ថ្មីៗនេះ អ្នកគាំទ្រនៅប្រទេសថៃសម្ដែងការភ្ញាក់ផ្អើលយ៉ាងខ្លាំង ក្រោយពេលឃើញបទចម្រៀងមួយមានចំណងជើងថា «Ton» ធ្វើការបកស្រាយច្រៀងដោយតារាប្រុសវ័យក្មេង SPRITE x និងលោក GUYGEEGEE’ ដែលកាលពីកន្លងទៅ
ប្រទេសថៃ ៖ ថ្មីៗនេះ អ្នកគាំទ្រនៅប្រទេសថៃសម្ដែងការភ្ញាក់ផ្អើលយ៉ាងខ្លាំង ក្រោយពេលឃើញបទចម្រៀងមួយមានចំណងជើងថា «Ton» ធ្វើការបកស្រាយច្រៀងដោយតារាប្រុសវ័យក្មេង SPRITE x និងលោក GUYGEEGEE’ ដែលកាលពីកន្លងទៅ ពួកគេធ្លាប់បង្កើតស្នាដៃ និងបង្ហាញទឹកដមសំឡេងដ៏អស្ចារ្យ រហូតក្លាយទៅជាប្រវត្តិសាស្ត្រក្នុងឧស្សាហកម្មតន្ត្រីថៃតែម្ដង។
មិនត្រឹមតែប៉ុណ្ណោះ គេនាំគ្នាសង្កេតឃើញថា បទរបស់ពួកគេ ដែលមានចំណងជើង «Ton» នេះដែរ កំពុងតែទទួលនូវការចាប់អារម្មណ៍ពីសំណាក់ប្រិយមិត្តពុកម៉ែបងប្អូនគ្រប់បណ្ដាប្រទេស ជាពិសេសស្ថិតនៅក្នុងប្រទេសថៃតែម្ដង។ ចំណែកបទមួយនេះ ត្រូវបានគេដឹងថា វាកំពុងតែឈរនៅលេខ៨៩ ស្ថិតនៅលើតារាងមួយ មានឈ្មោះថា «Billboard Global» នៅក្នុងចំណោមបទចម្រៀងជុំវិញពិភពលោក។ នេះអាចនិយាយបានថា (លើកលែងតែនៅអាមេរិក) ហើយក៏ជាបទថៃដំបូងគេបង្អស់ ដែលអត្ថបទចម្រៀងរបស់ថៃ មានវាសនាជាប់ចំណាត់ថ្នាក់កំពូលបែបនេះ។
យ៉ាងណាមិញ ជាហេតុធ្វើឱ្យបទមួយនេះ លេចធ្លោជាងគេ ដោយសារតែរូបភាព ក៏ដូចជាវីដេអូ MV កាយវិការដ៏រស់រវើក ការលេងទឹកមុខទៅតាមចង្វាក់ភ្លេង វាមើលទៅពិតជាគួរឱ្យទាក់ទាញ និងស៊ីចង្វាក់ខ្លាំងណាស់ទៅតាមសកម្មភាព។ ហើយអ្វីដែលរឹតតែអស្ចារ្យទៅទៀតនោះ មិនថាការប្រើប្រាស់សំឡេង ការច្រៀងដ៏ពីរោះ ដែលមានឃ្លាឃ្លោងរៀបរាប់បង្កប់នៅក្នុងអត្ថន័យមួយនេះ រហូតចាក់ដោតអារម្មណ៍ទស្សនិកជនជាច្រើនលាននាក់ចូលចិត្តស្ដាប់ប៉ុន្មានដងក៏មិនចេះធុញនោះដែរ។
