អតីតតារាសម្តែងអ្នកនាង កែវ កល្យាណ និងមិត្តរួមអាជីពមួយចំនួនទៀត បានសម្រេចទុកពេលឱ្យលោក យុត្ថារា ឆានី ដើម្បីដោះស្រាយរឿងរ៉ាវលក់ដីខ្យល់ ដែលកំពុងតែផ្ទុះបាតុភាពយ៉ាងក្តៅគគុកពាសពេញបណ្តាញសង្គមក្នុងរយៈពេលប៉ុន្មានថ្ងៃមកនេះ
រាជធានីភ្នំពេញ ៖ អតីតតារាសម្តែងអ្នកនាង កែវ កល្យាណ និងមិត្តរួមអាជីពមួយចំនួនទៀត បានសម្រេចទុកពេលឱ្យលោក យុត្ថារា ឆានី ដើម្បីដោះស្រាយរឿងរ៉ាវលក់ដីខ្យល់ ដែលកំពុងតែផ្ទុះបាតុភាពយ៉ាងក្តៅគគុកពាសពេញបណ្តាញសង្គមក្នុងរយៈពេលប៉ុន្មានថ្ងៃមកនេះ។
បើយោងតាមការលើកឡើងរបស់អ្នកនាង កែវ កល្យាណ នៅលើបណ្តាញសង្គមបានឱ្យរៀបរាប់ប្រាប់ដឹងថា «ជំរាបសួរ បងប្អូនពុកម៉ែជាទីគោរព នាងខ្ញុំ កែវ កល្យាណ សូមចូលខ្លួនមកបកស្រាយនូវរឿងដីធ្លីជាមួយលោក យុត្ថារា ឆានី ឥឡូវលោកបានខលមកសម្របសម្រួលដោះស្រាយហើយ»។
អ្នកនាងបញ្ជាក់ថា «នាងខ្ញុំ និងមិត្តរួមអាជីពទាំងអស់គ្នា ដែលបានទិញដីក៏ជជែក និងសម្រេចចិត្តទុកពេលឲ្យលោក ឆានី មួយរយៈ ដើម្បីដោះស្រាយតាមសំណូមពរ ត្រង់ថា ដោះបានពេលណា ឬយ៉ាងណា ចាំនាងខ្ញុំជំរាបបន្តបន្ទាប់ទៀត។ នាងខ្ញុំក៏សូមអរគុណដល់បងប្អូនពុកម៉ែ ដែលតែងតែស្រលាញ់ និងគាំទ្រដល់នាងខ្ញុំ និងមិត្តសិល្បៈទាំងអស់គ្នារហូតមក»។
ជាការកត់សម្គាល់ មុននឹងបែកធ្លាយរឿងរ៉ាវខាងលើចំពោះអ្នកនាង កែវ កល្យាណ និងតារាមួយចំនួនទៀតនេះ គេក៏បានឃើញមានគណនីហ្វេសប៊ុកមួយមានឈ្មោះ «Seng kim» បានបង្ហោះសារដោយភ្ជាប់ជាមួយនឹងរូបភាពអតីតតារាសម្តែងលោក យុត្ថារា ឆានី ថា «ខំទុកចិត្ត និងស្រលាញ់ idol តាំងពីក្មេង ក៏នាំបងស្រីទៅទិញដីរបស់ idol បង់រំលោះបានជាង២ម៉ឺនដុល្លារ ប៉ុន្តែបែរជាអត់មានដីទៅវិញ ដីដែលបានបង់នោះ ត្រូវគេព័ទ្ធរបងយកទៅវិញ។ – ចាំ idol ដោះស្រាយក៏មិនឃើញ – សុំតែលុយដើមវិញ ឬដូរដីផ្សេងក៏បាន ប៉ុន្តែអត់មានដំណោះស្រាយ អោយចាំហើយចាំទៀត សូមបងប្អូនជួយស៊ែរអោយលោកពូ យុទ្ធតារាឆានី បានឃើញផង បងខ្ញុំខំប្រឹងធ្វើការណាស់ ដើម្បីយកលុយទៅបង់អោយលោកពូរាល់ខែ មិនដែលយឺត សូម្បី១ថ្ងៃ -សូមបងប្អូនជួយស៊ែរអោយគាត់ឃើញផង»។
គួរបញ្ជាក់ថា ការបង្ហោះខាងលើនេះ ក៏ត្រូវបានអ្នកនាង កែវ កល្យាណ ធ្វើការចែកចាយបន្ត ដោយនៅក្នុងនោះអ្នកនាង ក៏បានភ្ជាប់ជាមួយនឹងសារថា «បើខ្ញុំវិញជិត៦ម៉ឺនដុល្លារ បង់លុយផ្តាច់អស់តាំងពីមុនកូវីដទៀត ហើយសន្យាកាត់ប្លង់រឹងបំបែកក្បាលដីអោយ ចាំរហូតដល់ឥឡូវនៅតែសន្យា»។
អ្នកនាងបញ្ជាក់ថា «ប្អូនអើយ ខ្ញុំធ្លាប់ថតជាមួយ រាប់អាន និងទុកចិត្តជឿជាក់ខំជួយទិញតាមការអះអាងធានាសព្វគ្រប់ មិត្តឆានី បើបានឃើញហើយ គួរជួយដោះស្រាយតាមសន្យាផង»។ អ្នកនាងបន្ថែមថា «លុយញើសឈា.មណាមិត្ត ហើយខ្ញុំបាននាំមិត្តភក្តិយើងសិល្បៈជាច្រើនទិញ តែឥឡូវពួកគាត់ពិបាកចិត្តតឹងទ្រូងយំមិនចេញទេ។ ពួកគាត់បបួលខ្ញុំប្តឹង និងបង្ហោះហ្វេសប៊ុក តែខ្ញុំនិងមិត្ត អម្ពរ ទេវី ថា កុំទាន់ ចាំមើលគាត់ដោះស្រាយសិន ចឹងសូម ឆានី ជួយដោះស្រាយអោយបានឆាប់ផង កុំពន្យាពេលយូរទៀតអី ព្រោះយូរឆ្នាំហើយ»។
យ៉ាងណា ក្រោយពេលបានបង្ហោះសារខាងលើនេះបានបន្តិច អ្នកនាងក៏បានសម្រេចលុបសារនេះចោលវិញ ដោយសារមានការទាក់ទងដោយផ្ទាល់ពីលោក យុត្ថារា ឆានី។
ពាក់ព័ន្ធបញ្ហាខាងលើនេះដែរ កោះសន្តិភាពនៅមិនទាន់អាចទាក់ទងសុំការបកស្រាយពីអតីតតារាសម្តែងលោក យុត្ថារា ឆានី បាននៅឡើយទេ បើគិតត្រឹមថ្ងៃទី១៥ ខែសីហា ឆ្នាំ២០២៣នេះ ខណៈពេលការសាកសួរ នៅមិនទាន់មានការឆ្លើយតប។ ទោះជាយ៉ាងណាក៏ដោយ ក្រោយការផ្ទុះបាតុភាពខាងលើនេះ លោក យុត្ថារា ឆានី ក៏បានចេញមុខបង្ហោះសារខ្លីមួយនៅលើគណនីហ្វេសប៊ុករបស់លោកថា «ខ្ញុំបាទ យុត្ថារា ឆានី សូមបដិសេធរាល់ការចុះផ្សាយព័ត៌មានមិនពិត។ ប្រទេសមានច្បាប់ បើយល់ថាខ្ញុំខុស សូមធ្វើតាមច្បាប់រៀងខ្លួន!»៕
ចែករំលែកព័តមាននេះ