បេក្ខនារីបវរកញ្ញាចក្រវាលឥណ្ឌូណេស៊ីច្រើននាក់ ដាក់ពាក្យប្តឹង ក្រោយរងការបំពា.នផ្លូវភេ.ទ
ឥណ្ឌូនេស៊ី ៖ បេក្ខនារីបវរកញ្ញាចក្រវាលឥណ្ឌូណេស៊ីឆ្នាំ ២០២៣ ជាច្រើននាក់ (Miss Universe
ឥណ្ឌូនេស៊ី ៖ បេក្ខនារីបវរកញ្ញាចក្រវាលឥណ្ឌូណេស៊ីឆ្នាំ ២០២៣ ជាច្រើននាក់ (Miss Universe Indonesia) បានចុះឈ្មោះដាក់ពាក្យបណ្តឹងទៅប៉ូលិស ដោយចោទប្រកាន់អ្នករៀបចំកម្មវិធី ជុំវិញការបំពា.នផ្លូវភេ.ទ។ នេះបើយោងតាមប្រភពពី BBC ចេញផ្សាយនៅថ្ងៃទី០៩ ខែសីហា ឆ្នាំ២០២៣។
មេធាវីម្នាក់ក្នុងចំណោមមេធាវីរបស់ពួកគេបានបញ្ជាក់ថា បណ្តាបេក្ខនារីបវរកញ្ញាត្រូវបានស្នើឱ្យដោះអាវចេញសម្រាប់ការពិនិត្យរាងកាយ និងថតរូប ពោលគឺ២ថ្ងៃមុនពេលការប្រកួតផ្តាច់ព្រ័ត្រ នៅថ្ងៃទី០៣ ខែសីហា ឆ្នាំ២០២៣ ដោយអ្នករៀបចំកម្មវិធីអះអាងថា បេក្ខនារីបវរកញ្ញាត្រូវតែពិនិត្យរកស្លាកស្នាម និងសាច់យារធ្លាក់ (Cellulite) ឬស្នាមសាក់នៅលើដងខ្លួនរបស់ពួកគេ។
បេក្ខនារីបវរកញ្ញាម្នាក់ បាននិយាយថា «ខ្ញុំមានអារម្មណ៍ថា សិទ្ធិរបស់ខ្ញុំត្រូវបានគេរំលោភបំពា.ន»។ នាងបាននិយាយទៅកាន់ប្រព័ន្ធផ្សព្វផ្សាយ រួមជាមួយនឹងអ្នកមិនពេញចិត្តជាច្រើននាក់ផ្សេងទៀត កាលពីដើមសប្តាហ៍នេះថា «វាបានប៉ះពាល់ដល់ផ្លូវចិត្តខ្ញុំ។ ខ្ញុំមានបញ្ហាគេងមិនលក់» ខណៈដែលទូរទស្សន៍ក្នុងស្រុក បានបិទមុខរបស់ពួកនាង នៅក្នុងការផ្សាយដើម្បីការពារអត្តសញ្ញាណរបស់ពួកគេ។
លោកស្រី Mellisa Anggraeni មេធាវីតំណាងឱ្យបេក្ខនារីបវរកញ្ញា៣នាក់ ដែលបានប្តឹងតវ៉ាបាននិយាយថា មនុស្សជាច្រើននាក់ទៀត នឹងចេញមុខប្តឹងប្រឆាំងទង្វើបែបនេះ។ ស្របពេលដែលប៉ូលិសប្រចាំរដ្ឋធានីហ្សាកាតា បានចេញសេចក្តីថ្លែងការណ៍មួយដោយអះអាងថា ពួកគេនឹងធ្វើការស៊ើបអង្កេតបន្ថែមទៀត។
