តារា TikTok ល្បីឈ្មោះម្នាក់ជាប់ពន្ធនាគារ២ឆ្នាំ ជុំវិញការបង្ហោះវីដេអូប្រមា.ថសាសនាមួយ
ឥណ្ឌូនេស៊ី ៖ តុលាការឥណ្ឌូនេស៊ី បានកាត់ទោសស្ត្រីដែលជាតារា TikTok ល្បីឈ្មោះម្នាក់ជាប់ពន្ធនាគារ
ឥណ្ឌូនេស៊ី ៖ តុលាការឥណ្ឌូនេស៊ី បានកាត់ទោសស្ត្រីដែលជាតារា TikTok ល្បីឈ្មោះម្នាក់ជាប់ពន្ធនាគាររយៈពេល២ឆ្នាំ ពីបទបង្ហោះវីដេអូលើបណ្តាញ TikTok ដោយនិយាយភាសាអ៊ីស្លាមមួយឃ្លា មុនពេលនាងបរិភោគបាយសាច់ជ្រូក។ នេះបើយោងតាមប្រភពពី BBC ចេញផ្សាយកាលពីថ្ងៃទី២០ ខែកញ្ញា កន្លងទៅ។
នាង Lina Lutfiawati អាយុ៣៣ឆ្នាំ ត្រូវបានរកឃើញថា មានពិរុទ្ធពីបទញុះញង់ឱ្យមានការស្អប់ខ្ពើមប្រឆាំងនឹងបុគ្គល និងក្រុមសាសនាអ៊ីស្លាម ហើយនាងក៏ប្រឈមនឹងការពិន័យជាប្រាក់ ១៦,២៤៥ដុល្លារផងដែរ។ ការជាប់ពន្ធនាគាររបស់នាង អាចនឹងត្រូវបន្ត៣ខែបន្ថែមទៀត ប្រសិនបើនាងមិនបង់ប្រាក់ពិន័យ ខណៈដែលនេះជាករណីចុងក្រោយបំផុតក្នុងករណីបន្តបន្ទាប់ ដែលពាក់ព័ន្ធនឹងច្បាប់ប្រមាថដ៏ចម្រូងចម្រាសរបស់ឥណ្ឌូនេស៊ី ដែលជាប្រទេសកាន់សាសនាអ៊ីស្លាមភាគច្រើន។
ស្ត្រីជនជាតិឥណ្ឌូនេស៊ី ដែលមានឈ្មោះឥណ្ឌាថា Lina Mukherjee ដោយសារនាងស្រលាញ់ភាពយន្តបូលីវូដ បាននិយាយថា នាងជាអ្នកកាន់សាសនាអ៊ីស្លាម មុនពេលបរិភោគបាយសាច់ជ្រូក ដែលការទទួលទានសាច់ជ្រូក ត្រូវបានហាមឃាត់ដាច់ខាតនៅក្នុងសាសនាអ៊ីស្លាម។ ស្ត្រីដែលផលិតវីដេអូបង្ហាញអំពីរបៀបរស់នៅ ដែលមានអ្នកតាមដានលើ TikTok ជាង២លាននាក់ ក៏មានអាជីវកម្មនៅក្នុងប្រទេសឥណ្ឌាផងដែរ។
វីដេអូការហូបបាយសាច់ជ្រូកនេះ ថតអំឡុងពេលនាងកំពុងធ្វើដំណើរកម្សាន្តនៅលើកោះបាលី ដែលជាកន្លែងទេសចរណ៍ដ៏ពេញនិយមរបស់ប្រទេសឥណ្ឌូនេស៊ី។ វីដេអូនេះ ទទួលបានការចូលមើលរាប់លានដង និងត្រូវបានរិះគន់យ៉ាងទូលំទូលាយ ដែលជំរុញឱ្យជនជាតិឥណ្ឌូនេស៊ីម្នាក់ទៀតរាយការណ៍កំហុសរបស់នាងទៅប៉ូលិស។
ប៉ូលីសបានចោទប្រកាន់នាង Lina Lutfiawati កាលពីខែឧសភាកន្លងទៅ ពីបទផ្សព្វផ្សាយព័ត៌មានគួរឱ្យស្អប់ខ្ពើម និងជាសកម្មភាពអរិភាពលើជាតិសាសន៍ សាសនានិងពូជសាសន៍។ ស្របពេលក្រុមអភិរក្សជាច្រើននៅទូទាំងប្រទេសឥណ្ឌូនេស៊ី ក៏បានចេញសេចក្តីសម្រេចដែលហៅវីដេអូនេះថា ការប្រមាថដ៏ធ្ងន់ធ្ងរ។
នេះមិនមែនជាលើកទី១ឡើយ សម្រាប់ Lina Lutfiawati ខណៈដែលកាលពីខែមីនាកន្លងទៅ នាងធ្លាប់បានបង្ហោះវីដេអូមួយ ដែលនិយាយពាក្យ «Bismillah» ដែលជាឃ្លាភាសាអារ៉ាប់ ដែលមានន័យថា «ក្នុងព្រះនាមនៃព្រះ» មុនពេលនាងបរិភោគស្បែកសាច់ជ្រូកបំពង។
គួររំលឹកថា កាលពីឆ្នាំមុន ប៉ូលិសឥណ្ឌូនេស៊ីបានចាប់ខ្លួនមនុស្ស៦នាក់ ដោយចោទប្រកាន់ពីបទប្រមាថសាសនាអ៊ីសា្លម ជុំវិញការផ្សព្វផ្សាយស្រា។ ក្រុមសិទ្ធិមនុស្សបានធ្វើយុទ្ធនាការជាយូរមកហើយប្រឆាំងនឹងច្បាប់ ដែលពួកគេនិយាយថា ត្រូវបានគេប្រើជាញឹកញាប់ ដើម្បីកំណត់គោលដៅជនជាតិភាគតិចសាសនា។
ដោយឡែក លោក Basuki Tjahaja Purnama អតីតអភិបាលក្រុងហ្សាការតា ត្រូវបានកាត់ទោសជាប់ពន្ធនាគារជិត២ឆ្នាំ ពីបទប្រមាថសាសនាអ៊ីស្លាមដ៏ចម្រូងចម្រាសក្នុងឆ្នាំ២០១៧។ លោកគឺជាគ្រិស្តសាសនិកម្នាក់ ត្រូវបានចាប់ដាក់ពន្ធនាគារ ព្រោះការអត្ថាធិប្បាយក្នុងយុទ្ធនាការមួយ អំឡុងពេលការឃោសនាបោះឆ្នោតឡើងវិញ៕ (ដកស្រង់ចេញពី BBC និង AFP)
ចែករំលែកព័តមាននេះ