រាជធានីភ្នំពេញ ៖ នៅទីបំផុត តារាសម្តែង និងពិធីករវីជេ ដាដា បានយល់ព្រមបញ្ចប់រឿងជាមួយនឹងលោក អ៊ិន សុភិន ហើយ បន្ទាប់ពីចាងហ្វាងផលិតកម្មមហាហង្សរូបនេះ បានចេញមុខដោះស្រាយបំណុលតាមការទាមទាររបស់លោក។
ក្រោយការទូទាត់បំណុលប្រមាណជា១ពាន់ដុល្លារពីលោក អ៊ិន សុភិន ហើយនោះ វីជេ ដាដា ក៏សម្រេចចិត្តលុបចេញនូវវីដេអូដែលលោកបានបង្ហោះបង្ហាញពីការមិនសប្បាយ និងទាមទារអោយលោក អ៊ិន សុភិន ចេញមុខដោះស្រាយបំណុលអោយលោកជាបន្ទាន់ នៅមុនពេលលោកអស់ភាពអត់ធ្មត់។
យ៉ាងណាម៉ិញ កាលពីថ្ងៃទី១៨ ខែកក្កដា ឆ្នាំ២០២៣នេះ វីជេ ដាដា ក៏បានចេញវីដេអូមួយថ្មីទៀត ដោយតារារូបនេះបញ្ជាក់ថា «រឿងរ៉ាវរបស់លោកត្រូវបានបញ្ចប់ហើយ បន្ទាប់ពីភាគីលោក អ៊ិន សុភិន បានចេញមុខដោះស្រាយបំណុលលោករួចរាល់»។
តាមរយៈវីដេអូខ្លីមួយនៅលើបណ្ដាញសង្គម វីជេ ដាដា បានឲ្យដឹងថា «ខាងគណនីរបស់ក្រុមហ៊ុនលោក អ៊ិន សុភិន បានទូទាត់លុយថ្លៃឈ្នួលធ្វើជាពិធីករក្នុងកម្មវិធីមួយកាលពីខែមុន តាមរយៈធនាគារ ABA រួចហើយ នៅម៉ោងជាង១០ព្រឹក ថ្ងៃទី១៨ ខែកក្កដា នេះ»។ លោកបញ្ជាក់ថា «ក្រោយមានការដោះស្រាយរួច លោកក៏សម្រេចលុបវីដេអូចាស់ដែលស្នើឲ្យលោក អ៊ិន សុភិន ចូលខ្លួនដោះស្រាយរឿងបំណុលនោះចេញវិញ។ ប៉ុន្តែសម្រាប់វីដេអូ ដែលលោកទើបចេញនេះ លោកនឹងមិនលុបចេញទេ ព្រោះដើម្បីបញ្ជាក់ថា ចាប់ពីពេលនេះទៅរវាងលោក និងលោក អ៊ិន សុភិន លែងជាប់ពាក់ព័ន្ធ ឬមានបញ្ហាអ្វីជាមួយគ្នាទៀតហើយ ដោយការងារលោក គឺលោកធ្វើ រីឯការងារ អ៊ិន សុភិន គឺអ៊ិន សុភិន ជាអ្នកធ្វើ»។
យ៉ាងណា បើតាម វីជេ ដាដា ថា «អ្វីដែលបានកើតឡើងនេះ មិនមែនជាសម្តែងតាមការយល់ឃើញពីមហាជនមួយចំនួនឡើយ ពោលគឺវាជារឿងពិតដែលបានកើតឡើងចំពោះលោក»។
ជាការកត់សម្គាល់ មុននឹងរឿងរ៉ាវខាងលើនេះ ត្រូវបានបញ្ចប់នោះ តារាសម្តែង និងពិធីករវីជេ ដាដា បានចេញមុខព្រមា.នចាងហ្វាងផលិតកម្មមហាហង្ស គឺលោក អ៊ិន សុភិន អោយចូលខ្លួនដោះស្រាយបំណុលដែលជំពាក់ នៅមុនពេលលោកអស់ការអត់ធ្មត់ចំពោះរឿងមួយនេះ។
តារាប្រុសរូបនេះ បញ្ជាក់ថា «លោក អ៊ិន សុភិន បានជំពាក់លុយលោកប្រមាណតែជាង១ពាន់ដុល្លារប៉ុណ្ណោះ អំឡុងពេលដែលលោកបានទៅធ្វើការជាពិធីករអោយលោកនៅក្នុងកម្មវិធីមួយកាលពីពេលកន្លងទៅ»។