ដោយឡែក គេនាំគ្នាពិនិត្យមើល ក៏ឃើញមានអ្នកចូលទស្សនាតាមដានមើលជាប្រចាំជាង២០លាននាក់ឯណោះ រហូតដល់ថ្នាក់ធ្វើឱ្យអ្នកនិយមលេងនៅក្នុងបណ្ដាញទំនាក់ទំនងសង្គមInternet មិនតិចនាក់នោះទេ នាំគ្នាសម្ដែងការត្រេកអរ សើចសប្បាយរីករាយរំភើបជាខ្លាំង។ ហើយភ្លាមៗនោះ អ្នកដែលតែងតែស្រលាញ់ចូលចិត្តគាំទ្រនៅបទមួយនេះ ពួកគេនាំគ្នាខមិនចូលរួមអបអរសាទរគ្រប់ៗគ្នា ជាពិសេសពួកគេថែមទាំងជូនពរឱ្យតារាចម្រៀងខាងលើ កាន់តែជោគជ័យនៅលើអាជីពក្នុងវិស័យចម្រៀងរបស់ខ្លួនឯងផងដែរ។
ក្រោយពេលបទមួយនេះ កាន់តែផ្ទុះកក្រើកមិនឈប់ ផលិតកម្មចម្រៀង «HYPE TRAIN» ក៏បានចេញមុខមកបង្ហោះសារប្រកាសក្ដែងៗ ដោយថ្លែងអំណរគុណយ៉ាងជ្រាលជ្រៅទៅដល់មហាជន ក៏ដូចជាអ្នកគាំទ្រផងដែរ បន្ទាប់ពីបទចម្រៀងមួយបទ ក្រោមចំណងជើងថា «Ton» ទទួលបាននៅការចូលមើលរហូតដល់ទៅជាង៤០០លានដងឯណោះ ពិតជាមិនធម្មតានោះឡើយ។ រហូតបានឈានទៅដល់ 400,000,000 Views! សូមអរគុណអ្នកទាំងអស់គ្នាជាខ្លាំងសម្រាប់ការស្រលាញ់ចូលចិត្ត។ ខ្ញុំមិនដឹងថា ត្រូវនិយាយដូចម្តេច ហើយវាមើលទៅសាកសមនោះទេ មានតែម្រាមដៃដប់សំពះអរគុណទៅកាន់គ្រប់គ្នាតែប៉ុណ្ណោះឯង»។
មិននៅស្ងៀមតទៅទៀត ស្របពេលឃើញនៅបទរបស់ខ្លួនមានសន្ទុះកើនឡើងជាលំដាប់រួចមក គេប្រទះឃើញតារាប្រុសវ័យក្មេង ‘Sprite SUPER10’ ដែលត្រូវគេស្គាល់យ៉ាងច្បាស់ដូចថ្ងៃ លោកគឺជាតារាចម្រៀងរ៉េបដ៏ល្បីល្បាញវ័យក្មេងម្នាក់ កំពុងតែទទួលបាននៅប្រជាប្រិយភាពពីមួយថ្ងៃទៅមួយថ្ងៃ និងកើនឡើងទ្វេដងនៅក្នុងឧស្សាហកម្មមួយនេះ នាពេលបច្ចុប្បន្ន។
បន្ទាប់មក តារាប្រុសវ័យក្មេងដែលមានមុខមាត់ រូបរាងដ៏ស្រស់សង្ហារូបនេះ លោកក៏ចេញមុខមកចែករំលែកនៅការបង្ហោះបទចម្រៀងមួយនេះ ក្នុងសាច់រឿងរបស់លោក ហើយថែមទាំងបាននិយាយប្រាប់ថា «សូមអរគុណច្រើនខ្លាំងណាស់ ដែលស្រលាញ់ចូលចិត្ត និងអ្នកដែលតែងតែគាំទ្រពួកខ្ញុំមករហូត ចូលរួមអបអរសាទរផង នៅបទ Ton មួយនេះ»។ ហើយអ្វីដែលកាន់តែមិននិយាយមិនបានទៅទៀតនោះ ពួកគេក៏បាននិយាយកោតសរសើរគ្នាទៅវិញទៅមកមិនដាច់ពីមាត់ផងដែរ៕ ដោយ ៖ សុភា ដានេត
ចែករំលែកព័តមាននេះ