដែរថា ស្រីស្អាត ហេង បូនីកា គឺជាអតីតម្ចាស់ជ័យលាភីលំដាប់រងទី២ បវរកញ្ញាចក្កវាឡកម្ពុជាឆ្នាំ២០២២ ហើយបច្ចុប្បន្ននាងបានបង្ហាញវត្តមានសម្តែងជាបន្តបន្ទាប់ មិនថារឿងភាគទូរទស្សន៍ និងរឿងខ្នាតធំបញ្ចាំងតាមរោងភាពយន្តនោះឡើយ។ ក្នុងពេលទទួលបានជោគជ័យលើអាជីពសម្តែងនាពេលនេះ ស្រីស្អាត ហេង បូនីកា ហាក់នៅមិនទាន់នឹកនានៅក្នុងការចូលរួមប្រឡងជាថ្មីនៅក្នុងកម្មវិធី Miss ណាមួយនៅឡើយទេ ។ ដោយនាងលើកឡើងថា «នាងសុំដកឃ្លាមួយរយៈសិន រង់ចាំមើលពេលវេលាសមស្រប ទើបចូលមកប្រឡូកការងារនេះវិញ ដោយសារមួយរយៈនេះ នាងរវល់ការងារថត និងការរៀបចំធ្វើជំនួញផ្ទាល់ខ្លួន»៕
ចែករំលែកព័តមាននេះ