តារាសម្តែង វណ្ណៈ បរមី បានចេញមុខធ្វើការបដិសេធ ចំពោះការលើកឡើងពីមហាជនមួយចំនួន ដែលនិយាយថា «នាងបង្ហាញអារម្មណ៍មិនសប្បាយចិត្ត ឬអន់ចិត្តចំពោះការទទួលបានចំណាត់ថ្នាក់រងទី២
រាជធានីភ្នំពេញ ៖ តារាសម្តែង វណ្ណៈ បរមី បានចេញមុខធ្វើការបដិសេធ ចំពោះការលើកឡើងពីមហាជនមួយចំនួន ដែលនិយាយថា «នាងបង្ហាញអារម្មណ៍មិនសប្បាយចិត្ត ឬអន់ចិត្តចំពោះការទទួលបានចំណាត់ថ្នាក់រងទី២ (2Runner Up) នៃកម្មវិធី Miss Universe Cambodia 2023 ដែលទើបតែបិទបញ្ចប់កាលពីពេលថ្មីៗនេះ»។
តារាស្រីស្រស់រូបនេះ បានបញ្ជាក់ថា «រហូតមកទល់នាពេលនេះ ការទទួលបានចំណាត់ខាងលើនេះ នាងមិនដែលមានការអន់ចិត្ត ឬមិនសប្បាយចិត្តនោះឡើយ ពោលគឺនាងគ្រាន់តែលើកឡើងពីការមិនសប្បាយចិត្តចំពោះខ្លួនឯង ដែលធ្វើមិនបានល្អសម្រាប់ការប្រកួតវគ្គផ្តាច់ព្រ័ត្រនេះ ហើយធ្វើឲ្យក្រុមរបស់នាងទាំងមូលអស់ង្ឃឹម»។
ក្នុងសំណេរដែលបានសរសេរបង្ហោះនៅលើបណ្តាញសង្គម ស្រីស្រស់ វណ្ណៈ បរមី បានលើកឡើងថា «ខ្ញុំអត់ដែលនិយាយថា ខ្ញុំអត់សប្បាយចិត្តជាមួយនឹងតំណែងរងទី២ របស់ខ្ញុំទេ ប៉ុន្តែអ្វីដែលខ្ញុំបានផុស និងសរសេរនៅលើ Facebook ហ្នឹង គឺខ្ញុំចង់និយាយថា ខ្ញុំអត់សប្បាយចិត្តជាមួយនឹងការសម្ដែងរបស់ខ្ញុំនៅលើឆាក ព្រោះដោយសារក្រុមខ្ញុំទាំងមូល គឺឃើញពីថាមពលនិងសមត្ថភាពរបស់ខ្ញុំ។ ព្រោះពួកគាត់គិតថា ខ្ញុំអាចធ្វើបានល្អជាងហ្នឹង ជាពិសេសគឺទាក់ទងជាមួយនឹងសំណួរចម្លើយផ្ទាល់តែម្ដង»។
ស្រីស្រស់ វណ្ណៈ បរមី បានលើកឡើងបន្តថា «ប៉ុន្តែចៃដន្យអី ខ្ញុំធ្វើអត់បានល្អទេ។ ហើយនេះ គឺជាអ្វីដែលខ្ញុំអត់សប្បាយចិត្តជាមួយនឹងខ្លួនឯង។ ទឹកមុខរបស់ខ្ញុំ គឺបានផ្លាស់ប្ដូរតាំងពីពេលដែលខ្ញុំឆ្លើយសំណួរចប់ម៉េស ប៉ុន្តែមានតែក្រុមខ្ញុំទេ បានដឹង ហើយនៅពេលដែលខ្ញុំផុសនៅក្នុង Facebook ហ្នឹង គឺខ្ញុំចង់បង្ហាញពីកន្លែងហ្នឹង ព្រោះដោយសារតែមានបងៗខ្លះ គាត់ឃើញទឹកមុខខ្ញុំអត់សូវសប្បាយចិត្ត។ ប៉ុន្តែខ្ញុំអត់នឹកស្មានថា វាក្លាយទៅជាការយល់ច្រឡំធំមួយទៅដល់អ្នកទាំងអស់គ្នាទេ គឺអ្នកទាំងអស់គ្នាគិតថា ខ្ញុំអត់សប្បាយចិត្តជាមួយនឹងតំណែងខ្ញុំ តែខ្ញុំសប្បាយចិត្តខ្លាំងមែនទែន»។
ស្រីស្រស់ វណ្ណៈ បរមី បានលើកឡើងទៀតថា «ហើយខ្ញុំគិតថា តំណែងរងទី១ និងតំណែងឯក គឺសាកសមមែនទែន សម្រាប់ពួកគាត់ទាំង២នាក់ ព្រោះពួកគាត់ គឺជាមនុស្សដែលតស៊ូមកយូរហើយ។ អញ្ចឹងអត់មានការអន់ចិត្តអីនៅក្នុងនឹងទេ។ ហើយខ្ញុំក៏សង្ឃឹមថា អ្នកទាំងអស់គ្នានឹងឈប់យល់ច្រឡំទៀត។ ហើយខ្ញុំក៏សូមអរគុណទៅដល់ក្រុមទាំងមូលរបស់ខ្ញុំផងដែរ ដែលពួកគាត់បានជ្រោមជ្រែងខ្ញុំតាំងពីថ្ងៃដែលខ្ញុំសម្រេចចិត្តថា ចូលប្រកួតដំបូង។ អរគុណដល់ទាំងអស់គ្នាខ្លាំងមែនទែន»។
ជាការកត់សម្គាល់ ក្រោយពីការប្រកួតត្រូវបានបញ្ចប់នោះ ស្រីស្អាត វណ្ណៈ បរមី ក៏បានបង្ហោះសារនៅលើបណ្តាញសង្គមថា «និយាយត្រង់ ម្សិលម៉ិញ ខ្ញុំអត់សប្បាយចិត្តជាមួយខ្លួនឯងទេ ព្រោះដោយសារខ្ញុំធ្វើអត់បានល្អ មានអារម្មណ៍ធ្វើឲ្យក្រុមទាំងមូលរបស់ខ្ញុំអស់សង្ឈឹម តែខ្ញុំភ្លេចគិតថា ខ្ញុំអត់ទាន់ ready ទេ»។
នាងបញ្ជាក់ថា «នេះជាលើកដំបូងរបស់ខ្ញុំ បទពិសោធន៍ជីវិត និងសិល្បៈខ្ញុំមានច្រើនមែន តែបទពិសោធន៍លើកវិថីបវរកញ្ញាខ្ញុំអត់ដែលមានទេ ត្រង់ៗចុះសូម្បីតែដំបូង កម្មវិធីគេចង់បានអីខ្ញុំមិនដែលទាំងដឹងផង ទាល់តែបានចូលរួម ទើបខ្ញុំចាប់ផ្ដើមរៀន ចាប់ផ្ដើមយល់ ហើយក៏សូមអរគុណដល់អ្នកទាំងអស់គ្នាដែលស្រលាញ់ និងគាំទ្រខ្ញុំ។ ពីខ្ញុំ បូរមី Your 2nd runner up of MUC 2023»។
គួររំលឹកថា ៖ ស្រីស្អាត វណ្ណៈ បូរមី ទទួលស្គាល់សមត្ថភាពខ្លួននៅស្ទើរ ក្រោយឈ្នះត្រឹមលំដាប់រង Miss Universe Cambodia 2023 ៕
ចែករំលែកព័តមាននេះ