បើតាមការលើកឡើងរបស់ប្រធានរៀបចំកម្មវិធី នាង Poppy Capella បានបញ្ជាក់នៅក្នុងសេចក្តីថ្លែងថា ម្ចាស់កម្មវិធីបវរកញ្ញាចក្រវាលឥណ្ឌូនេស៊ី នឹងស៊ើបអង្កេតលើការចោទប្រកាន់នេះ។ ពាក់ព័ន្ធជុំវិញបញ្ហានេះ អង្គភាពបវរកញ្ញាជាសកល (The Global Miss Universe Organisation) បានបញ្ជាក់ផងដែរថា ខ្លួនកំពុងពិនិត្យលើបញ្ហានេះ ពាក់ព័ន្ធនឹងការចោទប្រកាន់ពីភាពមិនសមរម្យផ្លូវភេទយ៉ាងធ្ងន់ធ្ងរ លើបេក្ខនារីបវរកញ្ញាឥណ្ឌូនេស៊ី។
ដោយឡែក នាង Maria Harfanti បវរកញ្ញាចក្រវាលឥណ្ឌូនេស៊ីឆ្នាំ ២០១៥ បានថ្លែងថា ខណៈដែលការពិនិត្យរាងកាយត្រូវធ្វើជាធម្មតា នៅក្នុងប្រទេសឥណ្ឌូនេស៊ី ប៉ុន្តែបេក្ខនារីបវរកញ្ញាមិនត្រូវបានស្នើសុំឱ្យដោះសំលៀកបំពាក់នោះទេ។ នាងបន្ថែមថា អ្នករៀបចំកម្មវិធីក៏តែងតែស្នើសុំធ្វើសន្ទស្សន៍ម៉ាសរាងកាយ ដើម្បីធ្វើរង្វាស់ជាតិខ្លាញ់រាងកាយដោយផ្អែកលើកម្ពស់ និងទម្ងន់របស់បេក្ខភាពប្រឡង។
នៅក្នុងសន្និសីទសារព័ត៌មាន កាលពីថ្ងៃទី០៧ ខែសីហា ឆ្នាំ២០២៣ អ្នកតវ៉ាម្នាក់ បាននិយាយថា ការត្រួតពិនិត្យរាងកាយ ត្រូវបានធ្វើឡើងនៅក្នុងបន្ទប់បិទជិតមួយ ប៉ុន្តែបុរសមួយចំនួនក៏មានវត្តមាននៅក្នុងនោះផងដែរ។ នាងបានបន្ថែមថា ទ្វារមិនត្រូវបានបិទទាំងស្រុងនោះទេ ដោយផ្តល់ឱ្យមនុស្សនៅខាងក្រៅអាចមើលឃើញ។
កម្មវិធីប្រកួតសម្រស់ត្រូវបានប្រព្រឹត្តិយូរមកហើយ នៅក្នុងប្រទេសឥណ្ឌូនេស៊ី ដោយអ្នករៀបចំមានការប្រុងប្រយ័ត្នខ្លាំងណាស់ ដើម្បីកុំធ្វើឱ្យខូចដល់ផ្នែកអភិរក្សនៃសង្គមឥណ្ឌូនេស៊ី ។ ជាក់ស្តែង នៅក្នុងឆ្នាំ ២០១៣ កម្មវិធីបវរកញ្ញាពិភពលោក បានសម្រេចលុបចោលការប្រកួតវគ្គឈុតប៊ីគីនី នៅពេលដែលប្រទេសឥណ្ឌូនេស៊ី ដែលភាគច្រើនកាន់សាសនាឥស្លាម ទទួលធ្វើជាម្ចាស់ផ្ទះ។
គួរបញ្ជាក់ផងដែរថា នាង Fabienne Nicole Groeneveld មកពីរដ្ឋធានីហ្សាកាតា គឺជាម្ចាស់មកុដនៃកម្មវិធីបវរកញ្ញាចក្រវាលឥណ្ឌូណេស៊ីឆ្នាំ ២០២៣ (Miss Universe Indonesia 2023) ហើយនាងនឹងតំណាងប្រទេសឥណ្ឌូនេស៊ី សម្រាប់ការប្រកួតកម្មវិធីបវរកញ្ញាចក្រវាលឆ្នាំ ២០២៣ ដែលនឹងធ្វើឡើងនៅប្រទេសអែលសាល់វ៉ាឌ័រ នៅថ្ងៃទី១៨ ខែវិច្ឆិកា ខាងមុខនេះ៕ (ប្រភពពី BBC)
ចែករំលែកព័តមាននេះ