តាមរយៈឃ្លីបវីដេអូដែលបង្ហោះលើបណ្តាញសង្គមកាលពីថ្ងៃទី១៦ ខែកក្កដា ឆ្នាំ២០២៣ វីជេ ដាដា បានអះអាងថា «ការដែលលោកចេញវីដេអូនេះឡើង គឺក្នុងគោលបំណងអោយលោក អ៊ិន សុភិន ចេញមុខសងបំណុលដែលបានជំពាក់ ក្នុងពេលដែលលោកព្យាយាមទាក់ទង តែមិនទទួលបានការឆ្លើយតប»។
លោកនិយាយថា «វីដេអូនេះ គឺជាសារមួយប្រាប់ទៅលោក អ៊ិន សុភិន ព្រោះលោក អ៊ិន សុភិន បានលេងគេជាច្រើននាក់ហើយ ដោយធ្វើការមិនបើកប្រាក់អោយគេ។ លោក អ៊ិន សុភិន ត្រូវគិតថា លោកជាចាងហ្វាងផលិតកម្មមហាហង្សមួយ ហើយកន្លងមកលោកក៏ធ្លាប់គ្រប់គ្រងកម្មវិធី Miss Grand Cambodia និងធ្វើកម្មវិធីជាច្រើនទៀត ហើយយកលុយទៅណា។ ខ្ញុំនិយាយនេះ គឺជាសារអោយលោក អ៊ិន សុភិន ចេញមុខដោះស្រាយលុយកាក់សម្រាប់រូបលោកផង ព្រោះវាបានអូសយៈពេលប្រមាណ៤ខែហើយ ដែលខ្ញុំទាក់ទងទៅតាមរយៈឆាតមិនមើល ខំមិនមិនឆ្លើយតប និងតាមទូរស័ព្ទមិនលើក វាច្រើនដង ហើយក៏យូរហើយដែរ»។
លោកបញ្ជាក់ថា «មុនចេញវីដេអូនេះ លោកក៏បានជូនដំណឹងទៅលោក អ៊ិន សុភិន រួចហើយ ប៉ុន្តែលោកហាក់មិនអើពើ ហើយលោកជាមនុស្សដែលប្រើគេហើយក៏ទាត់ចោល»។ លោកបន្ថែមថា «លុយជំពាក់លោកត្រឹម១ពាន់ ឬ១ពាន់ជាងដុល្លារមិនច្រើនឡើយ ប៉ុន្តែលោក អ៊ិន សុភិន តែងតែបានធ្វើបាបអ្នកសិល្បៈច្រើនណាស់ ដោយមិនបើកប្រាក់អោយគេ»។
យ៉ាងណា បើតាម វីជេ ដាដា ថា លោកមិនចង់ចេញវីដេអូនេះឡើយ ដោយសារតែលោកមិនចង់មានរឿងមិនល្អតាមបណ្តាញសង្គមនេះ ទើបលោកបានទុកពេលវេលាអោយលោក អ៊ិន សុភិន ចំពោះរឿងនេះ តែរហូតមកទល់នាពេលនេះនៅតែគ្មានដំណោះស្រាយ»។ លោកបញ្ជាក់ថា «ប្រសិនបើលោក អ៊ិន សុភិន នៅតែមិនចេញមុខដោះស្រាយរឿងនេះទៀត លោកនឹងមានវិធានការផ្សេង ដោយលោកនឹងមិនទុកមុខមាត់អោយលោក អ៊ិន សុភិន ទៀតឡើយនៅពេលដែលជួបលោកនៅខាងក្រៅ»។
ដោយឡែកក្នុងពេលដែលវីជេ ដាដា បានចេញវីដេអូទម្លាយរឿងរ៉ាវមួយនេះ ពិធីករលោក សុខ រ៉ាស៊ី ក៏បានចែកចាយវីដេអូនេះ ដោយភ្ជាប់ជាមួយនឹងសារបង្ហោះតាមបណ្តាញសង្គមដែរថា «ជនរងគ្រោះទី៧ ហើយ ទាំងតារាសម្តែង ពិធីករ អ្នករៀបចំឆាក បុគ្គលិក គ្រូបង្វឹកបាល់ទាត់»។ លោកបញ្ជាក់ថា «លុយខ្ញុំ 15000$ គ្មានបានសូម្បីមួយរៀលលុយខ្មែរ ដាក់ពាក់បណ្តឹងជាងពីរឆ្នាំហើយ ពឹងតុលាការប្រហែល២០ឆ្នាំទៀតបាន បានលុយមើលទៅ តើអ្នកណាអាចជួយបាន?។
គួររំលឹកផងដែរថា ៖ ទ្រាំលែងបាន! វីជេ ដាដា ព្រមា.នលោក អ៊ិន សុភិន ឱ្យដោះស្រាយបំណុល ក្រោយអស់ការអត់ធ្មត់(វីដេអូ) ៕
ចែករំលែកព័តមាននេះ